Çölde 15 - Мукаддес Китап

15‑нҗи бап Садакалар хакда

¹ Реб Муса шейле дийди:

² «Ысрайыллара айт, месген тутмагыңыз үчин Мениң сизе берйән юрдума гирениңизде,

³ гара малы я гоюн-гечини Реббе от үсти билен хөдүр эдип, ондан айдылан я-да мейлетин садака хөкмүнде берениңизде ве беллемели байрамларыңызда эдилиши ялы, якма гурбанлык я-да башга гурбанлык берениңизде, оларың якымлы ысы Реббе хош якяр.

⁴ Шу хили садаканы берен адам онуң яны билен бир күйзе зейтун ягына югрулан, бир батманың ондан бири мөчбериндәки сайлама бугдай унундан галла садакасыны хем берсин.

⁵ Мундан башга-да, сиз якма гурбанлык я-да башга гурбанлык билен билеликде хер бир токлының яны билен ичги садакасы хөкмүнде бир күйзе шерабы хөдүрләң.

⁶ Гочуң яны билен бир ярым күйзе зейтун ягына югрулан, бир батманың ондан ики мөчбериндәки сайлама бугдай унундан галла садакасыны бериң.

⁷ Реббе якымлы ыслы ичги садакасы хөкмүнде бир ярым күйзе шерабы хөдүр эдиң.

⁸ Реббе якма гурбанлык я башга гурбанлык, айдылан садака я-да саламатлык гурбанлыгы хөкмүнде өкүз хөдүр этсеңиз,

⁹ онда өкүз билен бирликде ики күйзе зейтун ягына югрулан, бир батманың ондан үч мөчбериндәки сайлама бугдай унундан галла садакасыны хөдүр эдиң.

¹⁰ Ичги садакасы хөкмүнде ики күйзе шерабы хөдүр эдиң. От үсти билен берилйән бу садаканың якымлы ысы Реббе хош якяр.

¹¹ Хер бир өкүзи, гочы, эркек токлыны я-да овлагы садака берениңизде шейле эдиң.

¹² Садака берилйән малларың санына гөрә онуң яны билен берилйән садаканың хем мукдары артдырылсын.

¹³ Аслы ысрайыл болан хер бир адам от үсти билен Реббе якымлы ыслы садака беренинде, шу айдыланлары берҗай этсин.

¹⁴ Араңызда мыдамалык я-да вагтлайын яшаян гелмишеклерден бири от үсти билен Реббе якымлы ыслы садака бермекчи болса, ол хем шу кадалары берҗай этсин.

¹⁵ Эй, җемагат, сизиң үчинем, араңызда яшаян гелмишеклер үчинем дүзгүн бирдир. Бу сизиң гелҗекки несиллериңизе-де эбедилик дүзгүн болсун. Реббиң өңүнде сиз хем, гелмишек хем деңдир.

¹⁶ Сизе-де, араңызда яшаян гелмишеклере-де када-канунлар бирмеңзешдир».

¹⁷ Реб Муса шейле дийди:

¹⁸ «Ысрайыллара айт, Мениң сизи алып барян юрдума гирениңизден соң,

¹⁹ шол топрагың чөрегинден иениңизде, сиз ондан Реббе садака берерсиңиз.

²⁰ Илкинҗи югран хамырыңыздан бир чөреги эдил хармандан садака бершиңиз ялы эдип хөдүр эдиң.

²¹ Илкинҗи хамырдан Реббе берйән бу садакаңыз несиллер бойы довам этсин.

^22-23 Эгер сиз төтәнликде ялңышып, Реббиң Муса айдан бу буйрукларыны – Реббиң Муса аркалы сизе буйран әхли табшырыкларыны Реббиң буйран гүнүнден башлап, тә соңкы несиллериңизе ченли берҗай этмесеңиз

²⁴ ве бу сәвлиги халк төтәнликде гойберен болса, онда бүтин халк бир өкүзчәни Реббе якымлы ыслы якма гурбанлыгы хөкмүнде хөдүр этсин. Онуң яны билен дүзгүне гөрә галла ве ичги садакасыны берсинлер хем-де бир текәни гүнә гурбанлыгы хөкмүнде хөдүр этсинлер.

²⁵ Руханы бүтин ысрайыл халкыны гүнәсинден сапласын, шонда оларың гүнәси гечилер. Чүнки халк төтәнликден гүнә этди ве олар өз садакаларыны Реббе от үсти билен берилйән садака хөкмүнде хөдүр этдилер. Өз ялңышлыклары үчин Реббе гүнә гурбанлыгыны бердилер.

²⁶ Бүтин ысрайыл халкының хем, оларың арасындакы гелмишеклериң хем гүнәси гечилер, чүнки халк төтәнликден гүнә газанды.

²⁷ Эгер бир киши төтәнликден гүнә этсе, гой, ол гүнә гурбанлыгы үчин биряшар уркачы чебши хөдүр этсин.

²⁸ Руханы Реббиң хузурында ялңышып гүнә эдени гүнәсинден сапласын, онуң гүнәси гечилер.

²⁹ Төтәнликде гүнә эдип, араңызда яшаян аслы ысрайыл болан үчин хем, гелмишек үчин хем бир канун болсун.

³⁰ Эмма аслы ысрайыл болан бири я-да гелмишеклерден бири текепбирлик билен гүнә иш эдип, Реббе дил етирсе, халкың арасындан ковлуп чыкарылсын.

³¹ Реббиң сөзүни әсгермән, Онуң табшырыгыны бозандыгы үчин, бейле адам бүтинлей ковлуп чыкарылсын, өз җезасыны чексин».

Сабат гүни ишлән адам өлдүрилйәр

^32-33 Ысрайыллар чөлдекәлер, Сабат гүни олар одун йыгып йөрен адамы гөрдүлер ве олар оны тутуп, Муса билен Харуның ве бүтин җемагатың хузурына гетирдилер.

³⁴ Оңа нәме эдилмелидиги энтек белли болмансоң, олар оны туссаг астына алдылар.

³⁵ Онсоң Реб Муса: «Ол адам өлүме хөкүм эдилсин. Оны Ысрайыл дүшелгесиниң дашына чыкарып, бүтин җемагат дашлап өлдүрсин» дийди.

³⁶ Дүшелгәниң дашына чыкарып, эдил Реббиң Муса буйрушы ялы, бүтин халк оны дашлап өлдүрди.

Гейимлердәки готазлар

³⁷ Реб Муса шейле дийди:

³⁸ «Ысрайыллара айт, олар несилден-несле гейимлериниң этегиниң хер бурчуна готазҗык тиксинлер ве хер бир готазҗыга гөк йүплүк гошсунлар.

³⁹ Хер гезек готазҗыклара гөзүңиз дүшенде, сиз Реббиң әхли табшырыкларыны яда саларсыңыз ве олары берҗай эдерсиңиз, йүрегиңизиң ве гөзлериңизиң ислегине ковалашмарсыңыз.

⁴⁰ Шейдип, Мениң әхли табшырыкларымы ятда саклап, олары берҗай эдерсиңиз ве өз Реббиңиз үчин мукаддес боларсыңыз.

⁴¹ Худайыңыз Реб Мендирин, Мен сизи Мүсүрден сизиң Худайыңыз болмак үчин алып чыкдым. Худайыңыз Реб Мендирин!»