Çölde 12 - Мукаддес Китап

12‑нҗи бап Меръемиң ве Харуның гөриплиги

¹ Меръем билен Харун Мусаның эфиопиялы аяла өйленендиги үчин язгардылар. (Хакыкатданам Мусаның икинҗи аялы Эфиопияданды.)

² Олар: «Реб диңе бир Муса билен геплешмән, бизиң биленем геплешди ахырын» дийдилер. Реб оларың бу диенлерини эшитди.

³ Муса җуда кичигөвүнли адамды, бейле адам ер йүзүнде башга ёкды.

⁴ Бирденкә Реб Муса, Харуна ве Меръеме: «Үчиңизем Маңа йүз тутулян чадыра гелиң» дийди. Онсоң оларың үчүси-де ол ере гитдилер.

⁵ Реб булут сүтүни гөрнүшинде ашак инди ве чадырың гирелгесинде дуруп, Харун билен Меръеми чагырды. Олар өңе чыкдылар.

⁶ Реб олара шейле дийди: «Мениң сөзлериме гулак салың: „Эгер араңызда пыгамберлер бар болса, Мен-Реб гөрнүшлерде Өзүми аян эдип, Олар билен дүйшде геплешйәрин.

⁷ Йөне гулум Муса билен бейле дәлдир, Ол тутуш халкымың садык ёлбашчысыдыр.

⁸ Мен онуң билен сырлы дәл-де, ачык, йүзбе-йүз геплешйәрин. Хатда ол Мен Реббиң кешбини-де гөрйәр. Сиз нәме үчин гулум Мусаның йүзүне гелмәге горкмадыңыз?“»

⁹ Олара гаршы Реббиң гахары гелди ве Реб ол ерден гитди.

¹⁰ Булут чадырың депесинден сырыланда, Меръем дери кеселине учрап, ак гар ялы пис ачды. Харун Меръеме тарап середип, онуң дери кеселине учрандыгыны гөрди.

¹¹ Онсоң Харун Муса: «Җенабым, акмаклык эдип газанан гүнәмиз үчин бизи җезаландырма.

¹² Меръемиң бедени ярысы чүйрән халда энеден өли доглан чаганыңка меңземесин» дийди.

¹³ Онсоң Муса Реббе перят эдип: «Эй, Худайым, оңа шыпа бер» дийип ялбарды.

¹⁴ Эмма Реб Муса: «Эгер атасы онуң йүзүне түйкүрен болсады, ол еди гүнләп утанчлы халда болмазмыды? Гой, ол еди гүнләп дүшелгәниң дашында болсун. Ол соңра ене дүшелгә гирип билер» дийип җогап берди.

¹⁵ Шейдип, Меръем еди гүнләп дүшелгәниң дашында сакланылды. Ол дүшелгә гиризилйәнчә, халк ол ерден гөчмеди.