Аянлык 5 - Мукаддес Китап

5‑нҗи бап Дүйрленен кагыз ве Гузы

¹ Мен тагтда Отураның саг элинде дүйрленен бир кагыз гөрдүм. Онуң ики тарапында-да язгылар болуп, еди мөхүр билен мөхүрлененди.

² Соңра гүйчли бир перишдәни гөрдүм. Ол батлы сеси билен: «Дүйрленен кагызың мөхүрлерини дөвмәге, оны ачмага ким мынасып?» дийип сораярды.

³ Эмма дүйрленен кагызы ачып, оңа середип билҗек адам не гөкде, не ерде, не-де ериң астында барды.

⁴ Мен аҗы гөзяш дөкүп агладым, себәби дүйрленен кагызы ачып, онуң ичине серетмәге мынасып хич ким тапылмады.

⁵ Шонда яшулуларың бири маңа шейле дийди: «Аглама! Ине, Яхуда тиресинден, Давудың көкүнден болан Арслан үстүн чыкды. Ол еди мөхүр билен мөхүрленен дүйрленен кагызы ачмагы башарар».

⁶ Онсоң мен дамагы чалнан гуза меңзейән бир Гузыны гөрдүм. Гузы тагтың ортасында, дөрт махлук билен яшулуларың арасында дурды. Гузының еди шахы билен еди гөзи барды. Бу гөзлер Худайың бүтин дүнйә иберилен еди Рухудыр.

⁷ Гузы гелди-де, тагтда Отураның саг элинден дүйрленен кагызы алды.

⁸ Ол дүйрленен кагызы элине аланда, дөрт махлук ве йигрими дөрт яшулы Гузының өңүнде йүзин дүшүп, Оңа сежде этдилер. Оларың хер бириниң элинде арфа ве якымлы ыслы түтетгиден долы алтын кәсе барды. Бу якымлы ыслы түтетгилер Худайың халкының дога-дилеглеридир.

⁹ Олар тәзе бир айдым айдярдылар: Сен мынасыпсың бу кагызы алмага, хем-де онуң мөхүрлерини дөвмәге. Чүнки Сен дамагың чалнып, Өз ганың билен, хер тиреден, хер дилден, хер халкдан хем-де миллетден Худай үчин адамлары сатын алансың.

¹⁰ Сен олардан шалык яратдың, Худайымыза хызмат этмек үчин олары руханы белледиң, олар ер йүзүнде шалык сүрерлер!

¹¹ Онсоң мен тагтың, җанлы махлукларың хем-де яшулуларың төверегиндәки перишделери гөрдүм ве оларың сеслерини эшитдим. Олар санардан көпди, мүңлерче мүңди, он мүңлерче он мүңди.

¹² Олар батлы сес билен: «Дамагы чалнан Гузы гүйҗи хем-де байлыгы, пайхасы хем гудраты, хорматы хем шөхраты өвгүлери алмага мынасыпдыр!» диййәрдилер.

¹³ Онсоң гөкдәки, ер йүзүндәки, ер астындакы ве деңиздәки хер бир махлугың, әлемдәки бар задың: «Тагтда Отурана ве Гуза бакы өвгүлер болсун! Хормат, шөхрат ве гудрат Олара бакы яр болсун!» диййәнлерини эшитдим.

¹⁴ Дөрт махлук «Омын!» диййәрди, яшулулар йүзин дүшүп, сежде эдйәрдилер.