Çölde 24 - Мукаддес Китап

24‑нҗи бап Билгама гелен үчүнҗи аянлык

¹ Билгам Реббиң ысрайыл халкыны ялкамакдан хошал боляндыгыны билди. Шонуң үчин хем ол өңкүси ялы палчылык эдип йөрмеди-де, гөни чөле тарап тутдурды.

² Билгам середип, ысрайыл халкының дүшелгеде тире-тире болуп отурандыгыны гөрди. Шол пурсат онуң үстүне Худайың Рухы инди.

³ Онсоң ол гелҗекден сөз ачып, шейле дийди: «Бегор оглы Билгам сөзлейәр, гөзи билен айдың гөрйән диййәр,

⁴ Худайың сөзлерини эшидйән, Гудратыгүйчлүден гөрнүш гөрйән, ере йүзин дүшүп, гөзүм билен айдың гөрйән.

⁵ Эй, Якуп, чадырларың не аҗап, эй, Ысрайыл дүшелгелериң не гөзел!

⁶ Гиң җүлгелер кимин узаляр. Деря кенарындакы баглар дей узалып, Реббиң экен хошбой ыслы агачлары дей, эдил сув боюнда битен кедрлер дей гөрүнйәр.

⁷ Ысрайыл мешигинден сувлар чогар. Тохумлары бол сув билен суварылар. Онуң патышасы Агакдан-да бейик болар. Патышалыгы болса хас-да бейгелер.

⁸ Худай олары Мүсүрден ябаны өкүзиң гүйҗи дей гүйч билен чыкаряр. Олар душман миллетлерини ийип, сүңклерини чейнәрлер, пейкам билен яраларлар.

⁹ Ысрайыл эдил арслан дей, эне шир дей ятар. Ким оны турузмага милт эдер? Чүнки Ысрайылы ялкан ялканар, нәлетлән нәлетленер».

¹⁰ Онсоң Баллагың калбында Билгама гаршы газап оды туташды. Ол эллерини шарпылдадып, бири-бирине уруп, Билгама шейле дийди: «Мен сени душманларыма нәлет окатмак үчин чагырыпдым, сен болсаң, эййәм үч гезек олара ак пата бердиң.

¹¹ Инди бу ерден гүм бол-да, өйүңе гит! Мен сени оңат сылаглаҗакдым, эмма Реб саңа хич бир сылагы рова гөрмеди».

¹² Онда Билгам Баллага: «Мен сениң ёллан адамларыңа:

¹³ „Баллак хатда өз өйүндәки алтын-күмшүң барыны берсе-де, мен Худайым Реббиң эмрини бозуп, өз эркиме оңат иш хем, эрбет иш хем эдип билмерин. Реб нәме дийсе, менем шоны гайталарын“ дийип айтманмыдым?

¹⁴ Ине, инди мен өз илиме гайтманкам, бу ысрайыл халкының гелҗек гүнлерде сениң халкыңа нәмелер этҗекдиги билен сени хабардар эдейин» дийди.

Билгама гелен дөрдүнҗи аянлык

¹⁵ Онсоң Билгам гелҗекден сөз ачып, шейле дийди: «Бегор оглы Билгам сөзлейәр, гөзи билен айдың гөрйән диййәр.

¹⁶ Худайың сөзлерини эшидйән, Бейик Худайдан билим алян, Гудратыгүйчлүден гөрнүш гөрйән, ере йүзин дүшүп, гөзүм билен айдың гөрйән.

¹⁷ Мен оны гөрйән, йөне хәзир дәл, оңа бакян, йөне якын дәл. Якубың неслинден йылдыз дөрәр. Ысрайылдан бир шалык хасасы гөтерилип, Мовабың маңлайыны ярар, Шислериң башыны мынҗырадар.

¹⁸ Эдом эеленилер, Сегир өз душманларының мүлкүне өврүлер. Ысрайыл болса хас кувватланар.

¹⁹ Якуп неслинден болан бири хөкүм сүрер, галада дири галанларың барыны гырар».

²⁰ Соңра ол амалеклере середип, сөзүни шейле довам этди: «Амалек миллетлериң найбашысыды, эмма онуң ызы мүдимилик йитер».

²¹ Онсоң ол кейнлере бакып, шейле дийди: «Сизиң месгениңиз ховпсуз ерде, ол гаяның депесиндәки хөвүртге дей амандыр.

²² Эмма, эй, Кейн, ашурлар сизи есир аланда, сиз янып ёк боларсыңыз».

²³ Билгам ене-де сөзүни довам эдип, шейле дийди: «Худай булары амал эденде, яшаҗак адамларың дат гүнүне!

²⁴ Эмма Китимден гәмилер гелип, Ашур билен Эбери гулчулыкда эзерлер, оларың ызы хем мүдимилик йитер».

²⁵ Шондан соң Билгам өйүне тарап ёла дүшди. Баллак хем өз ёлы билен гитди.