Аянлык 21 - Мукаддес Китап

21‑нҗи бап Тәзе Иерусалим

¹ Онсоң мен бир тәзе гөк билен бир тәзе ер гөрдүм. Чүнки өңки гөк ве ер айрылыпды. Инди хич бир деңиз хем ёкды.

² Мен Мукаддес Шәхери – тәзе Иерусалими гөрдүм. Ол гөкден, Худайың хузурындан инип гелйәрди. Тәзе Иерусалим өйленйән йигит үчин безенип-бесленип гелйән гелне меңзейәрди.

³ Мен тагтдан батлы бир сесиң шейле диенини эшитдим: «Худайың месгени инди ынсанларың арасындадыр! Ол инди ынсанларың арасында месген тутар. Олар Онуң халкы боларлар, Ол хем олар билен болуп, оларың Худайы болар.

⁴ Ол Өз халкының гөзлериниң хер бир гөзяшыны сүпүрер. Инди не өлүм, не-де яс, не агы, не-де агыры болар. Чүнки өңки затлар гечип гитди».

⁵ Тагтда Отуран: «Ине, әхли зады тәзелейәрин» дийди. Соңра маңа: «Булары яз, себәби бу сөзлер ыгтыбарлы ве чындыр» дийди.

⁶ Ол маңа ене-де шейле дийди: «Амала ашды. Алфа ве Омега, Башлангыч ве Соң Мендирин. Мен сувсана яшайыш сувуның гөзбашындан мугт ичирерин.

⁷ Еңен, ине, буларың барыны мирас алар. Мен онуң Худайы боларын, ол хем Мениң перзендим болар.

⁸ Эмма горкагың, имансызың, кеззабың, ганхорың, зынахорың, җадыгөйүң, бутпаразың ве хемме яланчыларың – әхлисиниң пайына янян күкүртли от көли дүшер. Икинҗи өлүм, ине, будур».

⁹ Соңра соңкы еди бела билен долдурылан еди кәсели еди перишдәниң бири мениң яныма гелип: «Гел, мен саңа гелни, Гуза аял болҗагы гөркезейин» дийди.

¹⁰ Перишде мени Мукаддес Рух аркалы бир улы, бейик дага чыкарды. Ол ерден маңа гөкден, Худайың хузурындан инип гелйән мукаддес шәхери – Иерусалими гөркезди.

¹¹ Ол Худайың шан-шөхратындан долуп, бир җуда гымматбаха даш ялы, булдурап дуран яшма дашы ялы парлаярды.

¹² Шәхериң улы ве белент диварлары, он ики дервезеси барды. Хер дервезәниң агзында бир перишде барды. Дервезелере ысрайыл халкының он ики тиресиниң ады язылгыды.

¹³ Гүндогарда үч дервезе, демиргазыкда үч дервезе, гүнортада үч дервезе, гүнбатарда үч дервезе барды.

¹⁴ Шәхериң дивары он ики бинядың үстүнде бина эдилипди, олара Гузының он ики ресулының ады язылгыды.

¹⁵ Мениң билен геплешен перишдәниң элинде шәхери, онуң дервезелерини ве диварыны өлчәр ялы алтындан өлчег таягы барды.

¹⁶ Шәхер дөртбурчлук шекилинде болуп, онуң бойы билен ини деңди. Перишде шәхери өлчеди. Шәхериң бойы ики мүң ики йүз чакрым болуп чыкды. Онуң ини, бейиклиги хем бойы ялыды.

¹⁷ Перишде шәхериң диварыны-да өлчеди. Диварың бейиклиги йүз кырк дөрт тирсек чыкды. Перишде булары өлчәнде, ынсанларың уланян өлчегини уланды.

¹⁸ Дивар яшма дашындан гурлупды. Шәхериң өзи болса тегмилтсиз айна ялы сап алтындан бина эдилипди.

¹⁹ Шәхер диварының бинятлары хер дүрли гымматбаха дашлар билен безеленди. Биринҗи биняды яшма дашы билен безеленди, икинҗиси гойы реңкли пөвризе дашы, үчүнҗиси хакык, дөрдүнҗиси зүмеррет,

²⁰ бәшинҗиси сардоникс, алтынҗысы гырмызы сардоникс, единҗиси алтын-сары даш, секизинҗиси гөк зүмеррет, докузынҗысы гойы сары даш, онунҗысы пөвризе, он биринҗиси мәмиши реңкли даш, он икинҗиси беневше реңкли гымматбаха дашлары билен безеленди.

²¹ Он ики дервезе он ики дүрден, ягны хер дервезе бүтеви бир дүрден ясаланды. Шәхериң шаёлы сап алтындан болуп, айна ялы ялпылдаярды.

²² Мен бу шәхерде ыбадатхана гөрмедим. Чүнки Хөкмүрован Реб Худай ве Гузы шәхериң ыбадатханасыдыр.

²³ Шәхери ягтыландырмак үчин Гүн я-да Ай герек дәл. Чүнки шәхери Худайың шөхраты ягтыландыряр, Гузы хем онуң чырасыдыр.

²⁴ Халклар бу шәхериң нурунда гезерлер. Дүнйәниң шалары оңа өз шан-шөхратыны гетирерлер.

²⁵ Шәхериң дервезелери узаклы гүн ачык болар, олар гулпланмаз, себәби ол ерде гиҗе болмаз.

²⁶ Миллетлер бу шәхере өз шан-шөхратларыны гетирип, Худая ве Гуза хормат билдирерлер.

²⁷ Бу шәхере хич бир мурдар зат, неҗислик эдйәнлериң, ялан сөзлейәнлериң хич бири гирмез. Оңа диңе Гузының яшайыш китабына атлары языланлар гирерлер.