2 Timoteos 1 - Мукаддес Китап

1‑нҗи бап

^1-2 Иса Месихиң ресулы мен Павлусдан сөйгүли оглум Тимотеоса догайы салам! Худай мени Иса Месих аркалы берен яшайыш вадасыны җар этмек үчин сайлады. Гой, Атамыз Худайың ве Реббимиз Иса Месихиң мерхемети, рехим-шепагаты ве парахатлыгы саңа яр болсун!

Павлус Тимотеос үчин Худая шүкүр эдйәр

³ Мен хем ата-бабаларым ялы Худая пәк выждандан хызмат эдйәрин. Дога-дилеглеримде сени гиҗе-гүндиз дынгысыз ятлап, Худайыма шүкүр эдйәрин.

⁴ Мен хошлашык пурсадындакы гөзяшларыңы ятлаярын, шатлыкдан долмак үчин сениң билен дидарлашмагы күйсейәрин.

⁵ Сениң Иса Месихе болан хакыкы иманыңы ятлаярын. Озал мамаң Лойисиң, эҗең Эвникиниң калбында месген тутан иманың инди сениң калбыңда хем яшаяндыгына ынанярын.

Павлус Тимотеоса өвүт берйәр

⁶ Шонуң үчин, ене-де бир гезек гайталаярын: башыңа эллерими гоймагым аркалы Худайдан алан рухы пешгешиңи парлат,

⁷ себәби Худай бизи горкак этмейәр. Ол бизи гүйч, сөйги ве өзерклилик билен долдуряр.

⁸ Шонуң үчин-де, Реббимиз барада шаятлык этмәге утанма. Онуң хатырасына туссаг эдиленлигимден-де утанма. Терсине, Худайың берйән гүйҗи билен Хош Хабарың угрунда гөрйән гөргүлериме шәрик бол.

⁹ Худай бизи эден ишлеримизе гөрә дәл-де, Өз максадына ве мерхеметине гөрә халас эдип, Онуң мукаддес халкы болмага чагырды. Бу мерхемет дүнйә ярадылмаздан өң Иса Месих аркалы берлип,

¹⁰ шинди Халасгәримиз Иса Месихиң гелмеги билен аян эдилди. Ол өлүми ёк эдип, Хош Хабар аркалы бакы яшайшы ве өлмезлиги аян этди.

¹¹ Мен хем бу Хош Хабарың җарчысы, ресулы ве өвредиҗиси эдилип беллендим.

¹² Хут шу себәбе гөрә гөрги барыны гөрйән болсам-да, мундан асла утанмаярын, себәби Киме иман эденими билйәрин. Онуң маңа табшыран задыны кыямат гүнүне ченли сакламагы башарҗакдыгына берк ынанярын.

¹³ Саңа өвреден догры таглыматымы нусга хөкмүнде гайым тутуп, Иса Месихиң берйән иманына ве сөйгүсине эер.

¹⁴ Өзүңе табшырылан оңат таглыматы бизде месген тутан Мукаддес Рух аркалы гора.

¹⁵ Сен Азия велаятындакыларың хеммесиниң, шол санда Фигелиң ве Хермогениң менден йүз өврендиклерини билйәнсиң.

¹⁶ Гой, Реббимиз Онисифорың өй-ичерсине рехимдарлык этсин. Себәби ол энчеме гезек маңа гөвүнлик берип, мениң туссаглыгымдан утанмады.

¹⁷ Терсине, Риме гелип, тә мени тапянча, эрҗеллик билен гөзледи.

¹⁸ Гой, Реб кыямат гүни оңа Өз рехимдарлыгыны гөркезсин! Онуң Эфесде маңа нәхили ярдам берендигини өзүң-де билйәнсиң.