Amos 3 - Мукаддес Китап

3‑нҗи бап Ысрайылың гүнәси ве җезасы

¹ Эй, ысрайыл халкы, Реббиң сизе, Мүсүрден чыкаран ковумыңыза гаршы айдан бу сөзүне гулак гоюң:

² «Ер йүзүндәки әхли халкларың арасындан Мен диңе сизи сайладым. Шу себәпли әхли этмишиңиз үчин, Мен сизи җезаландырарын.

³ Хей, беллешмезден ики адам биле ёла дүшерми?

⁴ Авы оңмадык шир җеңңелде арлармы нәме? Хич зат авламадык арслан сүренинде хырлармы нәме?

⁵ Ерде дузак гурулмаса, гуш дузага дүшерми? Ичине бир зат дүшмесе, ерден гапан гөчерми?

⁶ Шәхерде сурнай чалнар-да, халкда горкы болмазмы? Реббиң Өзи индермесе, шәхере бела гелерми?

⁷ Хакыкатдан-да Хөкмүрован Реб сырыны гуллары пыгамберлере аян этмезден хич зат этмез.

⁸ Арслан арлар-да, ким горкмаз? Хөкмүрован Реб сөзләр-де, ким пыгамберлик этмез?»

⁹ Ашдот ве Мүсүр галаларына шуны җар эдиң: «Самарияның дагларына йыгнаның. Шәхериң ичиндәки башагайлыгы, онуң арасындакы зулумы гөрүң».

¹⁰ «Галаларында зорлук билен талан олҗаларыны топлаярлар, догры иш этмеги хич билмейәрлер. Муны Реб айдяндыр.

¹¹ Шонуң үчин душман юрдуңызы габава салар сизи гүйч-кувватдан дүшүрип, галаларыңызы талаңчылыга берер». Муны Хөкмүрован Реб айдяндыр.

¹² Реб шейле диййәр: «Бир чопаның арсланың агзындакы гойнуң диңе тойнакларыны я-да гулагының бир бөлегини халас эдип билши ялы, Самарияда яшаян ысрайыл халкы-да шейле халас эдилер. Онда диңе дөвүк-енҗик өй гошларындан башга хич зат галмаз».

¹³ Эшидиң ве Якуп несиллерине гүвәлик эдиң, Гудратыгүйчли Худай – Хөкмүрован Реб шейле диййәр:

¹⁴ «Этмиши үчин Ысрайылы җезаландыран гүнүм, Бейтелиң гурбанлык сыпаларыны-да ёк эдерин. Гурбанлык сыпаларың шахлары кесилип ере гачар.

¹⁵ Мен гышкы хем язкы көшклери юмрарын, пил сүңкүнден хашамланан җайлары ёк эдерин, бейик җайларың соңуна чыкарын». Муны Реб айдяндыр.