Çölde 31 - Мукаддес Китап

31‑нҗи бап Мидянларың гаршысына уруш

¹ Реб Муса:

² «Ысрайыллара гаршы эден иши үчин мидянларың җезасыны бер. Соңра аманадыңы табшырып, өз ата-бабаларыңа говшарсың» дийди.

³ Онсоң Муса гелип, халка: «Мидянларың гаршысына урушмак үчин өз араңыздан эсгерлер сайлаң, гой, олар Реббе эден иши үчин мидянларың җезасыны берсинлер.

⁴ Хер ысрайыл тиресинден мүң адамы урша ёллаң» дийди.

⁵ Шейлеликде, ысрайыл тирелериниң херсинден мүң адам, җеми он ики мүң яраглы эсгер йыгнанды.

⁶ Муса олары руханы Элгазарың оглы Пинехас билен биле урша угратды. Пинехас янына мукаддес өйүң энҗамлары билен сөвеш сазыны чалар ялы сурнайлар хем алды.

⁷ Ысрайыллар Реббиң Муса буйрушы ялы, мидянлар билен уршуп, оларың әхли эркек гөбеклисини гырдылар.

⁸ Өлдүриленлериң арасында Эви, Рекем, Сур, Хур ве Реба атлы бәш саны Мидян ханы-да барды. Бегор оглы Билгамы-да ысрайыллар гылычдан гечирдилер.

⁹ Онсоң ысрайыллар мидян аялларыдыр чагаларыны есир алып, мидянларың әхли мал-гараларыны, сүрүлерини ве әхли затларыны олҗа алдылар.

¹⁰ Мидянларың яшан әхли галаларыдыр обаларыны якдылар.

¹¹ Таланып алнан затлары ве әхли олҗаны, адамлардыр маллары болса алып гайтдылар.

¹² Онсоң олар есирлери, олҗаларыны ве таланып алнан затлары Иордан дерясының боюнда, Ерихоның гаршысында ерлешйән Мовап дүзлүгиндәки дүшелгеде болан Муса билен руханы Элгазара ве ысрайыл халкына гетирдилер.

¹³ Муса, руханы Элгазар ве бүтин халкың баштутанлары олары гаршы алмага дүшелгәниң дашына чыкдылар.

¹⁴ Урушдан гайдып гелен гошун серкерделерине – мүңбашылара, йүзбашылара Мусаның гахары гелди.

¹⁵ Муса олара: «Аялларың хеммесини дири галдырдыңызмы?» дийип йүзленди.

¹⁶ «Бу аяллар Билгамың маслахаты билен Пегорда ысрайыллара Реббе гаршы дөнүклик этдирдилер. Шонуң үчинем, Реббиң халкының арасына гыргынчылык аралашды.

¹⁷ Инди болса эркек гөбекли әхли чагалары ве эркек киши билен янашан аялларың хеммесини өлдүриң.

¹⁸ Эмма эркек киши билен янашмадык яш гызларың әхлисини өзүңиз үчин дири галдырың.

¹⁹ Араңызда ким адам өлдүрен я-да өлә галташан болса еди гүн дүшелгәниң дашында галсын. Үчүнҗи ве единҗи гүнлер өзүңизи хем-де есирлериңизи тәмизләң.

²⁰ Бар эшиклери, дериден, гечи йүңүнден эдилен хер бир зады ве агачдан ясалан гап-гачларың әхлисини тәмизләң».

²¹ Руханы Элгазар урша гидип гелен эсгерлере шейле дийди: «Реббиң Муса буйран канунының парзлары шулардан ыбарат:

²² алтын, күмүш, бүрүнч, демир, галайы ве гуршун ялы

²³ ода чыдамлы затларың әхлисини одуң ичинден гечирип халаллаң. Ондан башга-да, олар тәмизлик сувы билен хем халаллансын. Галан ода чыдамсыз затлар болса сувдан гечирилсин.

²⁴ Единҗи гүн эшиклериңизи ювмалысыңыз ве тәмиз болмалысыңыз. Ондан соңра дүшелгә гирип билерсиңиз».

Олҗа пайланыляр

²⁵ Реб Муса шейле дийди:

²⁶ «Сен, руханы Элгазар ве халкың уругбашылары гетирилен әхли олҗаны, аяллары ве мал-гаралары хасаплаң.

²⁷ Олҗаны ики бөлеге бөлүп, бир бөлегини урша гатнашан эсгерлере, галаныны болса җемагата пайлаң.

²⁸ Урша гатнашан эсгерлериң пайындан – ынсан, сыгыр, эшек, гоюн-гечиден Реббе пач хөкмүнде бәш йүзден бирини айры гоюң.

²⁹ Эсгерлериң пайындан алып, оны Реббе садака хөкмүнде руханы Элгазара бериң.

³⁰ Ысрайылларың пайындан: ынсан, сыгыр, гоюн, гечи, әхли мал-гараларың эллиден бирини алып, Реббиң мукаддес чадырыны гораян левилере бериң».

³¹ Муса билен руханы Элгазар Реббиң Муса буйрушы ялы этдилер.

³² Алнан олҗаның эсгерлерден артаны: алты йүз етмиш бәш мүң гоюндыр гечи,

³³ етмиш ики мүң ири мал,

³⁴ алтмыш бир мүң эшек

³⁵ ве эркек билен янашмадык отуз ики мүң бой гыз.

³⁶ Урша гатнашан эсгерлериң пайына үч йүз отуз еди мүң бәш йүз гоюндыр гечи дүшди.

³⁷ Олардан алты йүз етмиш бәш гоюндыр гечи Реббе пач хөкмүнде берилди.

³⁸ Ири малың җеми отуз алты мүң болуп, олардан пач хөкмүнде Реббе етмиш икиси берилди.

³⁹ Эшеклериң җеми саны отуз мүң бәш йүз болуп, олардан пач хөкмүнде Реббе алтмыш бириси берилди.

⁴⁰ Гызларың җеми саны он алты мүң болуп, олардан отуз икиси Реббе пач хөкмүнде берилди.

⁴¹ Муса Реббиң өзүне буйрушы ялы, Реббе берлен пачларың хеммесини садака хөкмүнде руханы Элгазара берди.

^42-46 Җемагатың пайы хөкмүнде Мусаның эсгерлерден айран бөлеги үч йүз отуз еди мүң бәш йүз гоюндыр гечиден, отуз алты мүң ири малдан, отуз мүң бәш йүз эшекден ве он алты мүң гыздан ыбарат болды.

⁴⁷ Реббиң өзүне буйрушы ялы, Муса ысрайылларың пайындан хер элли адамдан ве мал-гаралардан бирини алып, Реббиң мукаддес чадырыны гораян левилере берди.

^48-49 Соңра гошун серкерделери – мүңбашылар, йүзбашылар Мусаның янына гелип, оңа шейле дийдилер: «Биз гулларың ёлбашчылык эдйән гошунымыздакы эсгерлери санап чыкдык. Оларың екеҗеси хем кем дәл.

⁵⁰ Биз өз тапан алтын шай-сеплеримизи: улы ве кичи билезиклери, мөхүрли йүзүклери, гулакхалкалары ве асыклары өз гүнәлеримизден сапланмак үчин, Реббиң хузурына садака гетирдик».

⁵¹ Муса билен руханы Элгазар олардан әхли безег шай-сеплери гөрнүшиндәки алтыны кабул эдип алдылар.

⁵² Мүңбашылардан ве йүзбашылардан Реббе садака хөкмүнде хөдүр эдилен алтының аграмы он ики пут болды.

⁵³ Урша гатнашан эсгерлер болса алан олҗаларыны өзлерине галдырдылар.

⁵⁴ Шейдип, Муса билен руханы Элгазар мүңбашылардан, йүзбашылардан алтыны кабул эдип алдылар. Оны Реббиң ёлуна берилйән пай хөкмүнде ысрайыллар үчин Реббе йүз тутулян чадыра гетирдилер.