Amos 9 - Мукаддес Китап

9-нҗы бап Реббиң Ысрайыла хөкүми

¹ Мен гурбанлык сыпасының янында Реббиң дураныны гөрдүм. Реб шейле буйрук берди: «Ыбадатхана сөелери сарсянча, сүтүнлериң башына ур, олары әхли ынсаның депесинден индер. Дири галанларыны гылычдан гечирерин, хич бири гачып-да, гутулып-да билмез.

² Газып өлүлер дүнйәсине гирселер-де, элими узадып, олары ондан чыкарарын. Олар гөге чыксалар-да, ол ерден ашак дүшүрерин.

³ Кармел дагының депесинде гизленселер-де, ол ерден Мен олары ызарлап тапарын. Хузурымдан деңзиң дүйбүнде гизленселер-де, деңиз йыланына буйрук берерин, йылан-да олары чакар.

⁴ Душманларының өңүне дүшүп, есирлиге гитселер-де, ол ерде гылыҗа буйрук берерин; ол-да олары өлдүрер. Мен олардан назарымы айырмарын, эмма ягшылык үчин дәл-де, яманлык үчин шейдерин».

⁵ Гудратыгүйчли-Хөкмүрован Реб элини ере дегирйәр ве ер сарсяр, ерде яшаян хер кес яс тутяр. Бүтин ер йүзи Нил кимин толкун атяр, Мүсүриң Нил дерясы дей ене песе дүшйәр.

⁶ Ёкаркы отагыны гөкде бина эдйән, гүммезини ериң ёкарсында гурян, деңзиң сувларыны бир ере йыгнап, сувлары ер йүзүне дөкйән Олдур. Онуң ады Ребдир.

^7-8 Реб шейле диййәр: «Эй, ысрайыл халкы, сен Мениң үчин эфиопия халкы билен дең дәлмисиң? Ысрайыллары Мүсүрден, пилиштлери Каптордан, сириялылары Кирден чыкаран Мен дәлми нәме? Хөкмүрован Реббиң назары сизиң гүнәли шалыгыңыздадыр, Мен-Реб оны ер йүзүнден сүпүрип ташларын, эмма Якубың ковумыны бүтинлей ёк этмерин». Муны Реб айдяндыр.

⁹ Ине, Мен буйрук берерин, әхли миллетлериң арасында ысрайыл халкыны бугдай элән ялы эдип, элекден гечирерин, шонда екеҗе даш-да элекден гечмез.

¹⁰ «Бела бизе гелмез я-да душмаз» диййән, халкымың әхли гүнәлилери гылычдан өлерлер.

Ысрайыл патышалыгы гайтадан дикелдилйәр

¹¹ Шол гүн Мен Давудың йыкылан чадырыны дикелдерин, бөвсүлен бөвүрлерини беҗерерин, вейран болан ерлерини оңарып, гадым дөвүрдәки ялы эдерин.

¹² Шейдип, ысрайыл халкы Эдомың аман галанларына, Маңа дегишли болан әхли миллетлере эелик эдер. Муны шу иши битирйән Худайыңыз Реб айдяндыр.

^13-15 Ине, шейле гүнлер гелер – Хөкмүрован Реб диййәр, ер сүрйән орак оряның ызындан етер, үзүм сыкян экиш дөврүне ченли ишини гутармаз, ширин шерап даглардан дамар, бүтин депелерден-де җошуп акар. Халкым Ысрайыла өңки абаданчылыгыны гайтарарын, юмрулан шәхерлери дикелдип, оларда месген тутарлар, үзүм багларыны отурдып, оларың шерабыны ичерлер, баг-бакҗалар экип, оларың мивесини иерлер. Мен олары өз топрагында отурдарын, Мениң өзлерине берен топрагымдан инди олар хич хачан чыкарылмаз. Муны Худайыңыз Реб айдяндыр.