Çölde 3 - Мукаддес Китап

3‑нҗи бап Харуның огуллары

¹ Реббиң Синай дагында Муса билен геплешен вагты Харуның ве Мусаның несиллери шуларды:

² Харуның дөрт оглы барды, оларың атлары шулардыр: Надап, Абыху, Элгазар ве Ытамар. Надап онуң новбахар оглуды.

³ Харуның огулларындан руханычылыга белленип, багыш эдиленлери шулардыр.

⁴ Эмма Надап билен Абыху Синай чөлүнде мукаддес болмадык оды Реббиң хузурында хөдүр эдендиклери үчин өлдүлер. Олардан зүрят галмады. Элгазар билен Ытамар болса аталары Харуның яшан дөврүнде руханы болуп хызмат этдилер.

Левилериң борчлары

⁵ Онсоң Реб Муса шейле дийди:

⁶ «Леви тиресини гетир-де, руханы Харуның хызматында гой, олар оңа көмек этсинлер.

⁷ Олар мукаддес чадырың хызматыны эдип, Харун ве тутуш халк үчин Реббе йүз тутулян чадырың горамак кешигини чексинлер.

⁸ Олар ысрайылларың хатырасына мукаддес чадырың хызматыны эдип, Реббе йүз тутулян чадырың әхли эсбапларына гөзегчилик этсинлер.

⁹ Левилери Харуның ве онуң несиллериниң ыгтыярына бер. Олар ысрайылларың арасындан Харуның ыгтыярына долы берлендир.

¹⁰ Харуны ве онуң огулларыны хасаба ал. Руханычылык везипесини диңе шолар ерине етирмелидирлер, олардан башга ким мукаддес чадыра голайлашса, онуң җезасы өлүмдир».

¹¹ Онсоң Реб Муса шейле дийди:

¹² «Мен левилери ысрайылларың новбахар огулларына дерек кабул эдип алдым. Левилер Мениңкидир,

¹³ чүнки новбахар огулларың бары Маңа дегишлидир. Мүсүрде новбахар огуллары өлдүрен гүнүм, Ысрайылда хайвану-ынсаның илкинҗи догланларының барыны Өзүме багыш этдим. Олар Мениңкидир. Мен Ребдирин».

Муса левилери хасаба аляр

¹⁴ Соңра Синай чөлүнде Реб Муса:

¹⁵ «Левилериң бир айлык ве ондан ёкары яшда болан эркек гөбеклилериниң хеммесини уругларына ве ковумларына гөрә язып хасаба ал» дийди.

¹⁶ Онсоң Муса Реббиң сөзүне гөрә олары өзүне буйрулышы ялы хасаба алды.

¹⁷ Леви огулларының атлары шулардыр: Гершон, Кохат, Мерары.

¹⁸ Уругларына гөрә Гершоның огулларының атлары шулардыр: Либни ве Шимги.

¹⁹ Уругларына гөрә Кохадың огуллары: Имран, Йисхар, Хеброн ве Узыел.

²⁰ Уругларына гөрә Мерарының огуллары: Махлы ве Мушы. Ковумларына гөрә леви уруглары шулардыр.

²¹ Гершондан либни ве шимги уруглары гелип чыкандыр, буларың икиси хем Гершоның уругларыдыр.

²² Оларың бир айлык ве ондан ёкары яшда болан эркек гөбеклилериниң саны еди мүң бәш йүз адам болды.

²³ Гершон уруглары мукаддес чадырың еңсесинде, гүнбатар гапдалында чадыр дикмелидилер.

²⁴ Гершон уругларының баштутаны Лаелиң оглы Элясапды.

²⁵ Гершон огуллары Реббе йүз тутулян чадыра дегишли гораг хызматларындан шулара: мукаддес чадырың ички ве дашкы өртүклерине, чадырың гирелгеси үчин япынҗа,

²⁶ хаядың перделерине, мукаддес чадырың ве гурбанлык сыпасының дашындакы хаядың дервезесиниң япынҗасына, онуң зынҗырларына ве булара дегишли әхли хызматлара җогапкәрдирлер.

²⁷ Кохатдан имрам, йисхар, хеброн, узыел уруглары гелип чыкандыр, буларың бары Кохадың уругларыдырлар.

²⁸ Буларың яшы бир айлык ве ондан ёкары болан эркек гөбеклилериниң саны секиз мүң алты йүз болды. Булар мукаддес затлары горамаклыга җогапкәрдирлер.

²⁹ Кохат уруглары мукаддес чадырың гүнорта гапдалында дүшлемелидилер.

³⁰ Кохат уругларының баштутаны Узыелиң оглы Элисапанды.

³¹ Олар гораг хызматларындан шулара: сандыга, хантагта, чырадана, гурбанлык сыпасына, мукаддес өйүң энҗамларына, япынҗа ве булара дегишли әхли хызматлара җогапкәрдирлер.

³² Руханы Харуның оглы Элгазар леви баштутанларының башлыгыды ве мукаддес затлара җогапкәрчилик чекйән левилериң үстүнден гараярды.

³³ Мерарыдан махлы ве мушы уруглары гелип чыкандыр. Буларың икиси хем Мерарының уругыдыр.

³⁴ Оларың бир айлык ве ондан ёкары яшда болан эркек гөбеклилериниң саны алты мүң ики йүз болды.

³⁵ Мерары уругларының баштутаны Абыхайыл оглы Сурыелди. Олар мукаддес чадырың демиргазык тарапында дүшлемелидилер.

³⁶ Мерары огуллары мукаддес чадыра дегишли гораг хызматларындан шулара: онуң чарчуваларына, таякларына, сүтүнлерине ве олары саклаян дабанлара, әхли эсбапларына ве булара дегишли әхли хызматлара җогапкәрдирлер.

³⁷ Шейле хем хаядың дашындакы сүтүнлериң дабанлары, газыклары ве зынҗырлары билен биле олара табшырылды.

³⁸ Муса билен Харуның ве онуң огулларының дүшелгеси гүндогар тарапда, Реббе йүз тутулян өйүң өңүнде, ягны мукаддес чадырың гирелгесиниң өңүнде болсун. Олар ысрайылларың хатырасына мукаддес өйи горамак кешигини чекерлер. Олардан башга ким муңа голайлашса, онуң җезасы өлүмдир.

³⁹ Реббиң буйругына гөрә, Муса билен Харуның уругларына гөрә хасаба алан, бир айлык ве ондан ёкары яшда болан левилериң эркек гөбеклилериниң саны йигрими ики мүң болды.

Ысрайылың новбахар огуллары ызына сатын алыняр

⁴⁰ Соңра Реб Муса шейле дийди: «Ысрайылың бир айлык ве ондан ёкары яшда болан әхли новбахар огулларыны екеме-еке сана ве язга гечир.

⁴¹ Оларың дерегине левилери Мен-Реб үчин кабул эт, оларың малларыны болса ысрайылларың илкинҗи доглан малларының өвезине кабул эт».

⁴² Шейдип, Муса Реббиң өзүне буйрушы ялы, ысрайылларың новбахар огулларының әхлисини хасаба алды.

⁴³ Атлары билен хасаба алнан бир айлык ве ондан ёкары яшда болан эркек гөбеклилериң җеми саны йигрими ики мүң ики йүз етмиш үч болды.

⁴⁴ Онсоң Реб Муса шейле дийди:

⁴⁵ «Ысрайылларың новбахар огулларының дерегине левилери, малларының дерегине болса левилериң малларыны кабул эт. Левилер Мениңкидир, Мен Ребдирин.

⁴⁶ Ысрайылың новбахар огуллары левилере гаранда ики йүз етмиш үч адам артыкмач болды. Олары сатын алмак үчин,

⁴⁷ адам башына мукаддес өйүң ресми өлчеги боюнча бәш шекел күмүш ал. Бир шекел ики мысгала деңдир.

⁴⁸ Левилериң санындан артыкмачлары сатын алмага төленен пулы Харуна ве онуң огулларына бер».

⁴⁹ Шейдип, Муса левилериң санындан артык боланларың өвезине төлег пулларыны алды.

⁵⁰ Ысрайылың новбахар огулларындан мукаддес өйүң ресми өлчеги билен ол бир пут күмүш алды.

⁵¹ Онсоң Реббиң буйруп айдышы ялы, Муса төлег пулларыны Харуна ве онуң огулларына берди.