2 Şamuwel 21 - Мукаддес Китап

21‑нҗи бап Шавулың несиллери өлдүрилйәр

¹ Давудың дөврүнде үч йыла чекен ачлык болды. Давут Реббе йүзленди. Реб оңа: «Шавулың ган дөкмеги онуң өзүниң ве неслиниң бойнунадыр, себәби ол гибгонлылары гыргынчылыга берди» дийди.

² Патыша гибгонлылары чагырып, олар билен геплешди. (Гибгонлылар ысрайыллардан дәлдирлер, олар аморларың галындыларыды. Ысрайыллар олара дегмеҗекдиклерине ант ичипдилер, йөне Ысрайыл билен Яхуда болан ыхласы себәпли, Шавул олары ёк этҗек болярды.)

³ Давут гибгонлылара: «Мен сизиң үчин нәме эдейин? Реббиң сайлан халкына пата бермегиңиз үчин, бу гүнәден нәдип сапланаркам?» дийди.

⁴ Олар: «Бизе Шавулдан ве онуң неслинден алтын я күмүш алмак етерлик дәл. Ысрайылдан кимдир бирини бизиң өлдүрмәге хакымыз ёк» дийдилер. Давут олара: «Сиз нәме ислесеңиз, шоны-да этҗек» дийди.

^5-6 Олар: «Бизи тутуш Ысрайылдан чыкармак ислән ве дыр-пытрак эден адамың неслинден болан еди адамы бизиң элимизе бер. Биз олары Реб тарапындан сайланан Шавулың Гибга галасында Реббиң хузурында өлдүрип, Гүнүң астында серҗек» дийдилер. Патыша олара: «Боляр, мен олары сизе берейин» дийди.

⁷ Йөне Давут патыша өзүниң Ёнатан билен Реббиң өңүнде әхт эдишендиги себәпли онуң оглы Мепибошеде рехим этди.

⁸ Давут Аяның гызы Риспаның Шавула догруп берен ики оглуны: Армоны билен Мепибошеди, шейле хем Шавулың гызы Мерабың мехолалы Барзыллайың оглы Адрыеле догруп берен бәш оглуны алып,

⁹ олары гибгонлыларың элине берди. Гибгонлылар олары дагда Реббиң хузурында өлдүрип, ериң йүзүне сердилер, оларың едисем билеликде өлди. Бу вака бахарда, арпа орагының илкинҗи гүнлеринде болупды.

¹⁰ Аяның гызы Риспа шол ердәки гаяның йүзүнде бир көне халтаны дүшенди-де, арпа орагының башындан тә җесетлериң үстүне ягыш ягып башлаянча, ол ерде отурды; ол җесетлери гүндизине гушлардан, гиҗесине вагшы хайванлардан горады.

¹¹ Аяның гызы, Шавулың гырнагы Риспаның бу эден ишини Давуда хабар бердилер.

¹² Давут барып, Шавул билен онуң оглы Ёнатаның сүңкүни Гилгатдакы ябешлилерден алды. Пилиштлилер олары Гилбогада өлдүрип, Бейтшеян мейданчасында асыпдылар. Гилгатдакы ябешлилер болса олары Бейтшеян мейданчасындан огурлапдылар.

¹³ Давут Шавул билен онуң оглы Ёнатаның сүңклерини ол ерден гетиртди. Өлдүрилип, ериң йүзүне серленлериң хем сүңклерини топладылар.

¹⁴ Давудың адамлары Шавул билен Ёнатаның сүңклерини Бенямин топрагында – Селада, Шавулың какасы Кишиң губры гойлан гүммезде җайладылар. Олар патышаның әхли табшырыгыны ерине етирдилер. Шондан соң Худай юрт үчин эдилйән дилеглери кабул этди.

¹⁵ Пилиштлилер Ысрайылың гаршысына ене урша башладылар. Давут өз эсгерлери билен урша чыкып, пилиштлилер билен урушды ве халыс ысгындан гачды.

¹⁶ Пилиштлилериң ири несиллеринден Йишбибеноп диен бир адам болуп, ол аграмы секиз йүз мысгал болан бүрүнч найза, билине тәзе гылыч дакынанды. Ол Давуды өлдүрмеги йүрегине дүвди.

¹⁷ Эмма Серуяның оглы Абышай оңа көмеге етишди ве пилиштли билен уршуп, оны өлдүрди. Шондан соң Давудың адамлары: «Инди сен бизиң билен биле сөвеше чыкма, гой, Ысрайылың чырасы сөнмесин» дийип, оңа касам этдилер.

¹⁸ Шундан соң ысрайыллар билен пилиштлилер Гопда сөвеше башладылар. Шонда хушалы Сибекай ири адамларың неслинден болан Сап диен бирини өлдүрди.

¹⁹ Соңра олар пилиштлилер билен Гопда ене чакнышдылар. Шонда бейтуллахамлы Ягырың оглы Элханан гатлы Җалуды өлдүрди. Җалудың найзасының сапы пүрс ялыды.

²⁰ Гат галасында ене уруш болды. Ол ерде ене пилиштлилериң ири неслинден, эллери ве аяклары алты-алтыдан йигрими дөрт бармаклы шиллиң узын бири барды.

²¹ Ысрайыла сөгендиги үчин Давудың доганы Шимганың оглы Ёнатан оны өлдүрди.

²² Буларың дөрдүси-де Гат галасының ири несиллериндендилер. Олар Давудың хем-де онуң эсгерлериниң элинден өлдүлер.