Çölde 1 - Мукаддес Китап

1‑нҗи бап Муса ысрайыллары хасаба аляр

¹ Реб Синай чөлүнде ысрайыл халкының Мүсүрден чыканының икинҗи йылының икинҗи айының биринҗи гүни Өзүне йүз тутулян чадырың ичинде Муса шейле дийди:

² «Уругларына ве ковумларына гөрә бүтин ысрайыл халкының хер бир эркегини екеме-еке хасаба ал.

³ Яшы йигрими ве ондан ёкары болан ысрайыл гошунында сөвеше укыплы хемме адамы Харун икиңиз топар-топар эдип, язып хасаба алмалысыңыз.

⁴ Яныңызда хер тиреден бир адам, ягны өз уругының баштутаны болсун.

⁵ Сизе көмек этмели адамлар шулардыр: Рубен тиресинден Шедеюрың оглы Элисур;

⁶ шимгон тиресинден Сурышадайың оглы Шелумыел;

⁷ яхуда тиресинден Эминадабың оглы Нахшон;

⁸ ысакар тиресинден Сугарың оглы Нетанел;

⁹ зебулун тиресинден Хелоның оглы Элияп.

¹⁰ Юсубың огулларындан: эфрайым тиресинден Эмихудың оглы Элишама; манаша тиресинден Педахсурың оглы Гамлыел.

¹¹ Бенямин тиресинден Гидгонының оглы Абыдан;

¹² дан тиресинден Эмишадайың оглы Ахыгезер;

¹³ ашер тиресинден Окраның оглы Пагыел;

¹⁴ гат тиресинден Дегувалың оглы Элясап;

¹⁵ нафталы тиресинден Эйнаның оглы Ахура».

¹⁶ Булар өз ковумлары ве тирелери үчин ысрайыл халкының ичинден белленен баштутанларды.

¹⁷ Муса билен Харун бу атлары белленен адамлары янларына алып,

^18-19 икинҗи айың биринҗи гүни халкы йыгнадылар. Реббиң Муса буйрушы ялы эдип, яшы йигрими ве ондан ёкары болан адамлар өз уругларына ве ковумларына гөрә атларыны екеме-еке мәлим этдилер. Шейдип, Муса Синай чөлүнде оларың саныны язып алды.

²⁰ Ысрайылың новбахар оглы Рубениң несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

²¹ Рубен тиресинден хасаба алнанлар кырк алты мүң бәш йүз адам болды.

²² Шимгоның несиллеринден сөвешмәге укыплы, йигрими ве ондан ёкары яшлы, санавда болан эркек адамлар уругларына ве ковумларына гөрә екеме-еке хасаба алынды.

²³ Шимгон тиресинден хасаба алнанлар элли докуз мүң үч йүз адам болды.

²⁴ Гатың несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

²⁵ Гат тиресинден хасаба алнанлар кырк бәш мүң алты йүз элли адам болды.

²⁶ Яхуданың несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

²⁷ Яхуда тиресинден хасаба алнанлар етмиш дөрт мүң алты йүз адам болды.

²⁸ Ысакарың несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

²⁹ Ысакар тиресинден хасаба алнанлар элли дөрт мүң дөрт йүз адам болды.

³⁰ Зебулуның несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

³¹ Зебулун тиресинден хасаба алнанлар элли еди мүң дөрт йүз адам болды.

³² Юсубың, ягны Эфрайымың несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

³³ Эфрайым тиресинден хасаба алнанлар кырк мүң бәш йүз адам болды.

³⁴ Манашаның несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

³⁵ Манаша тиресинден хасаба алнанлар отуз ики мүң ики йүз адам болды.

³⁶ Беняминиң несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә, екеме-еке хасаба алынды.

³⁷ Бенямин тиресинден хасаба алнанлар отуз бәш мүң дөрт йүз адам болды.

³⁸ Даның несиллеринден, сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

³⁹ Дан тиресинден хасаба алнанлар алтмыш ики мүң еди йүз адам болды.

⁴⁰ Ашериң несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

⁴¹ Ашер тиресинден хасаба алнанлар кырк бир мүң бәш йүз адам болды.

⁴² Нафталының несиллеринден сөвешмәге укыплы, яшы йигрими ве ондан ёкары болан эркек адамлар уругларына ве ковумларына гөрә екеме-еке хасаба алынды.

⁴³ Нафталы тиресинден хасаба алнанлар элли үч мүң дөрт йүз адам болды.

⁴⁴ Хер бири өз тиресине векилчилик эдйән Ысрайылың он ики баштутанының көмеги билен Мусаның ве Харуның тарапындан хасаба алнанлар шуларды.

⁴⁵ Ысрайыл гошунында сөвеше укыплы, яшы йигрими ве ондан ёкары боланларың әхлиси өз ковумларына гөрә хасаба алынды.

⁴⁶ Оларың җеми алты йүз үч мүң бәш йүз элли адам болды.

⁴⁷ Эмма левилер өз тирелерине гөрә хасаба алынмадылар.

⁴⁸ Реб Муса шейле дийипди:

⁴⁹ «Диңе леви тиресиниң адамларыны хасаба алма, олары ысрайыл халкы билен биле санама.

⁵⁰ Оңа дерек олары мукаддес әхт чадырына, онуң әхли эсбапларына ве оңа дегишли затларың хеммесине җогапкәр эдип гой. Мукаддес чадыры ве онуң әхли эсбапларыны олар гөтерсинлер ве оңа гөзегчилик этсинлер, өз чадырларыны онуң төверегинде диксинлер.

⁵¹ Мукаддес чадыр гөчүрилмели боланда, оны левилер йыгнасынлар. Мукаддес өй дикилмели боланда, оны левилер диксинлер. Левилерден башга, ким оңа голайлашса, онуң җезасы өлүмдир.

⁵² Ысрайылларың херси бөлүнен тире топарына гөрә, өз дүшелгесинде өз тугы астында дүшлесинлер.

⁵³ Эмма левилер ысрайыл халкының башына Худайың газабы инмез ялы, чадырларыны мукаддес әхт чадырының төверегинде диксинлер. Мукаддес әхт чадырыны горамак кешигини-де левилер чексинлер».

⁵⁴ Ысрайыллар эдил Реббиң Муса табшырышы ялы этдилер.