2 Şamuwel 12 - Мукаддес Китап

12‑нҗи бап Натан пыгамбер Давуда кәейәр

¹ Реб Давудың янына Натан пыгамбери иберди. Ол Давудың янына барып, оңа шейле дийди: «Галаларың биринде бириси бай, бейлекиси гарып болан ики саны адам яшапдыр.

² Байың сүри-сүри гойнудыр сыгры болупдыр.

³ Гарыбың болса бар байлыгы еке-тәк гузуҗыгы экен. Ол оны сатын алып, өз янында чагалары билен биле улалдыпдыр. Ол өз эеси билен бир табакдан ийип, бир кәседен сув ичипдир. Гарып оны өз гуҗагында ятырян экен. Ол оңа эдил өз гызы ялы середипдир.

⁴ Гүнлерде бир гүн яңкы бай адамың өйүне мыхман гелипдир. Мыхман үчин өз гоюнларындан я-да сыгырларындан алып соймага онуң гөзи гыйман, хәлки гарыбың гузусыны алып, шондан нахар тайярлапдыр».

⁵ Бая җуда гахары гелип, Давут Натана: «Ребден ант ичйәрин, бу адамың башы өлүмлидир.

⁶ Шейле эдендиги хем рехимсизлиги үчин, ол гузыны дөрт эссе эдип гайтарар» дийди.

⁷ Натан Давуда шейле дийди: «Шол адам – сен! Ысрайыл Худайы Реб шейле диййәр: „Сени Ысрайыла патышалыга сайланам, Шавулың элинден халас эденем Мен.

⁸ Мен саңа хоҗайыныңың хоҗалыгыны бердим, аялларыны гуҗагыңа салдым. Саңа ысрайыл билен яхуда халкыны хем бердим. Булары аз гөрен болсаң, онда ене-де көп затлары берердим.

⁹ Нәме үчин сен Мен-Реббиң йигренйән ишлерини этмек билен, Мениң сөзүми әсгермедиң? Хет халкындан болан Урыяны сөвешде гылычдан гечирдип, онуң аялыны өзүңе аял эдиндиң. Оны аммонларың гылыҗы билен өлдүрдиң.

¹⁰ Мундан бейләк гылыч мүдимилик сениң неслиңиң депесинден дүшмез. Себәби сен Мени әсгермедиң ве хет халкындан болан Урыяның аялыны өзүңе аял эдиндиң“».

¹¹ Реб шейле диййәр: «Саңа эрбетлиги өз өйүңден дөредерин. Аялларыңы өз гөзүңиң алнында элиңден алып, якыныңа берерин. Ол якының гүндизиң гүнортаны аялларың билен ятар.

¹² Сен бу иши гизлин этдиң, эмма Мен муны тутуш Ысрайылың гөзүниң алнында, гүндизиң гүнортаны эдерин».

¹³ Давут Натана: «Мен Реббиң өңүнде гүнә газандым» дийди. Натан Давуда: «Реб сениң гүнәңи гечди; сен өлмерсиң.

¹⁴ Йөне бу иши этмек билен, сен Ребби долы әсгермезлик этдиң, шол себәпли сенден догулҗак чага өлер» дийди.

¹⁵ Шондан соң Натан өйүне гитди. Реб Давудың Урыяның аялындан доглан оглуны урды; чага агыр кеселледи.

Давудың оглы өлйәр

¹⁶ Давут чага үчин Худая ялбарды, агыз бекледи, отагына гирип, бүтин гиҗелер яныны ере берип ятды.

¹⁷ Көшгүң яшулулары гелип, оны ерден галдырмак иследилер. Эмма ол не еринден турды, не-де олар билен биле нахар ийди.

¹⁸ Единҗи гүн дийленде, чага ёгалды. Давудың адамлары бу хакда оңа хабар бермекден горкдулар. Олар: «Чага хениз дирикә, ол бизиң гепимизе гулак асмады. Инди чаганың өлендигини биз оңа нәхили айдарыс? Өзүне бир зат эдер» дийип ойландылар.

¹⁹ Йөне Давут адамларының арасында бир хышы-вышының бардыгыны гөрүп, чаганың ёгаландыгына дүшүнди. Ол адамларына: «Чага ёгалдымы?» дийди. Олар: «Хава, ёгалды» дийдилер.

²⁰ Давут еринден галды, ювунды, үстүне атыр сепди ве гейимлерини чалшырды. Соңра Реббиң өйүне гидип ыбадат этди. Соң өйүне гайдып гелди ве нахарланҗакдыгыны айтды. Өңүнде нахар гойдулар, ол нахарланды.

²¹ Адамлары оңа: «Чага дирикә, агыз бекледиң ве агладың. Ол ёгаландан соң болса, туруп нахарландың. Бу нәме этдигиң болды?» дийдилер.

²² Давут: «Чага дирикә, агыз бекледим, агладым. Себәби мен: „Ким билйәр, белки, Реб маңа рехим эдер, чага гутулар“ дийип ойланыпдым.

²³ Эмма ол ёгалансоң, мен нәме үчин агыз бекләйин? Мен оны ызына гетирип билеринми? Мен онуң янына гидерин велин, ол инди мениң яныма гелмез» дийип җогап берди.

Сүлейман догуляр

²⁴ Давут аялы Батшеба гөвүнлик берди ве онуң билен ятды. Батшеба бир огул догурды; Давут онуң адына Сүлейман дакды. Реб чаганы сөйди

²⁵ ве Реббиң хатырасы үчин, бу чаганың адына Едидя дакылмалыдыгы хакда Натан пыгамбериң үсти билен хабар иберди.

²⁶ Инди Ёвап аммонларың Раба галасының гаршысына урушярды. Ол ша галасыны басып алды.

²⁷ Ёвап Давуда: «Мен Раба галасына хүҗүм эдип, сув чешмелерини эеледим.

²⁸ Инди сен гошуның галан бөлегини топла ве галаның чар тарапындан чозуп, оны басып ал. Болмаса галаны өзүм басып аларын ве ол мениң адым билен атландырылар» дийип хабар иберди.

²⁹ Давут әхли гошуны топлап, Раба галасына хүҗүм эдип, оны боюн эгдирди.

³⁰ Давут аммонларың патышасының башындан алтын тәҗини алды; онуң аграмы ики путды, онуң йүзүне гымматбаха даш отурдыланды. Оны Давудың келлесине гейдирдилер. Давут галаданам көп мукдарда олҗа алды.

³¹ Галаның халкыны болса Давут галадан гөчүрип бычгы, демир кәтмен хем-де палта билен ишленилйән ишлере я-да керпич ишлерине гойды. Ол аммонларың әхли галаларында шейле эденден соң, әхли гошун билен биле Иерусалиме доланды.