Çölde 30 - Мукаддес Китап

30-нҗы бап Касам хакда

¹ Шейлеликде, Муса Реббиң буйран затларының барыны ысрайыл халкының дыкгатына етирди.

² Соңра Муса ысрайыл тире баштутанларына шейле дийди: «Ине, Реб сизе шу затлары буюрды:

³ „Эгер бир адам Реббе вада этсе я-да хер хили затдан өзүни сакламага касам ичсе, онда ол берен сөзүни бозман, агзы билен айдан вадасыны берҗай этсин.

⁴ Эгер аял машгала яш вагты, энтек атасы өйүндекә, Реббе вада этсе я-да касам ичсе,

⁵ атасы-да гызының эден вадасыны я-да касамыны эшидибем оңа хич зат диймесе, онда ол аялың эден вадасы я-да касамы өз гүйҗүнде галар.

⁶ Эмма атасы булары эшидип, өз нәразылыгыны билдирсе, гызының эден вадасы, ичен касамы өз гүйҗүни йитирйәр. Атасының оңламандыгы себәпли, Реб бу гызы багышлар.

⁷ Эгер гыз вада эдип я-да бир зат бабатда ойланман касам ичип, соңам дурмуша чыкса,

⁸ әри хем бу затлардан хабарлы болубам хич зат диймесе, онда гызың эден вадасы, ичен касамы өз гүйҗүнде галар.

⁹ Эмма әри бу затлары эшидип оңламаса, онда аялының эден вадасыны я-да ойланман ичен касамыны рет эдер ве Реб берҗай этмедик касамы үчин бу аялы багышлар.

¹⁰ Эмма дул аялың я-да әри билен айрылышан аялың эден вадасы, өзүни сакламага ичен касамы берҗай эдилмелидир.

¹¹ Эгер дурмуша чыкан аял вада эден я-да хер хили затдан өзүни сакламага касам ичен болса,

¹² әри-де муны эшидип, хич зат диймән, гаршы болмадык болса, онда аялың эден вадасы я касамы өз гүйҗүнде галар.

¹³ Эмма әри булары эшидип, өз нәразылыгыны билдирен болса, онда ол аялының берен әхли вадаларыны, ичен касамыны рет эдйәр. Әриниң оңламандыгы себәпли, вадасыны берҗай эдип билмедик бу аялы Реб багышлар.

¹⁴ Аялының эден ислендик вадасыны я-да ичен касамыны әри тассыклап я-да рет эдип билер.

¹⁵ Эмма әри аялының эден вадасыны я-да ичен касамыны эшидип, шол гүнүң өзүнде оңа гаршы чыкмадык болса, онда аялының эден вадасыдыр касамыны әри оңлан хасап эдилер. Чүнки әри олара гаршы аялына хич зат диймәнди.

¹⁶ Йөне әри олары эшиден бадына хич зат диймән, оны бираз вагтдан соң рет этсе, онда аялының гүнәлери әриниң бойнунадыр“».

¹⁷ Әр-аялың ве энтек атасы өйүнде яшаян гыз билен атасының арасындакы гатнашыклар хакында Реббиң Муса буйран дүзгүнлери шулардан ыбаратдыр.