2 Şamuwel 2 - Мукаддес Китап

2‑нҗи бап Давут Яхуданың патышасы боляр

¹ Шондан соң Давут: «Яхуда галаларының бирине гидейинми?» дийип, Реббе йүз тутды. Реб: «Хава, гит!» дийип җогап берди. Давут: «Хайсына гидейин?» дийип сорады. Реб: «Хеброна» дийди.

² Шунлукда, Давут өзи билен ики аялыны – йизрегелли Ахыногамы хем-де кармелли Набалың дул галан аялы Абыгайылы алып, Хеброна гитди.

³ Давут адамларыны-да өз машгалалары билен биле әкитди. Шейдип, олар Хеброн галасының обаларында орнашдылар.

⁴ Яхуданың адамлары гелдилер ве Давудың башына яг гуюп, оны яхуда тиресине патыша белледилер. Олар Шавулы Гилгатдакы ябешлилериң җайландыгыны Давуда хабар беренлеринде,

⁵ Давут чапарларың үсти билен ябешлилере шейле хабар ёллады: «Өз җенабыңыз Шавулы җайлап, оңа вепалылык гөркезендигиңиз үчин, Реб сизи ялкасын!

⁶ Реб сизе мерхемет этсин хем вепалылык гөркезсин! Бу эден ишиңиз үчин менем сизе ягшылык эдерин.

⁷ Голларыңыз кувватлы болсун, өзүңизем мерт болуң! Җенабыңыз Шавул өлди, яхуда халкы мени патышалыга белледи».

Абнер Ышбошеди Ысрайылың патышасы эдйәр

⁸ Нериң оглы Абнер Шавулың гошунбашысыды. Ол Шавулың оглы Ышбошеди Маханайыма гетирди.

⁹ Абнер оны Гилгадың, Ашурың, Йизрегелиң, Эфрайымың, Беняминиң хем-де тутуш Ысрайылың патышасы этди.

^10-11 Ысрайыла патышалык эдип башланда, Шавулың оглы Ышбошет кырк яшындады. Ол ики йыл патышалык этди. Эмма яхуда тиреси Давудың ызына эерди. Хебронда яхуда тиресине Давут еди йыл алты ай бәри патышалык эдйәрди.

¹² Нериң оглы Абнер Шавулың оглы Ышбошедиң адамлары билен биле Маханайымдан Гибгона гитди.

¹³ Серуяның оглы Ёвап болса Давудың адамлары билен чыкып, Гибгон ховданының янында олар билен габатлашды. Бу ики топарың херси ховданың бир тарапында ерлешди.

¹⁴ Абнер Ёваба: «Гой, яш йигитлер өңе чыксынлар-да, баша-баш гүйч сынанышсынлар» дийди. Ёвап хем: «Гой, чыксынлар» дийди.

¹⁵ Олар өңе чыкдылар. Бенямин тиресинден Шавулың оглы Ышбошет тарапдан он ики адам, Давудың адамларындан хем он ики адам өңе сайланды.

¹⁶ Олар бири-бириниң келлесинден тутуп, гаршыдашының бөврүнден гылычларыны гечирдилер. Шейдип, оларың әхлисиниң ләши серилди. Шоңа гөрә-де Гибгондакы ол ере Хелкатхассурым диен ат берилди.

¹⁷ Шейдип, ол гүн җуда ёвуз сөвеш башланды. Абнер билен ысрайыллар Давудың адамларындан еңилдилер.

¹⁸ Серуяның үч оглы Ёвап, Абышай, Асахел дагы шол ердеди. Асахел эдил кейик ялы йылдамды.

¹⁹ Ол Абнери ызарлады. Ол хич тарапа совулман, гөни онуң ызындан барярды.

²⁰ Абнер ызына середип: «Асахел, бу сенми?» дийди. Ол: «Хава, мен» дийип җогап берди.

²¹ Абнер оңа: «Сагыңа я солуңа совлуп, яш эсгерлериң бирини тут-да, онуң затларыны тала» дийди. Йөне Асахел онуң ызындан галмады.

²² Абнер Асахеле ене: «Мени коваламаңы бес эт! Бирден сени ере пылчап ураймайын! Онсоң мен сениң доганың Ёвабың йүзүне нәхили середерин?» дийди.

²³ Йөне Асахел ыза гайтмак ислемеди. Шунлукда, Абнер найзасының уҗуны онуң ичинден гечирди. Асахел йыкылды, йыкылан еринде-де җан берди. Онуң өлен еринден геченлериң хеммеси ол ерде аяк чекдилер.

²⁴ Соңра Ёвап билен Абышай Абнериң ызындан коваладылар. Гүн яшанда, олар Гияның гаршысындакы, Гибгон чөлүне тарап гидйән ёлуң якасындакы Омах депесине етдилер.

²⁵ Беняминлер Абнериң дашына топландылар-да, бирлешдилер; олар бир депәниң үстүне чыкып дурдулар.

²⁶ Абнер Ёваба гыгырып шейле дийди: «Адамларың гылычдан гечирилмегиниң, хей, соңы гелмезми? Мунуң соңуның паҗыгалы болҗагыны билеңокмы? Гарындашларыны коваламагы бес этмеги үчин адамларыңа хачан буйрук берҗек?»

²⁷ Ёвап Абнере: «Дири Худайдан ант ичйән! Эгер өзүң сесленмедик болсаң, мениң адамларым өз гарындашларыны тә даңдана ченли ковалардылар» дийди.

²⁸ Ёвап шахдан эдилен сурнай чалды; адамлар сакландылар. Шондан соң олар ысрайыллары коваламагы, олар билен урушмагы бес этдилер.

²⁹ Абнер адамлары билен узак гиҗе Иордан дересинден йөреди. Олар Иордан дерясындан гечдилер; эртеси ирден хем йөрәп, Маханайыма гелдилер.

³⁰ Ёвап Абнери коваламагы бес эденден соң, адамларыны топлады. Давудың адамларындан Асахелден башга-да он докузы кемди.

³¹ Давудың адамлары Абнере гошулан беняминлерден үч йүз алтмыш адамы өлдүрди.

³² Олар Асахели әкидип, Бейтуллахамда – онуң өз какасының губры гойлан гүммезиң ичинде җайладылар. Соңра Ёвап адамлары билен узак гиҗе ёл йөрәп, даң агаранда Хеброна гелди.