Abadýa 1 - Мукаддес Китап

1‑нҗи бап Эдом юрдуна гаршы пыгамберлик

¹ Абадя гелен аянлык: Хөкмүрован Реб Эдом барада шейле дийди: «Миллетлере векилиң иберилендигине хабар гелди. Ребден гелен векилиң: „Туруң, Эдома гаршы сөвеше чыкалың!“ диен хабарыны эшитдик.

² Эдом, Мен сени халкларың арасында иң песи эдерин сен бүтинлей рысва боларсың.

³ Текепбир йүрегиң алдады сени. Сен белентде, гаяларың ховпсуз еринде яшаяң, „Мени песе – ере ким дүшүрер?“ дийип, калбыңдан айдяң.

⁴ Эгер сен бүргүт дейин ёкары галсаң-да, хөвүртгәңи йылдызларың арасында гойсаң-да, ол ерден Мен сени ашак дүшүрерин!» Муны Реб айдяндыр.

⁵ «Сениң ичиңе огрулар гирдими я гиҗеки талаңчылар? Огрулар диңе өзүне герегини огурламазлармы? Эгер үзүм багыңа гирселер, саңа-да миведен галдырмазлармы? Эмма сен нәхили вейран болдуң!

⁶ Ысав несли ничик таланды, онуң хазынасы дөрүлди.

⁷ Сен билен саламатлыкда яшанлар сени алдадылар. Әхли аркадашларың сени серхетден чыкардылар. Биле дуз ийшен адамларың сенден рүстем чыкдылар. Муны сен аңшырмадың».

⁸ «Шол гүн – Реб диййәр – Мен Эдомың акыллы адамларыны ве пайхаса дүшүнйәнлерини Ысав дагында гырманмы?

⁹ Тейман, сениң батырларыңы горкы-ховсала басар. Оларың бары Ысав дагында гырлып ёк эдилер.

¹⁰ Доганың Якубың неслине залымлык эдениң үчин, бүтин бетнам боларсың ве эбеди ёк эдилерсиң.

¹¹ Кесекилер оларың эмләгини талан гүнүнде, сен кеседе дуруп серетдиң. Гелмишеклер дервезеден гиренде, Иерусалим үчин биҗе чекиленде, сен-де оларың бири ялы болдуң.

¹² Доганың – Яхуданың неслиниң бетбагт гүнүнде гүлмели дәлдиң. Олара бела инен гүнүнде, сен хешелле какмалы дәлдиң. Оларың хасрат гүнүнде магтанмалы дәлдиң.

¹³ Сен Мениң халкыма бела гелен гүнүнде, оларың дервезесинден гирмели дәлдиң. Оларың гыргынчылык гүнүне ичиңден бегенип серетмек, хеләкчилик гүнүнде оларың эмләгине галташмак хич догры дәлди.

¹⁴ Ёлуң чатрыгында дуруп, гачан адамлары тутмалы дәлдиң. Хасрат гүнүнде аман галанлары душмана бермели дәлдиң.

Реббиң гүни

¹⁵ Чүнки, Реббиң әхли миллетлере хөкүм этҗек гүни голайлап гелйәр. Эй, Эдом, нәме эден болсаң, саңа-да шол болар. Эдениң башыңа дүшер.

¹⁶ Чүнки, сиз, яхудалар, Мениң мукаддес дагымда ичдиңиз. Әхли миллетлер-де хемише шейле ичерлер ве ювудып, асла болмадык ялы боларлар. Себәби җеза кәсесинден ичерлер.

¹⁷ Йөне Сион дагында җезадан халас галанлар болар ве Сион дагы мукаддес болар. Якубың несли өз мүлкүне говшар.

¹⁸ Якубың несли от болар, Юсубың зүряды алава дөнер. Одуң саманы якышы ялы, олар Ысавың неслинден ыз гоймаз. Ысавың илинден гутуланы болмаз. Чүнки муны Реб айтды.

¹⁹ Негеп чөлүниң халкы Ысав дагыны эеләр. Байырлыкдакы адамлар пилиштлилериң топрагыны эеләрлер. Олар Эфрайым хем Самария топрагына ченли етерлер. Бенямин несли Гилгады эеләр.

²⁰ Сүргүн эдилен ысрайыл сөвешиҗилери Кенганың Сарепата ченли ерлерине эе боларлар. Иерусалимден Сепарада сүргүн эдиленлер Негепдәки галалары эеләрлер.

²¹ Еңиҗилер Ысав дагларының үстүнден хөкүм сүрмек үчин, Сион дагының үстүне чыкарлар. Патышалык Реббиңки болар».