2 Şamuwel 6 - Мукаддес Китап

6-нҗы бап Давут Әхт сандыгыны Иерусалиме гетирдйәр

¹ Давут ене-де Ысрайылың мен диен адамларындан отуз мүңүсини топлады.

² Ол Худайың Әхт сандыгыны гетирмек үчин, адамлары билен биле Багала Яхуда галасына гитди. Сандык керупларың арасында тагт гуран Хөкмүрован Реб дийип атландырыляр.

³ Олар Худайың сандыгыны тәзе араба йүкләп, байырлыкда ерлешйән Абынадабың өйүнден алып чыкдылар. Тәзе арабаны Абынадабың огуллары Уза билен Ахё сүрүп барярдылар.

⁴ Уза Худайың сандыгының гапдалындан, Ахё болса сандыгың өңүнден йөрәп барярды.

⁵ Давут ве тутуш ысрайыл халкы Реббиң хузурында бар гүйчлери билен серви агаҗындан эдилен дүрли саз гуралларыны: лира, арфа, депрек, кимвалдыр кастанет чалып танс эдйәрдилер.

⁶ Наконың харман җайына етенлеринде, оларың өкүзлери бүдреди, Уза элини узадып, Худайың сандыгындан тутды.

⁷ Уза гаршы Реббиң гахары гелди. Бипервайлык эдендиги үчин, Худай оны шол ерде өлдүрди. Уза эдил Худайың сандыгының янында җан берди.

⁸ Давут Реббиң Узаны өлдүрендиги үчин гахарланды. (Ол ер шу гүне ченли Перес Уза дийлип атландырыляр.)

⁹ Давут шол гүн Ребден горкуп: «Реббиң сандыгыны нәдип мениң яныма гетирип боларка?» дийди.

¹⁰ Шунлукда, Давут Реббиң сандыгыны Давут галасына әкитмек ислемеди. Ол сандыгы Гат галасындан болан Обедедомың өйүнде гоюп гитди.

¹¹ Реббиң сандыгы үч айлап Обедедомың өйүнде дурды. Реб Обедедомы ве онуң тутуш хоҗалыгыны ялкады.

¹² «Реб Обедедомың хоҗалыгыны хем-де оңа дегишли боланларың әхлисини Худайың сандыгы үчин ялкады» дийип, Давут патыша хабар бердилер. Давут гидип, Худайың сандыгыны улы шатлык билен Обедедомың өйүнден Давут галасына гетирди.

¹³ Реббиң сандыгыны гөтериҗилер алты әдим йөрәнден соң, Давут бир өкүз билен семиз гөләни гурбанлык берди.

¹⁴ Давут непис зыгыр матадан тикилен эфот гейип, Реббиң хузурында бар гүйҗи билен җошуп танс эдйәрди.

¹⁵ Шунлукда, Давут хем-де тутуш ысрайыл халкы шатлык билен гыгырышып, шахдан эдилен сурнай чалып, Реббиң сандыгыны гетирйәрдилер.

¹⁶ Реббиң сандыгы Давут галасына гетириленде, Шавулың гызы Микал пенҗиреден серетди. Давудың Реббиң хузурында бөкҗекләп танс эдишини гөрүп, ол өз янындан Давуда гөвнүетмезчилик билен серетди.

¹⁷ Олар Реббиң сандыгыны гетирип, Давудың онуң үчин йөрите гуран чадырының ичинде өз еринде гойдулар. Соңра Давут Реббиң хузурында якма хем саламатлык гурбанлыкларыны берди.

¹⁸ Ол якма хем саламатлык гурбанлыкларыны берип боландан соң, Хөкмүрован Реббиң адындан халка пата берди.

¹⁹ Аял-эркек диймән, ысрайыл халкының херсине бир чөрек, бир бөлек эт хем-де кишмиш пайлады. Шондан соң тутуш җемагат өйүне даргады.

²⁰ Давут өз машгаласына пата бермек үчин гайдып гелйәркә, Шавулың гызы Микал өңүнден чыкып, оңа шейле дийди: «Бир болгусызың утанчсызлык билен ялаңачланышы ялы, өз эмелдарларының гырнакларының өңүнде ярым-ялаңачланып, гөр, бу гүн ысрайыл патышасы өзүне нәхили хормат газанды!»

²¹ Давут Микала шейле дийди: «Бу сениң атаңың хем онуң неслиниң ерине мени сайлан, мени Өз халкы Ысрайыла хөкүмдар эден Реббиң хузурында болды. Хава, мен Реббиң хузурында танс этҗек.

²² Мен өзүми өңкүденем хас кичелдип, мертебәми песелтҗек. Эмма сениң диййән гырнакларың мени шөхрата бесләрлер».

²³ Шавулың гызы Микал дүнйәден перзентсиз өтди.