Çölde 19 - Мукаддес Китап

19-нҗы бап Тәмизлейиш сувы

¹ Реб Муса билен Харуна шейле дийди:

² «Реббиң буйран канунындакы парз шудур: ысрайыллар сизе гурат, шикессиз, бойнуна боюнтырык салынмадык бир гызыл сыгыр гетирсинлер.

³ Оны сиз руханы Элгазара берерсиңиз. Сыгры Ысрайыл дүшелгесиниң дашына алып чыкып, Элгазарың өңүнде сойсунлар.

⁴ Руханы Элгазар онуң ганына бармагыны батырып, Реббе йүз тутулян чадырың өңүне тарап еди гезек сепелесин.

⁵ Соңра сыгыр дериси, эти, ганы ве ичгошы билен билеликде Элгазарың гөзүниң алнында якылсын.

⁶ Руханы бир бөлек кедр агаҗыны, кәкилик отуны, гызыл реңкли сапак алсын-да, олары сыгры якып дуран ода атсын.

⁷ Онсоң руханы гейимлерини ювсун ве сува дүшсүн, шондан соң ол Ысрайыл дүшелгесине гирип билер. Эмма ол агшама ченли харамдыр.

⁸ Сыгры ода якан адам хем гейимлерини ювсун ве сува дүшсүн. Ол хем агшама ченли харамдыр.

⁹ Онсоң сыгрың күлүни тәмиз адамларың бири йыгнап алып, дүшелгәңизиң дашында халал ерде гойсун. Бу күл ысрайыл халкы үчиндир, ол тәмизлик сувы үчин саклансын. Бу гүнә гурбанлыгының бир гөрнүшидир.

¹⁰ Сыгрың күлүни йыгнан адам гейимлерини ювсун, ол агшама ченли харамдыр. Бу ысрайыллар үчин ве оларың арасында яшаян гелмишеклер үчин эбедилик дүзгүндир.

¹¹ Җеседе деген киши еди гүнләп харамдыр.

¹² Үчүнҗи ве единҗи гүнлерде ол өзүни тәмизлик сувы билен тәмизлесин, шонда ол тәмизленер. Эмма ол өзүни үчүнҗи ве единҗи гүнлерде тәмизлемесе, тәмиз болмаз.

¹³ Җеседе галташандан соң, өзүни тәмизлемедик адам Реббиң мукаддес чадырыны харам эдер. Бейле адам Ысрайылдан ковлуп чыкарылсын. Онуң үстүне тәмизлик сувы сепилмәндир, шонуң үчин ол харамлыгына галыпдыр, онуң харамлыгы энтегем онуң бойнундадыр.

¹⁴ Эгер чадырда бири өлсе, шу када уланылсын: чадырың ичиндәки ве шол вагт чадыра гирен хер бир адам еди гүн харам хасаплансын.

¹⁵ Чадырың ичиндәки агзы ачык болан хемме гаплары харам болар.

¹⁶ Эгер кимде-ким мейданда гылычдан өлен я өз аҗалына өлен адамың җеседине, я-да адам сүңкүне я мазарына галташса, ол еди гүн харам сайылар.

¹⁷ Харам сайылан адам үчин якылан гүнә гурбанлыгының күлүнден бир габа салып, онуң үстүне чешме сувуны гуюң.

¹⁸ Онсоң тәмиз адамлардан бири кәкилик отуны сува батырып, чадырың, онуң ичиндәки эсбапларың үстүне сепелесин. Шейле-де ол ердәки адамларың ве мейданда гылычдан өлен я өз аҗалына өлен адамың җеседине, я-да адам сүңкүне я мазарына галташан кишиниң үстүне сепелесин.

¹⁹ Тәмиз адам харам кишилериң үстүне сувы үчүнҗи ве единҗи гүнлер сепелесин. Единҗи гүн олар тәмизленерлер. Соңра олар гейимлерини ювсунлар ве сува дүшсүнлер, агшама ченли олар тәмизленерлер.

²⁰ Эмма харам болубам өзүни тәмизлемейәнлер җемагатың арасындан ковлуп чыкарылсын. Чүнки олар Реббиң мукаддес өйүни харам эдендирлер. Оларың үстүне тәмизлик сувуның сепилмәндиги үчин, олар харамдырлар.

²¹ Бу олар үчин эбедилик дүзгүн болсун. Тәмизлик сувуны сепйән адам гейимлерини ювсун. Тәмизлик сувуны эллән адам агшама ченли харамдыр.

²² Харам адамың хер бир эллән зады-да харам болар. Харам адамы эллән киши-де агшама ченли харамдыр».