Amos 2 - Мукаддес Китап

2‑нҗи бап

¹ Реб шейле диййәр: «Мен Мовабы гүнә үстүне гүнә эдендиги үчин җезасыз галдырмарын. Чүнки ол Эдом шасының сүңкүни якып күле өвүрди.

² Шу себәпден Моваба от ягдырарын, от Кериёдың галаларыны якып күл эдер. Гыгырышмакдан ве сурнай сеслеринден яңа, Мовап халкы сөвеш гыкылыгының ичинде өлер.

³ Араларындакы хөкүмдарыны ёк эдерин, онуң билен биле әхли эмелдарларыны өлдүрерин». Муны Реб айдяндыр.

Яхуда хөкүм эдилйәр

⁴ Реб шейле диййәр: «Мен Яхуданы гүнә үстүне гүнә эдендиги үчин җезасыз галдырмарын. Чүнки Реббиң кануныны рет этдилер, Онуң парзларыны тутмадылар, ата-бабаларының ялан худайларың ызына эериши ялы инди булар-да олар билен аздылар.

⁵ Шу себәпден Яхуда от ягдырарын, от Иерусалимиң галаларыны якып күл эдер».

Ысрайыл хөкүм эдилйәр

⁶ Реб шейле диййәр: «Мен Ысрайылы гүнә үстүне гүнә эдендиги үчин җезасыз галдырмарын. Чүнки олар догручылы күмше, мәтәҗи бир җүбүт чарыга сатярлар.

⁷ Пукараларың башыны топрак астында депгиләп, эзиленлери ёлдан итекләп айырярлар. Оглы-да, атасы-да бир аялыңка гидип, мукаддес адымы харлаярлар.

⁸ Хер гурбанлык сыпасының янында гирев алнан эшиклери язып отурярлар. Өзлериниң Худайының өйүнде җериме пула алнан шерабы ичйәрлер.

⁹ Мен болса Ысрайылың өңүнден аморлары ёк этдим. Бойлары кедр агаҗы дей узын, дуб агаҗы кимин гүйчли болса-да, оларың ёкардан мивесини, ашакдан көкүни гырдым.

¹⁰ Шейле-де амор юрдуны эелемегиңиз үчин, Мен сизи Мүсүрден чыкардым, чөлде кырк йыллап ёл гөркездим.

¹¹ Огулларыңыздан пыгамбер чыкардым, яш йигитлериңизи назыр белледим. Эй, ысрайыл халкы, хакыкатдан-да, бу шейле дәлмидир?!» Муны Мен-Реб айдяндырын.

¹² «Эмма назыр болана шерап ичирдиңиз, пыгамберлере „Пыгамберлик этмәң!“ дийип буйрук бердиңиз.

¹³ Шонуң үчин десседен йүкли араба топрагы нәхили оврадян болса, Мен-де сизи дуран ериңизде эдил шонуң ялы мынҗырадарын.

¹⁴ Йүврүк адам гачып билмез, гүйчли гүйч гөркезип билмез, батыр-да җаныны халас эдип билмез.

¹⁵ Яйчы орнунда берк дуруп билмез, йүврүк аяклы гачып гутулып билмез, атлы-да җаныны халас эдип билмез.

¹⁶ Батырларың иң батыры-да ол гүн ялаңач гачып гидер». Муны Реб айдяндыр.