Amos 7 - Мукаддес Китап

7‑нҗи бап Чекиртгелер, от ве шугул гуралы хакындакы гөрнүшлер

¹ Ине, Хөкмүрован Реб маңа шуны гөркезди: патышаның пайына дүшен бугдай орлуп болнандан соң, икинҗи экилен экин гөгерип башлан вагтында, Реб чекиртге сүрүлерини чоздурды.

² Чекиртгелер юрдуң әхли гөгерен задыны ийип гутаранда, мен шейле дийдим: «Я Хөкмүрован Реб, ялбарярын, Өз халкыңы багышла! Якубың несли муңа ненең чыдасын?! Ол бир кичи халкдыр!»

³ Онсоң Реб муңа гайтмышым этди. Реб: «Бейле зат болмаз!» дийди.

⁴ Ине, Хөкмүрован Реб маңа шуны гөркезди: Хөкмүрован Реб халкыны җезаландырмак үчин алавлы оды чагырды. От дүйпсүз чуң сувлары якып яндырды, соңра экин мейданыны яндырмага башлады.

⁵ Онсоң мен шейле дийдим: «Я Хөкмүрован Реб, ялбарярын, саклан! Якубың несли муңа ненең чыдасын?! Ол бир кичи халкдыр!»

⁶ Реб муңа-да гайтмышым этди. Хөкмүрован Реб: «Бу-да болмаз!» дийди.

⁷ Башга бир гөрнүш аркалы Реб маңа шуны гөркезди: ине, Реб шугул гуралы билен гурлан дим-дик диварың янында дурды, элинде болса шугул барды.

⁸ Онсоң Реб менден: «Амос, сен нәме гөрйәрсиң?» дийип сорады. Мен: «Бир шугул гөрйәрин» дийип җогап бердим. Онсоң Реб шейле дийди: «Ине, халкым Ысрайылың ортасында-да, Мен бир шугул гуралыны гойярын. Мундан бейләк олары багышламарын.

⁹ Ысхагың бутлара сеждегәхлери вейран эдилер, Ысрайылың мукаддес өйлери хараба өврүлер, Яробгам ковумына гаршы гылычлы аяга галарын».

Амос билен Амазя

¹⁰ Онсоң Бейтелдәки Амазя руханы Ысрайылың патышасы Яробгама шейле хабар ёллады: «Амос ысрайыл халкының арасында саңа гаршы дилдүвшүк гурады. Юрт онуң мунча сөзлерини гөтерип билмез.

¹¹ Амос шейле дийди: „Яробгам гылычдан өлер, Ысрайыл халкы өз юрдундан есир эдип әкидилип чыкарылар“».

¹² Онсоң Амазя Амоса шейле дийди: «Эй, гөргүр! Бар, Яхуда юрдуна гит-де, чөрек пулуңы шол ерде газан. Шол ерде пыгамберлик эт.

¹³ Эмма инди гайдып Бейтелде пыгамберлик этме, чүнки бу патышаның мукаддес өйи ве патышалыгың ыбадатханасыдыр».

¹⁴ Онсоң Амос Амазя шейле җогап берди: «Мен пыгамбер хем дәл, пыгамберлер топарындан хем дәл. Мен йөне бир чопан хем инҗир агачларына гөзегчилик эдйән.

¹⁵ Эмма Реб мени сүриниң ызындан алды-да, маңа: „Бар, гит-де, Мениң халкым Ысрайыла пыгамберлик эт“ дийди.

¹⁶ Инди болса Реббиң сөзүне гулак гой. Сен маңа: „Ысрайылың гаршысына пыгамберлик этме, Ысхагың ковумына гаршы вагыз этме“ диййәрсиң.

¹⁷ Шонуң үчин Реб шейле диййәр: „Аялың шәхерде лолучылык эдер, огул-гызларың гылычдан гечирилер, өлчег йүпи билен ериң пайланылар, өзүңем харам юртда өлерсиң, ысрайыл халкы өз юрдундан есир эдилип әкидилер“».