Çölde 17 - Мукаддес Китап

17‑нҗи бап Харуның хасасы

¹ Реб Муса шейле дийди:

² «Ысрайыллара өз тире баштутанларының хеммесинден, ягны хер тиреден бир хаса – җеми он ики хаса йыгнап, олары саңа гетирип бермеклерини табшыр. Оларың херсиниң атларыны өз хасаларына язып гой.

³ Харуның адыны левилериң хасасына яз. Чүнки хер тире баштутаны үчин бир хаса болмалыдыр.

⁴ Хасалары гетирип, сизиң билен душушян ерим болан Маңа йүз тутулян чадырдакы Әхт сандыгының өңүнде гой.

⁵ Мениң сайлан адамымың хасасы гөгерер, шейдип, Мен ысрайылларың сизден нәразылыкларының соңуна чыкарын».

⁶ Муса Реббиң сөзлерини ысрайыллара етирди. Оларың тире баштутанларының хеммеси хасаларыны, хер тире үчин бир хасаны – җеми он ики хасаны Муса бердилер. Харуның хасасы-да шоларың арасындады.

⁷ Онсоң Муса хасаны гетирип, Реббиң хузурында әхт чадырында гойды.

⁸ Эртеси гүн Муса әхт чадырына гирди, гөрсе, ине, леви тиресиниң берен, Харуның ады язылан хасасы, хакыкатданам, гөгерен экен. Онда пынтыклар, гүллер ве етишен бадамлар барды.

⁹ Онсоң Муса хасалары Реббиң хузурындан алып, әхли ысрайылларың өңүне чыкарды. Олар бу ахвалата сын этдилер ве хер ким өз хасасыны алды.

¹⁰ Реб Муса шейле дийди: «Харуның хасасыны ызына гетирип, Әхт сандыгының өңүнде гой. Ол питнечилер үчин дуйдурыш аламаты хөкмүнде сакланар. Шейдип, сен оларың Менден нәразы болмакларының соңуна чыкарсың, ёгсам олар өлерлер».

¹¹ Муса хемме зады эдил Реббиң буйрушы ялы этди.

¹² Ысрайыллар Муса: «Онда бизиң ишимиз гайдыпдыр! Бизиң барымыз хеләк боларыс!

¹³ Ким Реббиң мукаддес чадырына голайлашса, ол өлер. Шейдип, инди бизиң хеммәмиз гырлаймалымы?» дийдилер.