2 Timoteos 4 - Мукаддес Китап

4‑нҗи бап Хызматыңы довам эт!

¹ Худайың хузурында, шейле хем дирилере ве өлүлере казылык этҗек Иса Месихиң хузурында, Онуң гелмегиниң ве шалык сүрмегиниң хатырасына саңа шулары берк табшырярын:

² пурсадың аматлы болуп-болмазлыгына гарама-да, Хош Хабары дынгысыз вагыз эт. Гүнә эдйәнлери паш эдип, олары язгар, сабырлылык билен өвүт-үндев берип, таглыматы өврет.

³ Чүнки адамларың сагдын таглыматы диңләси гелмеҗек заманасы гелер. Шонда олар өз хөвеслерине ярашыклы, гулакларына-да якымлы сөзлери айтҗак өвредиҗилери гөзләрлер.

⁴ Олар хакыката гулак асман, тосламаларың ызында селпәрлер.

⁵ Сен болса хер ягдайда хүшгәр бол, гөргүлере дөзүмли бол, Хош Хабары яйратмак угрунда зәхмет чек, өзүңе табшырылан хызматы долы битир.

⁶ Чүнки мениң ганым Худая хөдүр эдилйән ичги садакасы кимин дөкүлҗек болуп дур. Бу дүнйәден өтмели пурсадым етди.

⁷ Мен өкде сөвешиҗи кимин сөвешдим, пеллехана етдим, иманыма садык галдым.

⁸ Догрулык Казысы болан Реб Иса Өз гелҗек гүнүнде маңа догрулык тәҗини байрак берер. Ол бу байрагы диңе маңа дәл, эйсем Өзүне интизарлык билен гарашянларың хер бирине берер.

Соңкы табшырыклар

⁹ Мениң яныма басымрак гелҗек бол,

¹⁰ себәби Дема бу дүнйәни сөенсоң, мени ташлап, Салоникә гитди. Крискис Галатя, Титус хем Далматя гитди.

¹¹ Янымда диңе Лука галды. Гайданыңда Маркы хем алып гайт, себәби хызматымы битирмекде маңа көмеги дегер.

¹² Тихики болса Эфесе ёлладым.

¹³ Гайданыңда, ёл угруна Троасда Карбың янында гоюп гайдан донумы, китапларымы, ылайта-да телетинден эдилен китаплары алып гайт.

¹⁴ Демир уссасы Исгендер маңа яманлык барыны этди. Реб оңа эденлерине гөрә җезасыны берер.

¹⁵ Сен хем ондан әгә бол, себәби ол бизиң айдянларымызың барына бүтинлей гаршы чыкыпды.

¹⁶ Казыет меҗлисинде өзүми илкинҗи гезек акламакчы боланымда, тарапымы тутан болмады. Гайтам, хеммелер мени терк этдилер. Гой, Худай оларың бу гүнәсини багышласын.

¹⁷ Йөне Реб мени еке гоймады. Хош Хабарың мен аркалы долы вагыз эдилип, әхли миллетлериң хем оны эшитмеги үчин, Ол маңа гуҗур-гайрат берди. Реб мени өлүмиң пенҗесинден халас этди.

¹⁸ Ол мени хер дүрли яманлыклардан халас эдип, мени гөкдәки Шалыгына саг-аман етирер. Реббе бакы ве эбеди шан-шөхрат болсун! Омын.

¹⁹ Прискилла, Акила ве Онисифорың өйүндәкилере салам айт.

²⁰ Эраст Коринтосда галды. Трофымы болса яравсызлыгы себәпли Милитосда галдырмалы болдум.

²¹ Гыш дүшмәнкә гелҗек болуп гайрат эт. Эвул, Пуденс, Линус, Клавдия ве имандакы доганларың бары саңа салам айдяр.

²² Реб саңа яр болсун! Онуң мерхемети сизиң барыңыза яр болсун!