Аянлык 3 - Мукаддес Китап

3‑нҗи бап Сардисдәки йыгнага

¹ «Сардисдәки йыгнагың перишдесине шуны яз: Худая хызмат эдйән еди Рухы Доландырян, элинде еди йылдызы Саклаян шейле диййәр: „Мен сениң әхли эденлериңи билйәрин. Сен дири хасаплансаң-да, өлүсиң.

² Оян! Өзүңде галан ве өлҗек болуп дуран затлары беркит. Себәби Худайың назарында ишлериңиң бири-де кәмил дәл экен.

³ Эшиденлериңи ве өврененлериңи яда сал, олары берҗай эт-де тоба гел. Оянмасаң, бир огры ялы барарын. Мениң хайсы сагатда үстүңе барҗагымы-да билмән галарсың.

⁴ Йөне Сардисде өз лыбасыны хапаламадык бирнәче адам бар. Олар Мениң билен ак лыбаслара бесленип гезерлер, себәби муңа мынасыпдырлар.

⁵ Яманлыкдан үстүн гелен хем ак лыбаса бесленер. Мен онуң адыны яшайыш китабындан өчүрмерин, Атамың ве Онуң перишделериниң хузурында адының бу китапда языландыгыны тассыкларын.

⁶ Гулагы бар адам Мукаддес Рухуң йыгнаклара нәме диййәнини эшитсин!“»

Филаделфиядакы йыгнага

⁷ «Филаделфиядакы йыгнагың перишдесине шуны яз: Бу хабар мукаддес ве хакыкы Боландандыр. Ол Давут ачарының Эесидир. Онуң ачан гапысыны хич ким япып билмез. Онуң япан гапысыны хич ким ачып билмез. Ине, Ол шейле диййәр:

⁸ „Сениң әхли эденлериңи билйәрин. Ине, өңүңде бир гапыны ачып гойдум, оны хич ким япып билмез. Гүйҗүңиң аздыгыны хем билйәрин. Йөне муңа гарамаздан, Мениң сөзүми берҗай этдиң, адымдан дәнмедиң.

⁹ Мен шейтаның үйшмелеңини гелип, аягыңа йыкылмага меҗбур эдерин, олар сени сөййәндигими билерлер. Олар өзлерини яхуды сайсалар-да, олар асла яхуды дәл, олар ялан алдаярлар.

¹⁰ Сен буйрукларымы берҗай эдип, иманда берк дурдуң. Шоңа гөрә-де, ер йүзүниң яшайҗыларыны сынамак үчин бүтин дүнйәниң үстүнден инҗек сынаг пурсадында сени горарын.

¹¹ Мен басым барарын. Тәҗиңи хич ким алмаз ялы, иманда берк дур.

¹² Яманлыкдан үстүн гелени Худайымың ыбадатханасының диреги эдерин. Ол шол ерде бакы галар. Мен онуң маңлайына Худайымың адыны ве Худайымың шәхериниң адыны язарын. Бу шәхер гөкден, Худайымың хузурындан инйән тәзе Иерусалимдир. Мен онуң маңлайына Өз адымы хем язарын.

¹³ Гулагы бар адам Мукаддес Рухуң йыгнаклара нәме диййәнини эшитсин!“»

Лаодикиядакы йыгнага

¹⁴ «Лаодикиядакы йыгнагың перишдесине шуны яз: Садык ве догручыл Шаят, Худайың яраданларының Башы, Омын дийип Атландырылян шейле диййәр:

¹⁵ „Сениң әхли эденлериңи билйәрин, сениң не совук, не-де гызгындыгыңы билйәрин. Вах, кәшгә совук я гызгын болсадың!

¹⁶ Сен не гызгын, не-де совук, йөне йылы боланың үчин Мен сени гусарын.

¹⁷ Сен: ‘Мен байдырын, баяп, зада зар дәлдирин’ диййәрсиң. Аслында велин налаҗедейин, бетбагт, гедай, көр ве ялаңачдыгыңы билмейәрсиң!

¹⁸ Гел, Мен саңа маслахат берейин: баяр ялы, Менден отда арассаланан алтыны сатын ал; ялаңачлыгың айбыны өртер ялы, Менден ак эгин-эшик сатын ал; гөрүп билер ялы, Менден гөзүңе мелхем сатын ал.

¹⁹ Мен Өз сөййәнлериме кәйәп, олары тербиелейәндирин. Шонуң үчин-де, ыхласлы бол, тоба эт!

²⁰ Ине, мен ишикде дурын, гапыны какярын. Сесими эшидип, гапыны ачаның өйүне гирерин. Мен онуң билен, ол хем Мениң билен бир сачак башында тагам иер.

²¹ Мен яманлыкдан үстүн гелип, Атам билен Онуң тагтында отурышым ялы, еңиҗә-де Мениң билен Өз тагтымда отурмага ыгтыяр берерин.

²² Гулагы бар адам Мукаддес Рухуң йыгнаклара нәме диййәнини эшитсин!“»