2 Timoteos 2 - Мукаддес Китап

2‑нҗи бап Иса Месих е садыклык билен эериң

¹ Эй, оглум, Иса Месихиң берйән мерхемети билен кувватлан.

² Көп шаятларың янында менден эшиден сөзлериңи бейлекилере-де өвредип билҗек ыгтыбарлы адамлара табшыр.

³ Иса Месихиң хакыкы эсгери болуп, бизиң иман угрунда гөрйән гөргүлеримизе шәрик бол.

⁴ Харбы гуллукдакы эсгер гүнделик дурмуша дегишли ишлере улашян дәлдир. Ол өз серкердесиниң гөвнүнден турмак ислейәндир.

⁵ Шунуң ялы, ярыша гатнашян пәлван хем ярышың шертлерини берҗай этмесе, байрак алмаз.

⁶ Җаныпкеш дайхан хем өз хасыл пайыны илкинҗи болуп алмалыдыр.

⁷ Шу айдянларым барада ойлан. Буларың барына дүшүнериң ялы, Реббиң Өзи саңа дүшүнҗе берер.

⁸ Давудың неслинден болан ве өлүмден дирелен Иса Месихи унутма. Бу мениң вагыз эдйән Хош Хабарымдыр.

⁹ Мен Хош Хабарың угрунда гөрги барыны гөрүп, җенаятчы кимин туссаг эдилдим. Эмма Худайың Хош Хабарыны туссаг эдип болян дәлдир!

¹⁰ Ине, хут шу себәпден, сайлананлар хем бакы шөхрат билен бирликде Иса Месих аркалы халас болар ялы, оларың хатырасына әхли зада дөз гелйәрин.

¹¹ Ине, шу сөзлер өрән догры айдылан сөзлердир: Онуң билен биле биз өлен болсак, Онуң билен биле яшаҗакдырыс.

¹² Гөргүлере чыдаян болсак, Онуң билен биле шалык сүрерис. Эгер Оны рет этсек, Ол хем бизи рет эдер.

¹³ Эмма биз Оңа садык галмасак-да, Ол бизе садыкдыр, себәби Ол Өзүни рет эдип билмейәр.

Худайың халаян ишчиси

¹⁴ Бу затлары хеммелере ятладып дур. Сөзлериң манысы барада давалашмазлыгы олара Худайың хузурында берк табшыр. Себәби шейле давалар пейда гетирмән, диңлейәнлери хеләкчилиге учрадяндыр.

¹⁵ Худайың хузурында өз эдйәнинден утанмаҗак, хакыкы таглыматы догры өвредйән ишчи хөкмүнде дуруп билериң ялы, җан-тенден ыхлас эт.

¹⁶ Худая ярамаян бош геплерден гача дур. Себәби шейле геплере улашян адамлар гитдигисайы Худайдан дашлашяндырлар.

¹⁷ Оларың өвредйән таглыматы болса ёканч кесел кимин яйрар. Хименей билен Филит хем шолардан болуп,

¹⁸ хакыкат ёлундан азашандырлар. Олар дирелиш эййәм амала ашды дийип, кәбир адамларың иманыны вейран эдйәрлер.

¹⁹ Эмма хер ничик болса-да, Худайың тутан биняды берк дурандыр. Бу бинят «Реб Өзүниңкилери танаяндыр», «Реббиң адыны ыкрар эдйән хер кес яманлыкдан узакда дурсун» диен сөзлер билен мөхүрленендир.

²⁰ Улы хоҗалыкдакы гапларың әхлиси алтындан ве күмүшден дәлдир. Оларың арасында агачдан, тоюндан ясаланлары хем бардыр. Оларың кәбири дабаралы, кәбири болса адаты максатлар үчин уланыляндыр.

²¹ Иманлылар бабатда хем шейле: өзүни хер түйсли яманлыкдан саклаян иманлы йөрите сайланылып, Хоҗайыны үчин ярамлы гап кимин болар. Ол ислендик ягшы ишлер үчин тайярдыр.

²² Яшлык хөвеслеринден гач. Пәк йүрекден Реббе ыбадат эдйәнлер билен бирликде догрулык, иман, сөйги ве парахатлык йөрелгелерине эер.

²³ Бош ве самсык җеделлерден гача дур. Себәби даваларың шолардан дөрейәндигини өзүң билйәнсиң.

²⁴ Реббиң хызматчысы давалашмалы дәлдир, терсине, хеммелере мылакатлы, өвретмәге укыплы, сабыр-такатлы болмалыдыр.

²⁵ Ол өзүне гаршы чыкян адамлара хем юмшаклык билен өвүт-үндев бермелидир. Белки, Худай бу адамларың хем тоба гелмегине бир ёл ачар. Олар-да хакыкаты билип,

²⁶ акылына айланарлар, иблисиң дузагындан гутуларлар. Себәби иблис олары есирлиге алып, өз ниетини амала ашырмага меҗбур эдйәндир.