Çölde 23 - Мукаддес Китап

23‑нҗи бап Билгама гелен илкинҗи аянлык

¹ Онсоң Билгам Баллага: «Маңа шу ерде еди саны гурбанлык сыпасыны гур-да, еди өкүз билен еди саны гочы тайярлап гой» дийди.

² Баллак Билгамың айдышы ялы этди. Онсоң Баллак билен Билгам хер гурбанлык сыпасында бир өкүзи ве бир гочы гурбанлык бердилер.

³ Соңра Билгам Баллага: «Сен бу ерде өз якма гурбанлыгыңың янында дур, мен гидейин. Әхтимал, Реб маңа гөрнер ве Ол маңа нәме дийсе, мен оны саңа етирерин» дийип, ол депә чыкды.

⁴ Худай Билгам билен душушды ве Билгам Оңа: «Мен еди саны гурбанлык сыпасыны тайярладым ве оларың хер бириниң үстүнде бир өкүз билен бир гочы гурбанлык бердим» дийди.

⁵ Реб Билгамың агзына айтмалы сөзлерини салып: «Баллагың янына бар ве оңа шулары айт» дийди.

⁶ Билгам Баллагың янына гайтды. Баллак Мовабың әхли эмелдарлары билен өз якма гурбанлыкларының янында дурды.

⁷ Онсоң Билгам Худайдан гелен аянлыгы хабар берип, шейле дийди: «Мовап патышасы Баллак мени гүндогардакы даглардан, Сирия юрдундан гетирип, шейле дийди: „Гел, мениң үчин Якубы нәлетле, гел-де, Ысрайыла гарга!“

⁸ Худайың нәлетлемедигини мен нәдип нәлетләйин? Реббиң гаргамадыгына мен нәхили гаргайын?

⁹ Гаяларың депесинден мен Ысрайылы гөрйәрин. Байырлардан мен оңа бакып дурун. Ине, айры яшаян бир халкдыр ол, миллетлер арасында айры хасапланяр.

¹⁰ Якубың несиллерини ким санап билер? Ысрайылың дөртден бирини ким хасаплап билер? Маңа-да догручыл адамларың өлүши дек өлмәге, өмрүмиң ысрайылыңкы дей гутармагына ругсат эт!»

¹¹ Онсоң Баллак Билгама: «Сен мени нәдәйдиң? Душманларыма нәлет окасын дийип, сени йөрите шу ере гетиртдим. Сен болса олара хич зат этмән, гайтам, олары ялкаярсың!» дийди.

¹² Билгам оңа: «Мен диңе сересаплылык билен Реббиң агзыма салан сөзлерини айтмаярынмы нәме?» дийип җогап берди.

Билгама гелен икинҗи аянлык

¹³ Онсоң Баллак оңа: «Хайыш эдйәрин, мениң ызыма дүш, башга ере гидели, сен ол ерден оларың хеммесини дәл, бир бөлегини гөрерсиң. Мениң үчин олары шол ерден нәлетле» дийди.

¹⁴ Шейдип, Баллак Билгамы Зопым яйласына, Писга дагының депесине алып барды. Ол ерде еди саны гурбанлык сыпасыны гуруп, оларың херсиниң үстүнде бир өкүз билен бир гочы гурбанлык берди.

¹⁵ Билгам Баллага: «Мен ол ерде Реб билен душушянчам, сен шу ерде өз якма гурбанлыкларың янында дур» дийди.

¹⁶ Реб Билгама гөрүнди ве онуң агзына сөз салып: «Баллагың янына барып, шу затлары айт» дийди.

¹⁷ Билгам геленде, Баллак Мовабың эмелдарлары билен өз якма гурбанлыкларының янында дурды. Баллак ондан: «Реб нәме дийди?» дийип сорады.

¹⁸ Билгам инди болҗак затлардан хабар берип, шейле дийди: «Эй, Сипор оглы Баллак, оян-да, маңа гулак гой.

¹⁹ Худай ынсан дәл ахырын, ялан сөзләр ялы. Ол адам оглы дәл, пикирини үйтгедер ялы. Хей, Онуң берен вадасының, айдан сөзүниң битмедиги бармы?

²⁰ Ине, Ол маңа Ысрайылы ялка дийип эмр этди. Худайың Өзи ялканда, мен оны үйтгедип билмейәрин.

²¹ Мен Якуба хич хили бетбагтлык ёкдугыны, Ысрайылда бела-бетериң болмаҗагыны гөрйәрин. Ысрайыл Худайы Реб олар билендир. Олар Оны өз патышасы хөкмүнде алкышлаярлар.

²² Олары Мүсүрден чыкарян Худайдыр, ябаны өкүзиң гүйҗи дей гүйч билен чыкаряр.

²³ Якуба хич бир дога-җады тәсир этмез, Ысрайылың гаршысына тәлей гараның пейдасы ёкдур. Инди болса Ысрайыл ве Якуп хакда: „Гөр, Худайың эден затларыны!“ диерлер.

²⁴ Серет, халк шир дек оянып, арслан дей еринден туряр! Ол инди авуны ийип дойянча, өлдүренлериниң ганындан ганянча көшешмез».

²⁵ Онсоң Баллак Билгама: «Сен олары нәлетлеме-де, ялкама-да» дийди.

²⁶ Эмма Билгам Баллага: «„Реб маңа нәме дийсе, мен хем шоны айдарын“ дийип, саңа айтмадыммы нәме?» дийип җогап берди.

²⁷ Онсоң Баллак Билгама: «Йөр, мен сени башга бир ере әкидейин, белки сениң олары шол ерде нәлетлемегиң Худайың гөвнүне ярар» дийди.

²⁸ Онсоң Баллак Билгамы алып, чөле бакып дуран Пегор дагының депесине гетирди.

²⁹ Билгам Баллага: «Бу ерде еди саны гурбанлык сыпасыны гур-да, мениң үчин еди өкүз билен еди гоч тайярлап гой» дийди.

³⁰ Онсоң Баллак эдил Билгамың айдышы ялы эдип, хер бир гурбанлык сыпасының үстүнде бир өкүз билен бир гочы гурбанлык берди.