Çölde 21 - Мукаддес Китап

21‑нҗи бап Ысрайыллар аратлылары ёк эдйәр

¹ Негеп чөлүндәки Арат галасының кенган ханы ысрайылларың Атарым ёлундан гелйәндигини эшиденде, ол ысрайыллар билен уршуп, оларың бирнәчесини есир алды.

² Шонда ысрайыллар Реббе вада берип: «Эгер хакыкатдан хем бу халкы бизиң элимизе берсең, оларың галаларыны Саңа айры гойландыгы үчин бүтинлей ёк эдерис» дийдилер.

³ Реб ысрайыл халкының сесини эшитди ве кенганлары оларың элине берди. Ысрайыллар олары гырып, оларың галаларыны-да бүтинлей ёк этдилер. Шондан соң ол ере Хорма диен ат галды.

Бүрүнч йылан

⁴ Онсоң ысрайыллар Хор дагындан гөчүп, Эдом юрдуның дашындан айланып өтмек үчин, Гызыл деңзиң ёлы билен гитдилер. Эмма ёлда халк сабырсызлык этди.

⁵ Олар Худайың ве Мусаның гаршысына: «Бизи Мүсүрден чөлде гырылмагымыз үчин алып гайтдыңызмы? Бу ерде не чөрек, не-де сув бар. Бу тагамсыз иймитден-де халыс ирдик» дийдилер.

⁶ Реб муңа җогап эдип, халкың арасына зәхерли йыланлар иберди. Оларың зәхеринден ысрайыллардан көп адам өлди.

⁷ Халк Мусаның янына гелип: «Реббе ве саңа дил етирип, биз гүнә иш этдик. Йыланлары арамыздан айрар ялы, Ребден дилег эт» дийдилер. Муса халк үчин дилег этди.

⁸ Реб Муса: «Бир зәхерли йыланың шекилини яса ве оны узын сырыгың уҗуна беркит. Йылан чакан адам оңа середен бадына сагалар» дийди.

⁹ Онсоң Муса сап бүрүнчден йылан ясап, оны сырыгың уҗуна беркитди. Хер бир йылан чакан адам оңа середен бадына сагалып, дири галарды.

Моваба тарап йөриш

¹⁰ Ысрайыллар гөчдүлер ве гелип, Оботда дүшледилер.

¹¹ Соңра Оботдан гөчүп, Мовабың гүндогарындакы чөллүкде, Ией Абарымда дүшледилер.

¹² Ол ерден хем Зерет дересине гөчүп бардылар.

¹³ Ол ерден хем гөчүп, Арнон җүлгесиниң аңырсында, аморларың серхединден бәри яйылып ятан чөллүкде дүшледилер. Арнон җүлгеси Мовап билен Аморың арасындан гечйән Мовабың серхеди болуп хызмат эдйәрди.

^14-15 Шейдип, «Реббиң сөвешлери китабында» Супа үлкесиндәки Вахеп галасы хакында, Арнон дерелериниң япгытлары хакында, Мовабың серхединиң бойы билен Ар галасына ченли яйылян бу дерелериң япгытлары хакында хем ятланыляр.

¹⁶ Ысрайыллар ол ерден Беере, Реббиң Муса: «Халкы бир ере йыгна, олара сув берҗек» диен гуюсына тарап ёла дүшдүлер.

¹⁷ Шонда олар шу айдымы айтдылар: «Сувларың җошсун, эй, гуйы! Мунуң шанына айдым айдалың!

¹⁸ Патышалык хасасы билен, солтанлык найзасы билен, баштутанларың ачды бу гуйыны, халк шазадалары газды бу гуйыны». Олар чөллүкден Матана ченли,

¹⁹ Матанадан Нахалыеле ченли, Нахалыелден Бамота,

²⁰ Бамотдан болса чөлүң үстүне абанып дуран Писга дагының депеси билен Мовап топрагында ерлешйән җүлгә ченли гитдилер.

Ысрайыллар Сихон ханының ерлерини эелейәрлер

²¹ Соңра ысрайыллар аморларың ханы Сихона илчилер ёллап, шейле дийдилер:

²² «Бизе юрдуңызың ичинден гечип гитмәге ругсат бер. Биз экинлериң я үзүмчиликлериң ичине совулмарыс я-да гуюларыңыздан сув ичмерис. Биз тә сизиң юрдуңыздан чыкянчак, диңе шаёлдан йөрәрис».

²³ Эмма Сихон өз юрдуның ичинден гечип гитмәге ысрайыллара ругсат бермеди. Ол бүтин гошуныны йыгнап, ысрайылларың гаршысына чөле чыкды ве Яхаса гелип, олар билен сөвеше гирди.

²⁴ Ысрайыллар Сихоны гылычдан гечирип, онуң Арнондан Ябога ченли, тә Аммоның серхедине ченли болан ерлериниң барыны эеледилер. Аммоның серхеди болса гүйчли горалярды.

²⁵ Ысрайыллар аморларың галаларының хеммесини басып алдылар. Олар аморларың әхли галаларында, хатда Хешбонда ве онуң әхли обаларында орнашдылар.

²⁶ Хешбон галасы аморларың ханы Сихоның пайтагт галасыды. Сихон Мовабың өңки ханы билен уршуп, онуң Арнона ченли болан әхли ерлерини басып алыпды.

²⁷ Бу хакда багшылар шейле диййәрлер: «Хешбона гелиң, гой, ол гурулсын, гой, Сихон галасы дикелдилсин.

²⁸ Чүнки Хешбондан от, Сихоның галасындан ялын чыкды. Мовабың Ар галасыны ялын гуршады, Арнон депелерини-де, ювутды ол.

²⁹ Вай, саңа, эй, Мовап! Сиз хеләк болдуңыз, эй, Кемош халкы! Огулларыңыз босгунлара өврүлди, гызларыңыз амор ханы Сихоның есири болдулар.

³⁰ Шейдип, биз олары ер билен егсан этдик. Хешбондан Дибона барянчак гырылдылар. Мейдеба узалян Нопа ченли олары ёк этдик».

³¹ Шунлукда, ысрайыллар аморларың юрдунда орнашдылар.

³² Муса Язер галасыны гөзден гечирмек үчин, ичалылар угратды. Соңра ысрайыллар онуң төверегиндәки обалары басып алдылар ве ол ердәки аморлары ковуп чыкардылар.

Ысрайыллар Ог ханың юрдуны эелейәрлер

³³ Соңра ысрайыллар Башан юрдуна тарап ёлуны довам этдирдилер. Башан ханы Ог ысрайыллар билен сөвешмек үчин, Эдрей галасында әхли уршуҗылары билен оларың гаршысына чыкды.

³⁴ Реб Муса: «Мен Огы, онуң әхли халкыны ве юрдуны сениң элиңе бердим. Ондан горкма. Хешбонда ханлык сүрен амор ханы Сихоны ёк эдишиң ялы, Огы хем ёк эт» дийди.

³⁵ Ысрайыллар Огы, онуң огулларыны ве бүтин гошуныны екеҗе адам гойман гырып, онуң юрдуны эеледилер.