Çölde 13 - Мукаддес Китап

13‑нҗи бап Муса Кенгана ичалылар иберйәр

¹ Шондан соң халк Хасеротдан гөчүп гайдып, Паран чөлүнде дүшелге гурды.

² Реб Муса шейле дийди:

³ «Мениң ысрайыллара берйән Кенган юрдумы сынламак үчин, тирелериң херсинден бир сердары ичалы эдип, ол ере ибер».

⁴ Муса Реббиң буйругы билен Паран чөлүнден адамлары угратды. Оларың хеммеси ысрайыл сердарларыды.

⁵ Оларың атлары шулардыр: рубен тиресинден Закурың оглы Шаммува;

⁶ шимгон тиресинден Хорының оглы Шапат;

⁷ яхуда тиресинден Епуннәниң оглы Калеп;

⁸ ысакар тиресинден Юсубың оглы Йыгал;

⁹ эфрайым тиресинден Нунуң оглы Хошея;

¹⁰ бенямин тиресинден Рапувың оглы Палты;

¹¹ зебулун тиресинден Содының оглы Гадыел;

¹² юсуп тиресинден, ягны манаша тиресинден Сусының оглы Гады;

¹³ дан тиресинден Гемаллының оглы Эмиел;

¹⁴ ашер тиресинден Микайылың оглы Сетур;

¹⁵ нафталы тиресинден Вопсының оглы Нахбы;

¹⁶ гат тиресинден Макының оглы Гевувал.

¹⁷ Юрды гөзден гечирмек үчин, Мусаның иберен адамлары шулардыр. Муса Нунуң оглы Хошея Ешува адыны берди.

¹⁸ Муса олары Кенган юрдуны гөзден гечирмек үчин уграданда, шейле дийди: «Мундан гөни Негебе гидип, даглыга чыкың.

¹⁹ Юрдуң нәхилидигини сынлаң. Ол ерде яшаян халк гүйчлүми я эҗиз, көплүкми я азлык?

²⁰ Оларың яшаян ери говумы я-да эрбет? Олар галаларда яшаярмы я-да ачык мейданда?

²¹ Мес топраклымы я аррык, агачлымы, агачсыз? Батыргай херекет эдиң ве ол юрдуң мивелеринден гетириң». Ол вагтлар үзүмлериң етишйән мөвсүмиди.

²² Шейдип, олар ёла дүшдүлер ве Син чөлүнден тә Лебохамадың голайындакы Рехоп галасына ченли болан ерлери гөзден гечирдилер.

²³ Олар Негебе чыкдылар ве Хеброна гелдилер. Ол ерде Ахыман, Шешай ве Талмай уруглары хем яшапды. Олар Анагың несиллериди. (Хеброн Мүсүрдәки Зоган галасындан еди йыл өң гурлупды.)

²⁴ Олар Эшкол дересине баранларында ол ерден бир салкым үзүми шахасы билен биле кесип алдылар ве оны ики адам болуп таякдан асып гөтердилер. Олар аз-овлак нар билен инҗир хем алдылар.

²⁵ Ысрайылларың кесен үзүм салкымларындан соң, ол ере Эшкол дереси диен ат галды.

Ичалыларың гетирен хабары

²⁶ Олар юрды кырк гүнләп сынлансоңлар, ызларына гайтдылар.

²⁷ Олар Паран чөлүндәки Кадеше, Муса билен Харуның ве бүтин ысрайыл җемагатының янына гайдып гелдилер. Олар тутуш җемагата гөрүп-эшиденлерини хабар берип, ол ерден гетирен мивелерини гөркездилер.

²⁸ Олар Муса шейле дийдилер: «Биз сениң иберен юрдуңа бардык. Ол ерде, хакыкатданам, сүйт ве бал акяр, ине, булар хем шол ериң мивелеринден.

²⁹ Эмма ол ерде яшаян халк бичак гүйчли экен. Оларың галалары берк диварлы ве өрән улы. Хатда ол ерде биз Анагың несиллерини-де гөрдүк.

³⁰ Негеп үлкесинде амалеклер, даглык ерлерде хетлер, ябуслар, аморлар, деңиз якасында ве Иордан дерясының боюнда болса кенганлар яшаян экенлер».

³¹ Эмма Калеп Мусаның өңүнде дуран халкың сесини кесип: «Деррев гиделиң-де, ол юрды басып алалың, чүнки олары еңмәге бизиң хөкман гүйҗүмиз етер» дийди.

³² Онуң билен гиден адамлар болса: «Биз ол халкың гаршысына чыкып билмерис, чүнки олар бизден хас гүйчли» дийдилер.

³³ Шейлеликде, олар гөрүп гелен юрды хакында ысрайыллара якымсыз затлар айдып, шейле дийдилер: «Бизиң сынламак үчин ичинден гечен юрдумыз өз илатыны өзи ийип йөрен юрт экен. Ол ерде яшаян адамларың хеммеси гаты ири адамлар экен.

³⁴ Биз ол ерде нефиллери (анаклар нефиллериң несиллеридир) гөрдүк. Оларың янында өзүмизи эдил чекиртге ялы дуйдук. Олара-да биз чекиртге ялыҗак болуп гөрүндик».