Çölde 10 - Мукаддес Китап

10-нҗы бап Күмүш сурнайлар

¹ Реб Муса шейле дийди:

² «Өзүңе дөвме сап күмүшден ики саны сурнай яса. Олары җемагаты чагырмак ве дүшелгелери гөчүрмек үчин уланарсың.

³ Ики сурнай дең чалнанда, бүтин җемагат сениң яныңа, Реббе йүз тутулян чадырың гирелгесине йыгнансын.

⁴ Эгер сурнайларың бири чалынса, онда ысрайыл ёлбашчылары, ягны тире баштутанлары сениң яныңа йыгнансынлар.

⁵ Сурнай гысга-гысга чалынса, гүндогар тарапдакы дүшелгелер ёла чыксын.

⁶ Сурнай икинҗи гезек гысга чалынса, онда гүнорта тарапдакы дүшелгелер ёла дүшсүн. Дүшелгәниң гөчмелидигини аңладян сурнай гысга чалынсын.

⁷ Эмма җемагаты йыгнамак герек боланда, сурнай узак чалынсын, гысга чалынмасын.

⁸ Сурнайлары руханы Харуның огуллары чалсынлар. Бу сизиң ве гелҗекки несиллериңиз үчин эбедилик дүзгүн болсун.

⁹ Юрдуңызда сизиң үстүңизе чозан душмана гаршы сөвеше чыканыңызда, сурнайлар билен сөвеш сазыны чалың. Шонда Худайыңыз Реб сизи ятлар ве душманларыңыздан халас эдер.

¹⁰ Шат гүнүңизде, беллемели байрамларыңызда ве хер айың башында, якма ве саламатлык гурбанлыгыңызың башында сурнайлары чалың. Олар сизиң Худайыңыз Реббиң хузурында ятланмагыңыз үчин хызмат эдер. Худайыңыз Реб Мендирин».

Ысрайыллар Синай дагындан гидйәрлер

¹¹ Ысрайылларың Мүсүрден чыканларындан соңкы икинҗи йылың икинҗи айында, айың йигримиси гүни мукаддес әхт чадырының депесинден булут гөтерилди.

¹² Ысрайыллар гөчмәге тайярланып, Синай чөлүнден чыкып уградылар. Булут Паран чөлүне гелип дурды.

¹³ Олар илкинҗи гезек Реббиң Муса аркалы берен буйругы билен ёла дүшдүлер.

¹⁴ Яхудаларың дүшелгеси топар-топар болуп, өз тугы астында илкинҗи болуп ёла дүшди. Бу тутуш топара Эминадабың оглы Нахшон баштутанлык эдйәрди.

¹⁵ Ысакар тиресиниң топарына Сугарың оглы Нетанел баштутанлык эдйәрди.

¹⁶ Зебулун тиресиниң топарына Хелоның оглы Элияп баштутанлык эдйәрди.

¹⁷ Онсоң мукаддес чадыр сөкүлди ве оны гөтерйән гершонлар билен мерарылар ёла дүшдүлер.

¹⁸ Соңра рубенлериң дүшелгеси топар-топар болуп, өз тугы астында ёла дүшди. Бу тутуш топара Шедеюрың оглы Элисур баштутанлык эдйәрди.

¹⁹ Шимгон тиресиниң топарына Сурышадайың оглы Шелумыел баштутанлык эдйәрди.

²⁰ Гат тиресиниң топарына болса Дегувалың оглы Элясап баштутанлык эдйәрди.

²¹ Соңра мукаддес затлары гөтерйән кохатлар ёла дүшдүлер. Булар барып етйәнчә, гершонлар ве мерарылар мукаддес чадыры дикердилер.

²² Соңра эфрайымларың дүшелгеси топар-топар болуп, өз тугы астында ёла дүшдүлер. Бу тутуш топара Эмихудың оглы Элишама баштутанлык эдйәрди.

²³ Манаша тиресиниң топарына Педахсурың оглы Гамлыел баштутанлык эдйәрди.

²⁴ Бенямин тиресиниң топарына болса Гидгонының оглы Абыдан баштутанлык эдйәрди.

²⁵ Иң соңунда дүшелгелериң ызкы горагы хөкмүнде данларың дүшелгеси топар-топар болуп, өз тугы астында ёла дүшди. Бу тутуш топара Эмишадайың оглы Ахыгезер баштутанлык эдйәрди.

²⁶ Ашер тиресиниң топарына Окраның оглы Пагыел баштутанлык эдйәрди.

²⁷ Нафталы тиресиниң топарына болса Эйнаның оглы Ахура баштутанлык эдйәрди.

²⁸ Ысрайыллар гөченлеринде топар-топар болуп, шу тертипде гидердилер.

²⁹ Муса гайынатасы мидянлы Регувалың оглы Хобаба: «Биз Реббиң „сизе берҗек“ диен ерине тарап ёла дүшйәрис. Йөр, бизиң билен гит, биз саңа ягшылык эдерис. Чүнки Реб Ысрайыла ягшылык этҗекдигини вада берди» дийди.

³⁰ Эмма Хобап оңа: «Ёк, мен гитҗек дәл. Мен өз юрдума, гарындашларымың янына гитҗек» дийди.

³¹ Муса оңа: «Бизи ташлап гитме! Чүнки чөлде дүшлеҗек ерлеримизи сен говы билйәрсиң, бизе ёлбелетчилик эт.

³² Эгер бизиң билен гитсең, Реббиң бизе этҗек ягшылыкларыны сениң билен пайлашарыс» дийди.

³³ Онсоң ысрайыллар Реббиң дагындан гайдып, үч гүн йөредилер. Оларың дүшлеҗек ерини тапмак үчин, Реббиң Әхт сандыгы хем ёлуң бүтин довамында оларың өңүнден барярды.

³⁴ Дүшелгеден чыкып угранлары бәри Реббиң булуды гүндиз оларың үстүндеди.

³⁵ Хер сапар Әхт сандыгы ёла дүшенде, Муса шейле диерди: «Галкын, эй, Реб! Гой, душманларың даргасын, сени йигренйәнлер Сениң өңүңден гачсын».

³⁶ Әхт сандыгы саклананда болса ол шейле диерди: «Эй, Реб, мүңлерче ысрайыл ковумларына сары өврүл!»