2 Timoteos 3 - Мукаддес Китап

3‑нҗи бап Ахыркы гүнлер барада

¹ Эй, оглум, ахыркы гүнлерде элхенч пурсатларың болҗакдыгыны билип гой.

² Адамлар диңе өзүни сөййән, пула гызан, өвүнҗең, текепбир, Худая дил етирйән, ата-энесине боюн эгмейән, гадыр билмез, адамлары сыламаян,

³ доңйүрек, гечиримлилик этмейән, мыҗабатчы, өзүне эрк эдип билмейән, залым, ягшылыгы йигренйән,

⁴ хайын, гөчгүнли, гопбамсы болуп, кейпи-сапаны Худайдан көп сөерлер.

⁵ Олар худайхонсырасалар-да, Худайың гүйҗүни инкәр эдйәндирлер. Бейле адамлардан араны ач.

⁶ Олар адамларың өйлерине сүмлүп гирйәрлер. Гүнәлери башындан агдык, хер түйсли хөвеслере мейилли, еңлес аяллары өз тарапына чекйәрлер.

⁷ Бу аяллар хемише өвренмәге сынанышсалар-да, хакыкат билимине асла етип билмейәрлер.

⁸ Яннис билен Ямбрисиң Муса гаршы чыкышы ялы, бу адамлар хем хакыката гаршы чыкяндырлар. Оларың пикири бозук, иманлары болгусыздыр.

⁹ Олар өз эдйәнлеринде илерлемезлер. Яннис билен Ямбрисиңки ялы, оларың-да акылсызлыгы хеммелере белли болар.

Тимотеоса берилйән үндевлер

¹⁰ Эмма сен мениң таглыматымы, дурмуш йөрелгәми, максадымы, иманымы, сабыр-такатымы, сөйгими, чыдамлылыгымы билйәнсиң.

¹¹ Антиёх, Икония ве Листра шәхерлериндәки ызарланмалар зерарлы гөрен гөргүлерими, олара нәдереҗеде чыдандыгымы хем билйәнсиң. Реб мени бу гөргүлериң барындан халас этди.

¹² Умуман, Иса Месихе эерип, Худайың йөрелгесине лайыклыкда яшамак ислейәнлериң бары ызарланмалара сезевар болар.

¹³ Пислер ве кеззаплар болса алдап, алданып, өз писликлеринде барха илерләрлер.

¹⁴ Эмма сен өз өвренен ве ынанян таглыматыңа садык гал. Чүнки оны кимлерден өвренендигиңи билйәнсиң.

¹⁵ Сен Мукаддес Язгылары хем огланлыкдан бәри билйәнсиң. Бу Язгылар Иса Месихе болан иман аркалы сени пайхаслы эдип, халас болмагың ёлуны гөркезер.

¹⁶ Мукаддес Язгыларың әхлиси Худайың ылхамы билен язылды. Олар өвретмек, гүнә эдйәнлери паш этмек, ёла гетирмек, догрулыкда тербиелемек үчин пейдалыдыр.

¹⁷ Шейдип, Худайың адамы хайыр ишлериң әхлисине тайяр ве кәмил болар.