3 Ёханна 1 - Мукаддес Китап

1‑нҗи бап Саламлар

¹ Чын йүрекден сөййән эзиз достум Гаюса мен яшулудан догайы салам.

² Мәхрибан достум, рухуңың белент болшы ялы, әхли ишлериң ровачлансын ве җаның саг болсун!

³ Доганлар гелип, сениң садыклык билен хакыката эерип яшаяндыгыңы хабар беренлеринде, мениң шатлыгымың чәги болмады.

⁴ Мениң үчин перзентлеримиң хакыката эерип яшаяндыкларыны эшитмекден улы шатлык ёкдур.

Өвгүлер ве өвүтлер

⁵ Эзиз достум, сен доганлара, хатда өзүңиң танамаянларыңа-да садыклык билен хызмат эдйәрсиң.

⁶ Олар сениң мәхирли сөйгиң догрусында иманлылар йыгнагының өңүнде шаятлык этдилер. Сен олары Худая мынасып усулда ёла салсаң, ягшы иш эдерсиң.

⁷ Олар Месихиң адының хатырасына ёла чыкдылар ве диңе имандакы доганларының ярдамына бил багламагы карар этдилер.

⁸ Биз хакыкат угрунда биле ишләр ялы, шейле адамлары голдамага борчлудырыс.

⁹ Мен иманлылар йыгнагына бир хат языпдым, йөне оларың арасында башлык болмагы халаян Диётреф бизи кабул этмейәр.

¹⁰ Шоңа гөрә-де, эгер барайсам, онуң этмишлерини паш эдерин. Ол биз барада ярамаз геп яйрадып, төхмет атяр. Мунуң билен хем чәкленмән, доганлары-да кабул этмейәр, кабул этҗеклере-де пәсгел берип, олары йыгнакдан ковяр.

¹¹ Мәхрибан достум, сен ямандан дәл-де, ягшыдан гөрелде ал. Ягшылык эдйән адам Худайдандыр. Яманлык эдйән адам болса Худайы танаян дәлдир.

¹² Деметрей болса хеммелер тарапындан сыланян адамдыр, хакыкатың өзи муңа шаятдыр. Биз хем ол хакда ягшы пикирдедирис, гепимизиң хакыкатдыгыны өзүң билйәнсиң.

Хошлашык сөзи

¹³ Мениң саңа айтмалы затларым көп, оларың хеммесини язып отурҗак дәл, баранымда хеммесини айдарын.

¹⁴ Сени басымрак гөрүп, йүзбе-йүз гүрлешерис диен умыдым бар.

¹⁵ Саг-саламат бол! Достларымыз саңа салам ёллаярлар. Ол ердәки достларымызың хеммесине атма-ат салам айт.