Çölde 25 - Мукаддес Китап

25‑нҗи бап Ысрайыллар кесеки худайлара сыгыняр

¹ Ысрайыллар Шитимде яшаяркалар, моваплы аяллар билен зына этмәге башладылар.

² Ол аяллар ысрайыллары өз худайларына хөдүр эден гурбанлыкларына чагырярдылар. Ысрайыллар оларың гурбанлыкларындан ийип, оларың худайларына сежде эдйәрдилер.

³ Шейдип, ысрайыллар Багалпегор бутуна өзлерини багыш этдилер. Ысрайылларың гаршысына Реббиң гахары гелди.

⁴ Онсоң Реб Муса: «Реббиң гахар-газабы Ысрайылдан совлар ялы, халкың әхли ёлбашчыларыны гетирип, олары өлдүрип, Гүнүң астында сер» дийди.

⁵ Муса ысрайыл сердарларына: «Сизиң хер бириңиз өз адамларыңызың арасында Багалпегор бутуна сежде эдйәнлере гошулан хер кеси өлдүриң!» дийип буйрук берди.

⁶ Муса ве бүтин ысрайыл халкы Реббе йүз тутулян чадырың ишигинде аглашып дуркалар, бир ысрайыллы эркек киши оларың гөзүниң алнында бир мидянлы аялы өз машгаласына гетирди.

⁷ Муны гөрен Элгазарың оглы, руханы Харуның агтыгы Пинехас халкың арасындан чыкып, элине найза алды.

⁸ Ол ысрайыллының ызындан чадыра гирип, найзаны бирбада оларың икисиниң хем – ысрайыллының хем, мидянлы аялың хем гарнындан сокды. Шол бада ысрайыл халкының арасына иберилен гыргынчылык тогтадылды.

⁹ Эмма гыргынчылыкдан эййәм йигрими дөрт мүң ысрайыллы өлүпди.

¹⁰ Реб Муса шейле дийди:

¹¹ «Ысрайыл халкындан Мениң гахарымы Элгазарың оглы, руханы Харуның агтыгы Пинехас гайтарды, оларың арасында ол Маңа өзүниң хакыкы вепадардыгыны гөркезди. Шонуң үчин мен олары габанып, бүтинлей ёк этмедим.

¹² Шоңа гөрә хем оңа шуны айт: „Мен онуң билен парахатчылык әхтими баглашярын.

¹³ Пинехас өз Худайына вепадарлыгыны гөркезип, ысрайыллары гүнәсинден сапландыгы үчин, оңа ве онуң неслине руханылыгы мүдимилик багыш эдйәрин“».

¹⁴ Мидян аялы билен бирликде өлдүрилен ысрайыллының ады Салувың оглы Зимриди. Ол шимгон тире баштутанларының бириди.

¹⁵ Онуң билен биле өлдүрилен аялың ады болса Суруң гызы Козбыды. Сур мидян тиресиниң баштутанларының бириди.

¹⁶ Реб Муса шейле дийди:

¹⁷ «Мидянлары инди Ысрайылың душманы сайың, олары гырың!

¹⁸ Ине, оларың Пегорда эден ишлери: олар гыз доганлары, мидянлы тиребашының гызы Козбының үсти билен ысрайыллара дузак гурдулар. Сизе хиле салып, душман ялы дарашдылар. Пегора гыргынчылыгың гелмегиниң себәпкәри боланы үчин Козбы өлдүрилди».