2 Şamuwel 11 - Мукаддес Китап

11‑нҗи бап Давут билен Батшеба

¹ Яз паслында, патышаларың йөрише гидйән дөври Давут өз нөкерлерини, әхли ысрайыл гошуныны Ёвабың ёлбашчылыгы астында сөвеше ёллады. Олар аммонлары күл-пеекун этдилер, Раба галасыны габава алдылар. Эмма Давут Иерусалимде галыпды.

² Бир гүн агшамара Давут дүшегинден туруп, көшгүң үчегине чыкды-да, гезим этмәге башлады. Шол вагт сува дүшүнип дуран бир аяла онуң гөзи дүшди. Аял дийсең гөрмегейди.

³ Аялың кимдигини билмек ислән Давут онуң янына адам иберди. Иберилен гидип гелип, онуң Элигамың гызы, хет халкындан болан Урыяның аялы Батшебадыгыны Давуда хабар берди.

⁴ Давут адамларына аялы гетирмеги буюрды. Аял Давудың янына гелди. Давут айбашыдан яңы арассаланан Батшеба билен ятды. Соңра аял өйүне гайтды.

⁵ Аял гөврели болды ве Давуда: «Мен гөврели» дийип хабар ёллады.

⁶ «Хет халкындан болан Урыяны мениң яныма ибер» дийип, Давут Ёваба хабар этди. Ёвап Урыяны Давудың янына иберди.

⁷ Урыя янына геленде, Давут ондан Ёвабың ве гошуның хал-ягдайы, уршуң гидиши хакда сорашдырды.

⁸ Соңра ол Урыя: «Өйүңе бар-да, дынҗыңы ал» дийди. Урыя патышаның көшгүнден чыканда, онуң ызындан патышаның совгадыны хем әкитдилер.

⁹ Эмма Урыя өз җенабының әхли нөкерлери билен биле ша көшгүниң гапысында ятды; өйүне гитмеди.

¹⁰ Онуң өз өйүне гитмәндигини Давуда хабар беренлеринде, ол Урыядан: «Сен яңыҗа ёлдан гелдиң. Нәме үчин өйүңе гитмедиң?» дийип сорады.

¹¹ Урыя Давуда: «Әхт сандыгы билен ысрайыллардыр яхудалар чадырдакалар, җенабым Ёвапдыр онуң нөкерлери мейдандакалар, мен ийип-ичмек ве аялым билен ятмак үчин өйүме гидейинми? Сениң өмрүңден хем җаныңдан ант ичйәрин, мен бейле иш эдип билмерин» дийди.

¹² Давут Урыя: «Бу гүнем шу ерде бол, эртир мен сени ызыңа уградарын» дийди. Шунлукда, Урыя ол гүн хем Иерусалимде галды.

¹³ Эртеси гүн Давут оны чагырып, ийдирип-ичирип серхош этди. Агшам Урыя ене-де өз өйүне гитмән, җенабының нөкерлери билен биле өңки ятян ерине гитди.

¹⁴ Эртеси ирден Давут Ёваба хат язып, Урыядан иберди.

¹⁵ Давут хатында шейле язды: «Урыяны сөвешиң иң газаплы гидйән еринде гой-да, онуң янындан айрыл. Гой, ол яраланып өлсүн».

¹⁶ Ёвап галаны габав астында саклап, говы сынлансоң, гайдувсыз адамларың бар ерини билйәрди. Ол Урыяны шол ерде гойды.

¹⁷ Галаның адамлары чыкып, Ёвап билен сөвешмәге башладылар. Давудың нөкерлеринден бирнәчеси өлди. Өлдүриленлериң арасында хет халкындан болан Урыя-да барды.

¹⁸ Ёвап адам иберип, сөвеш барадакы маглуматларың әхлисини Давуда етирди.

¹⁹ Ол чапара шейле дийди: «Сөвеш хакындакы хабарларың әхлисини патыша гүррүң берип боланыңдан соң,

²⁰ патыша газаба мүнүп: „Нәме үчин гала бейле голай бардыңыз? Оларың сизи диварың үстүнден ока тутҗакдыкларыны билмейәрмидиңиз нәме?

²¹ Ерубагалың оглы Абымелеги бир аялың өлдүрендигини билмейәрмидиңиз? Тебезде ол аял диварың үстүнден оңа дегирмен дашыны зыңып өлдүрмәнмиди? Нәме үчин дивара гаты голай бардыңыз?“ дийәйсе, шол вагт: „Сизиң хет халкындан болан гулуңыз Урыя хем өлди“ диерсиң».

²² Чапар гидип, Ёвабың табшыранларының әхлисини Давуда гүррүң берди.

²³ Ол Давуда шейле гүррүң берди: «Душманың гүйҗи бизиңкиден агдык экен. Олар бизиң гаршымыза мейдана чыкдылар, эмма биз дервезәниң агзына ченли оларың ызларындан ковдук.

²⁴ Шонда яйчылар диварың үстүнден сениң адамларыңы ока тутдулар; оларың арасында өленлери хем болды. Хет халкындан болан гулуңыз Урыя хем шонда өлди».

²⁵ Давут чапара: «Ёваба айт, гой, бу иш үчин ол көп алада галмасын; гылыч кә оңа дегер, кә муңа. Галаның үстүне хүҗүми гүйчлендирсинлер-де, оны юмурсынлар. Шу сөзлер билен оны рухландыр» дийди.

²⁶ Урыяның аялы адамсының өлендигини эшидип, онуң ясыны тутды.

²⁷ Яс гутарандан соң, Давут адам иберип, ол аялы көшгүне гетиртди. Шейдип, ол Давудың аялы болды. Ондан Давудың бир оглы болды. Йөне Давудың эден бу иши Реббиң назарында неҗисликди.