Çölde 22 - Мукаддес Китап

22‑нҗи бап Мовап патышасы Билгамы чагырдяр

¹ Ысрайыллар ёла дүшүп, Иордан дерясының боюнда, Ерихоның гаршысында ерлешйән Мовап дүзлүгинде дүшледилер.

² Ысрайылларың аморларың башына салан әхли ишлеринден Сипор оглы Баллагың хабары барды.

³ Моваплылар ысрайыл халкының көпдүгини гөренлеринде, җуда горкдулар. Шейдип, моваплылар ысрайыллар себәпли довла дүшдүлер.

⁴ Онсоң моваплылар Мидян яшулуларына шейле хабар ёлладылар: «Өкүзиң мейдандакы отлары ялмап-ювудышы ялы, бу гелйән мәхелле хем төверек-дашымыздакы затларың хеммесини ялмап-ювудар». Ол вагтлар Сипор оглы Баллак Мовабың патышасыды.

⁵ Баллак Бегор оглы Билгамы чагырмак үчин чапарлар ёллады. Билгам Евфрат дерясының боюнда, Петорда өз тохум-тиҗиниң арасында яшаярды. Баллак Билгама: «Мүсүрден бир халк чыкып гелип, бүтин ер йүзүне яйрады. Ине, инди олар мениң алкымыма дыкылып гелдилер.

⁶ Шонуң үчинем гелип, олары мениң хайрыма нәлетле. Чүнки олар менден гүйчли, белки шондан соң мен олары еңип, юртдан ковуп чыкарып билерин. Чүнки сениң ялканыңың ялканяндыгыны, нәлетләниңиң болса нәлетленйәндигини мен билйәрин» дийип хабар иберди.

⁷ Онсоң Мовабың ве Мидяның яшулулары эллерине нәлет үчин төлег хакыны алып, Билгамың янына гитдилер ве Баллагың хабарыны оңа етирдилер.

⁸ Билгам олара: «Гиҗәни шу ерде гечириң, Реб маңа нәме дийсе, мен оны сизе етирерин» дийди. Шейдип, моваплы эмелдарлар Билгамың янында галдылар.

⁹ Худай Билгама гөрнүп: «Сениң яныңдакы адамлар ким?» дийип сорады.

¹⁰ Билгам Худая шейле җогап берди: «Мовап патышасы Сипор оглы Баллак маңа шейле хабар иберди:

¹¹ „Мүсүрден бир халк чыкып, бүтин ер йүзүне яйрады. Сен гел-де, мениң хайрыма олары нәлетле, белки шондан соң мен оларың гаршысына сөвешип билерин ве ковуп чыкарарын“».

¹² Эмма Худай Билгама: «Сен булар билен гитме! Бу халкы нәлетлеме, чүнки ол халк ялканандыр!» дийди.

¹³ Билгам эртеси туруп, Баллагың эмелдарларына: «Өз юрдуңыза доланың, себәби Реб маңа сизиң билен гитмәге ругсат бермеди» дийди.

¹⁴ Онсоң моваплы эмелдарлар Баллагың янына доланып гелип, оңа: «Билгам бизиң билен гайтмага разы болмады» дийдилер.

¹⁵ Баллак болса инди өңкүлерден-де хас көп ве хас абрайлы эмелдарларыны иберди.

¹⁶ Олар гелип, Билгама шейле дийдилер: «Сипор оглы Баллак шейле диййәр: „Хайыш эдйәрин, мениң яныма гелмекден йүз өвүрмесене.

¹⁷ Чүнки мен сениң сылаг-серпайыңы етирип, гөвнүңиң ислән задыны битирерин. Сен диңе гел-де, мениң үчин шол халкы нәлетле“».

¹⁸ Билгам Баллагың адамларына шейле җогап берди: «Баллак хатда өз өйүндәки алтын-күмшүң барыны берсе-де, мен Худайым Реббиң эмрини бозуп, хич хили улы я-да кичи иш эдип билмерин.

¹⁹ Говусы сиз хем бу гиҗе шу ерде галың. Мен Реббиң маңа ене нәме дийҗегини билейин».

²⁰ Шол гиҗе Худай Билгама гөрнүп, оңа: «Эгер бу адамлар сени чагырмак үчин гелен болсалар, сен олар билен гит, йөне диңе Мениң айданларымы эдерсиң» дийди.

²¹ Онсоң Билгам эртеси ирден туруп, эшегини гаңңалады-да, моваплы эмелдарлар билен ёла дүшди.

Билгам, онуң эшеги ве перишде

²² Билгам эмелдарлар билен гиденинде, Худайың гахары гелди. Онсоң Реббиң перишдеси Билгама пәсгел бермек үчин, онуң ёлунда дурды. Билгам эшегини мүнүп барярды ве онуң ики хызматкәри-де янындады.

²³ Эшек эли сырылан гылычлы, ёлуң үстүнде дуран Реббиң перишдесини гөрен бадына ёлдан совлуп, атызың ичине тутдурды. Билгам болса эшеги ёла чыкарҗак болуп сайгыламага башлады.

²⁴ Онсоң Реббиң перишдеси үзүмчилигиң ичинден гечйән ики гапдалы дивар болан дараҗык ёданың угрунда пейда болды.

²⁵ Эшек Реббиң перишдесини гөрүп, дивара тарап гысылды. Билгамың аягы-да дивар билен аралыкда гысылып галды ве ол ене-де эшеги сайгылап башлады.

²⁶ Реббиң перишдеси ене өңе гидип, инди ёданың не сага, не-де чепе өврүлип болян дар еринде пейда болды.

²⁷ Эшек бу гезек Реббиң перишдесини гөрүп, Билгамың астында ашак чөкүп ятыберди. Муңа Билгамың гаты гахары гелип, хасасы билен ол җанавары урмага башлады.

²⁸ Онсоң Реб эшеге дил битирди ве эшек Билгама: «Мени үч гезек бейле енҗер ялы, мен саңа нәме этдим?» дийди.

²⁹ Билгам эшеге: «Себәби сен мени дәлиретдиң! Эгер элимде гылыч болсады, сени хәзириң өзүнде өлдүрердим!» дийип җогап берди.

³⁰ Шонда эшек Билгама: «Мен сениң бүтин өмрүңе мүнүп йөрен эшегиң дәлми нәме? Хей, мундан озал шейле гылык гөркезипмидим?» дийди. Билгам: «Ёк» дийип җогап берди.

³¹ Мундан соң Реб Билгамың гөзүни ачды. Ол эли сырылан гылычлы Реббиң перишдесиниң ёлда дурандыгыны гөрди. Билгам тагзым эдип, өзүни йүзинлигине ере гойберди.

³² Реббиң перишдеси оңа шейле дийди: «Нәме үчин сен эшегиңи үч гезек урдуң? Мен душман хөкмүнде саңа пәсгел бермек үчин чыкдым, себәби сен Мениң назарымда габахат ёлдан барярсың.

³³ Эшек Мени гөрди ве үч сапар Мениң өңүмден совулды. Эгер ол совулмадык болса, хакыкатдан хем Мен сени өлдүрердим, оны болса дири галдырардым».

³⁴ Онсоң Билгам Реббиң перишдесине: «Мен гүнә этдим, Сениң гаршымда ёлда дураныңы билмәндирин. Инди Сен эгер мениң гитмегими оңламаян болсаң, мен өйүме гайдайын» дийди.

³⁵ Реббиң перишдеси Билгама: «Бу адамлар билен гит, йөне диңе Мениң айт диен затларымы айдарсың» дийди. Онсоң Билгам Баллагың эмелдарлары билен гитди.

³⁶ Баллак Билгамың гелендигини эшиденде, оны гаршыламак үчин, Арнон җүлгесиниң голайында, серхедиң иң четки нокадында ерлешйән Мовабың Ар галасына гитди.

³⁷ Баллак Билгама: «Сени чагыртмак үчин адам ибермедимми?! Нәме үчин сен мениң яныма гелмедиң? Мегерем, өзүңе мынасып хеззет-хормат эдип билмез өйденсиң?» дийди.

³⁸ Билгам Баллага: «Ине, мен сениң яныңа гелдим! Менде нәме бир зат айтмага гүйч бармыдыр? Мен диңе Худайың агзыма салан сөзлерини сөзләрин» дийди.

³⁹ Онсоң Билгам Баллак билен ёла чыкып, Кирятхусота гелдилер.

⁴⁰ Баллак өкүзлери ве гоюнлары гурбанлык берип, олары Билгама ве онуң янындакы эмелдарларына иберди.

⁴¹ Эртеси гүн Баллак Билгамы алып, оны Бамотбагала гетирди. Ол ерден Билгам ысрайыл халкының бир бөлегини гөрүп билйәрди.