Çölde 32 - Мукаддес Китап

32‑нҗи бап Иорданың гүндогарындакы тирелер

¹ Рубенлер билен гатларың мал-гарасы гаты көпди. Язер ве Гилгат топракларында мал бакмага оңат ерлериң бардыгыны гөренлеринде,

² гатлар билен рубенлер гелип, Муса билен руханы Элгазара ве халкың баштутанларына шейле дийдилер:

³ «Атарот, Дибон, Язер, Нимра, Хешбон, Элгала, Себам, Небо ве Бегон ялы

⁴ Реббиң ысрайыл халкы үчин басып алан ерлери мал бакмага аматлы ерлердир. Сизиң гулларыңызың болса мал-гарасы бар».

⁵ Олар шейле довам этдилер: «Эгер биз сизиң өңүңизде мерхемет газанан болсак, гой, бу топрак биз гулларыңыза мүлк эдилип берилсин. Бизи Иордан дерясындан аңры гечирмәң».

⁶ Муса олара шейле җогап берди: «Доганларыңыз урша гидйәркә, сиз бу тайда галмакчымы?

⁷ Нәме себәпден Реббиң өзлерине берен юрдуна гитмезликлери үчин, ысрайылларың йүрегине довул салҗак болярсыңыз?

⁸ Юрды гөзден гечирсинлер дийип, Кадешбарнеядан уградан аталарыңыз хем шейле эдипдилер.

⁹ Эшкол дересине ченли гидип, юрды сынланларындан соң, олар гелип, Реббиң өзлерине берен юрдуна гирмезликлери үчин, ысрайылларың йүреклерине горкы салыпдылар.

¹⁰ Ол гүн Реббиң гахары гелди ве Ол ант ичип, шейле дийди:

¹¹ „Мүсүрден чыкан яшы йигрими ве ондан ёкары болан адамларың хич бири Ыбрайыма, Ысхага ве Якуба вада берен юрдумы гөрмез. Чүнки олар Маңа бүтин калплары билен ынанмадылар.

¹² Мениң вада берен юрдума диңе Епуннәниң оглы Калеп билен Нунуң оглы Ешува барып билер, чүнки олар Маңа бүтин калбы билен ынандылар“.

¹³ Онсоң Ысрайылың гаршысына Реббиң гахары гелди ве Ол Өз назарында пислик эден несил өлүп гутарянча, олары кырк йыллап чөлде энтетди.

¹⁴ Ине, инди болса сиз – гүнәкәрлериң несли, өз аталарыңызың орнуна гечип, Ысрайылың гаршысына Реббиң гахар-газап одуны хас-да туташдырдыңыз!

¹⁵ Эгер сиз Реббиң ызына эермекден боюн товласаңыз, Ол бүтин халкы ене-де чөлүң ичинде еке ташлар. Сиз хем халкың өлүмине себәп боларсыңыз».

¹⁶ Онсоң рубенлер билен гатлар Мусаның янына гелип, оңа шейле дийдилер: «Биз бу ерде довар сүрүлеримиз үчин агыллар ве чагаларымыз үчин галалар гурҗак.

¹⁷ Эмма биз сөвеше тайяр болуп, гайдувсыз эсгерлер хөкмүнде ысрайылларың өңүнден гидерис ве олары бармалы ерлерине ченли элтерис. Шу вагт болса, бизиң чагаларымыз бу үлкәниң илатындан горанып, беркидилен галаларда яшарлар.

¹⁸ Ысрайылларың хер бири өз мүлкүне эе болянча, биз өйүмизе гайтмарыс.

¹⁹ Биз олар билен бирликде Иорданың аңры гапдалындан мүлк ер алмарыс, чүнки бизиң пайымыза Иорданың бәри гапдалы, гүндогар тарапы дүшди».

²⁰ Шонда Муса олара шейле дийди: «Эгер сиз шу айданларыңызы эдип, гайдувсыз эсгерлер хөкмүнде Реббиң хузурында сөвеше гитсеңиз,

²¹ Реб душманларыны гачмага меҗбур эдйәнчә, гайдувсыз эсгерлер хөкмүнде хеммәңиз Реббиң хузурында Иорданың аңры тарапына гечсеңиз

²² ве юрт Реббе табын болса, ондан соң сиз ызыңыза доланып билерсиңиз. Бу сизиң Реббиң ве Ысрайылың өңүндәки борчларыңызы ерине етирдигиңиз болар ве бу үлке Реббиң хузурында сизиң мүлкүңиз болар.

²³ Эгер бейле этмесеңиз, Реббе гаршы гүнә иш этдигиңиз болар ве хөкман газанан гүнәңизиң җезасыны чекерсиңиз.

²⁴ Чагаларыңыз үчин галалар, сүрүлериңиз үчин агыллар гуруң, йөне берен вадаңызы берҗай эдиң».

²⁵ Онсоң гатлар билен рубенлер Муса шейле дийдилер: «Агамыз нәме буюрса, биз гулларың берҗай эдерис.

²⁶ Чага-чугаларымыз, аялларымыз, доварларымыз ве әхли мал-гараларымыз бу ерде, Гилгат галасында галар.

²⁷ Гулларың болан биз болса, гайдувсыз эсгерлер хөкмүнде хеммәмиз агамызың айдышы ялы, дерядан гечип, Реббиң хузурында сөвеше чыкарыс».

²⁸ Онсоң Муса олар хакда руханы Элгазара, Нунуң оглы Ешува ве ысрайыл тирелериниң уругбашыларына шейле буйрук берди:

²⁹ «Эгер гатлар билен рубенлер гайдувсыз эсгерлер хөкмүнде хеммеси Реббиң хузурында сизиң билен Иордандан гечселер ве ол юрт сизе табын болса, онда сиз олара Гилгат үлкесини мүлк эдип бериң.

³⁰ Эмма олар гайдувсыз эсгерлер хөкмүнде сизиң билен дерядан гечмеселер, онда сизиң араңызда Кенган топрагындан мүлк аларлар».

³¹ Гатлар билен рубенлер шейле җогап бердилер: «Реб сениң гулларыңа нәме буюрса, биз шоны-да берҗай эдерис.

³² Биз гайдувсыз эсгерлер хөкмүнде Реббиң хузурында дерядан гечип, Кенган юрдуна гирерис, йөне бизе мирас дүшен мүлкүмиз, гой, Иорданың шу гүндогар гапдалы болсун».

³³ Муса гатлар билен рубенлере ве Юсубың несли болан манаша тиресиниң ярысына амор ханы Сихоның юрдуны ве Башаның ханы Огуң юрдуны, оларың төверегиндәки галаларыдыр обалары билен бирликде берди.

³⁴ Онсоң гатлар Дибон, Атарот, Арогер,

³⁵ Атротшопан, Язер, Ёгбоха,

³⁶ Бейтнимра ве Бейтхаран ялы берк галалары дикелтдилер ве доварлар үчин агыллар гурдулар.

³⁷ Рубенлер болса Хешбон, Элгала, Кирятайым,

³⁸ Небо, Багалмегон (олар кәбир галаның атларыны чалышдылар) ве Сибма галасыны тәзеден гурдулар. Олар тәзеден гуран галаларына башга атлар дакдылар.

³⁹ Манашаның оглы Макырың несиллери гидип, Гилгады басып алдылар ве ол ерден аморлары ковдулар.

⁴⁰ Муса Гилгады Манашаның оглы Макырың несиллерине берди. Олар ол ерде месген тутдулар.

⁴¹ Манашаның оглы Яйыр гидип, оларың обаларыны басып алды ве оларың адына Хавотяйыр гойды.

⁴² Ноба гидип, Кенаты ве онуң төверегиндәки обалары басып алып, ол ере Ноба дийип, өз адыны дакды.