Amos 1 - Мукаддес Китап

1‑нҗи бап

¹ Тековалы чопанларың бири болан Амосың сөзлери. Ысрайыл хакындакы бу сөзлер Амоса ертитремеден ики йыл өң гөрнүш аркалы аян болупды. Шол гүнлерде Яхудада Узыя патыша, Ысрайылда Еховашың оглы Яробгам патыша хөкүм сүрйәрди.

² Амос шейле дийди: «Реб Сиондан награ чекйәр, Иерусалимден сесини эшитдирйәр. Чопанларың өри мейданлары соляр, Кармел дагының башы гураяр».

Ысрайылың төверегиндәки юртлар хөкүм эдилйәр

³ Реб шейле диййәр: «Мен дамасклылары гүнә үстүне гүнә эдендиклери үчин җезасыз галдырмарын. Чүнки демир дишли дөвеклерде гилгат халкыны енчдилер олар.

⁴ Муңа гөрә Хазайылың көшгүне от ягдырарын, от Бенхададың галаларыны якып күл эдер.

⁵ Дамаскың дервезесиниң килтлерини дөверин, Авен җүлгесиниң хөкүмдарыны, Бейтеденде эли ша хасалы хөкүмдары ёк эдерин. Сирия халкы Кир юрдуна есир эдип әкидилер». Муны Реб айдяндыр.

⁶ Реб шейле диййәр: «Мен газалылары гүнә үстүне гүнә эдендиклери үчин җезасыз галдырмарын. Олар тутуш җемагаты эдомлыларың элине бермек үчин есир эдип әкитдилер.

⁷ Муңа гөрә Газа диварына от ягдырарын, от онуң галаларыны якып күл эдер.

⁸ Ёк эдерин Ашдодың илатыны, Ашкелонда эли ша хасалы хөкүмдары. Голумы Экроның гаршысына өврерин, хеләк эдерин пилиштлилериң аман галаныны». Муны Хөкмүрован Реб айдяндыр.

⁹ Реб шейле диййәр: «Мен сурлулары гүнә үстүне гүнә эдендиклери үчин җезасыз галдырмарын. Чүнки олар доганлык әхтини унудып, тутуш җемагаты Эдома гул эдип сатдылар.

¹⁰ Муңа гөрә Сур диварына от ягдырарын, от онуң галаларыны якып күл эдер».

¹¹ Реб шейле диййәр: «Мен эдомлылары гүнә үстүне гүнә эдендиклери үчин җезасыз галдырмарын. Чүнки доганларыны гылычлы ковалап, рехим-шепагат этмедилер, чәксиз гахарыны дөкдүлер, газап атына бакы атландылар.

¹² Шу себәпден Теймана от ягдырарын, от Босраның галаларыны якып күл эдер».

¹³ Реб шейле диййәр: «Мен аммонлары гүнә үстүне гүнә эдендиклери үчин җезасыз галдырмарын. Чүнки олар өз чәклерини гиңелтмек үчин Гилгадың гөврели аялларының гарныны ярдылар.

¹⁴ Сөвеш гүнүндәки галмагалдан яңа, харасат гүнүндәки түвелей ичинде Рабаның диварына от саларын, от галаларыны якып күл эдер.

¹⁵ Эмелдарлары билен бирликде аммон шасы сүргүн эдилер». Муны Реб айдяндыр.