2 Şamuwel 5 - Мукаддес Китап

5‑нҗи бап Давут тутуш Ысрайыла патыша боляр

¹ Ысрайылың әхли тирелери Хеброна Давудың янына барып, оңа: «Биз сениң өз сүегиңден ве тениңдендирис.

² Өңлерем – Шавул патышамызка-да сен ысрайыл гошунына серкердедиң. Реб саңа: „Мениң халкым Ысрайылың чопаны сен боларсың, Ысрайыла сен хөкүмдарлык эдерсиң“ дийипди» дийдилер.

³ Шейдип, Ысрайылың әхли яшулулары Хеброна Давудың янына йыгнандылар. Шол ерде Реббиң хузурында Давут патыша олар билен әхт эдишди. Ысрайылың яшулулары Давудың башына яг гуюп, Ысрайыла патыша белледилер.

⁴ Давут патыша беллененде, отуз яшындады; ол кырк йыл патышалык этди.

⁵ Давут Хебронда Яхуданың үстүнден еди йыл, алты ай, Иерусалимде отурып, тутуш Ысрайыл билен Яхуда отуз үч йыл патышалык этди.

⁶ Давут патыша адамларыны алып, Иерусалимде яшаян ябусларың үстүне йөриш этди. Ябуслар Давуда: «Сен бу ере гирип билмерсиң, хатда көрлердир агсакларам сени ызыңа серпикдирип билерлер» диййәрдилер. Олар Давут бу ере гирип билмез дийип пикир эдйәрдилер.

⁷ Эмма Давут Сион галасыны басып алды. Ол хәзир «Давут галасы» дийлип атландырыляр.

⁸ Давут шол гүн: «Кимде-ким ябуслары өлдүрмекчи болса, кәризиң ичинден гечип, Давуды йигренйән көрлердир агсакларың үстүне чозсун» дийди. («Көрлердир агсаклар Худайың өйүне гирип билмезлер» диен геп шондан галды.)

⁹ Давут галаны эеледи ве оны «Давут галасы» дийип атландырды. Ол Миллодан башлап, галаның тутуш төверегини тәзеден гурды.

¹⁰ Давут гитдигисайы гүйчленйәрди, себәби Хөкмүрован Худай Реб онуң биленди.

¹¹ Сур патышасы Хирам Давудың янына илчилер билен кедр агачларыны, агач уссаларыдыр көшк гуруҗы уссалары иберди. Олар Давут үчин көшк гурдулар.

¹² Шейлеликде, Давут өзүни Реббиң тутуш Ысрайылың патышасы хөкмүнде беркарар эдендигине хем-де Өз халкы Ысрайылың хатырасына өз патышалыгыны бейгелдендигине дүшүнди.

¹³ Давут Хеброндан геленден соң, Иерусалимде ене-де гырнаклардыр аяллар алды. Олардан хем Давудың огул-гызлары болды.

¹⁴ Онуң Иерусалимде доглан чагаларының атлары шулардыр: Шаммува, Шобап, Натан, Сүлейман,

¹⁵ Йыбхар, Элишува, Непек, Япыя,

¹⁶ Элишама, Эляда, Элипелет.

¹⁷ Давудың тутуш Ысрайыла патышалыга белленилендигини эшиденде, әхли пилиштлилер аяга галып, онуң гөзлегине чыкдылар. Давут муны эшидип, чөлдәки гала гитди.

¹⁸ Пилиштлилер гелип, Рапа җүлгесине яйрадылар.

¹⁹ «Мен пилиштлилериң гаршысына чыкайынмы? Сен олары мениң элиме берермиң?» дийип, Давут Реббе йүз тутды. Реб оңа: «Бар, пилиштлилери шүбхесиз сениң элиңе берҗекдирин» дийди.

²⁰ Шейлеликде, Давут Багалперасыма гелип, олары шол ерде дерби-дагын этди. Ол: «Сил бентлериниң бөвсүлиши кимин, Реб-де душманларыма мениң элим билен зарба урды» дийди. Шол себәпден хем бу ере Багалперасым диен ат дакылды.

²¹ Давут билен онуң адамлары пилиштлилериң ташлап гиден бутларыны алдылар.

²² Пилиштлилер ене гелип, Рапа җүлгесине яйрадылар.

²³ Давут Реббе йүз тутанда, Реб шейле дийди: «Оларың өңүнден чыкма. Бальзам агачлары тарапдан гелип, оларың еңсесинден ур.

²⁴ Бальзам агачларының башларындан аяк сеслерини эшидениңде, тайяр бол, себәби бу пилиштлилериң гошуныны дерби-дагын этмек үчин, Мен – Реббиң сениң өңүңе дүшдүгимдир».

²⁵ Давут Реббиң буйрушы ялы этди. Ол Гебадан Гезере ченли болан аралыкда пилиштлилери гырды.