2 Petrus 3 - Мукаддес Китап

3‑нҗи бап Реббиң гүни

¹ Эй, сөйгүли доганлар, инди сизе бу икинҗи хаты язярын. Бу ики хатымда-да сагдын пикирли болмалыдыгыңызы ятлатмак билен дүшүнҗәңизи оярярын.

² Мукаддес пыгамберлериң гадымыетде айдан хабарыны ве Реббимиз Халасгәриң ресулларыңыз аркалы сизе берен буйругыны ядыңыза салмакчы.

³ Әхли затдан өңүрти шуны билиң: ахыркы гүнлерде өз бетнебислерине чапян бихая яңсылайҗылар пейда болар.

⁴ Олар: «Ханы, Реббиң гелҗекдиги барада берен вадасы? Ата-бабаларымыз өленден бәри хемме зат овал-башда нәхили ярадылан болса, шонуң ялы хем дур» дийип яңсыларлар.

⁵ Эмма олар гөгүң эзелден Худайың сөзи аркалы ярадыландыгыны, ер болса сувдан бөлүнип, сув билен гуршаландыгыны билгешлейин ятдан чыкаран болярлар.

⁶ Шейле хем гадымы дүнйә шол сув-сил билен вейран болды.

⁷ Ине, хәзирки ер билен асман болса Худайың сөзи билен сакланып, худайсыз адамларың хөкүм ве хеләк эдилҗек гүнүне ченли от үчин тайяр дур.

⁸ Эй, сөйгүли доганлар, бир зады унутмаң: Реббиң назарында бир гүн мүң йыл, мүң йыл болса бир гүн ялыдыр.

⁹ Кәбирлери Реб Өз берен вадасыны берҗай этмеги гиҗикдирйәр дийип хасап этселер-де, Ол гиҗикдирмез. Реб сизиң үчин сабыр эдйәндир, себәби Ол хич кимиң хеләк болман, хеммелериң тоба этмегини ислейәр.

¹⁰ Эмма Реббиң гүни гиҗеки огры кимин гелер. Шонда асман улы гүпүрди билен йитер, асман җисимлери янып даргар, ер ве онда эдилен әхли ишлер әшгәр болар.

^11-12 Әхли зат шейдип даргаҗак болса, онда сизиң нәхили адамлар болмагыңыз герек? Худайың гүнүне гарашып, оны чалтландырып, Худайың пәк йөрелгесине эермегиңиз герек. Ол гүн асман янып ёк болар, асман җисимлери янып эрәр.

¹³ Эмма биз Худайың вадасына эсасланып, догрулыгың меканы болан тәзе асмана ве тәзе ере гарашярыс.

¹⁴ Шоңа гөрә-де, эй, сөйгүли доганлар, булара гарашяндыгыңыз үчин, Худайың назарында парахатлыкда яшап, пәк ве айыпсыз болмага җан эдиң.

¹⁵ Шейле хем шуны ятда саклаң, Реббимиз сизиң халас болмагыңыз үчин сабыр эдйәр. Сөйгүли доганымыз Павлус хем өзүне берлен акылдарлык боюнча сизе бу хакда языпды.

¹⁶ Ол әхли хатларында шулар барада гүррүң ачяндыр. Оларда языланларың кәбирине дүшүнмек кындыр. Надан хем дурнуксыз адамлар бу языланлары ве бейлеки Мукаддес Язгылары ёймак билен өзлери хеләк болярлар.

¹⁷ Шонуң үчин хем, эй, сөйгүли доганлар, бу затлары өңден билйәндигиңиз үчин, хүшгәр болуң! Имандан дәнмезиңиз ялы, азгын адамлар сизи ёлдан чыкармасын.

¹⁸ Реббимиз ве Халасгәримиз Иса Месихиң мерхеметинде өсүң, Оны танамакда хас-да илерләң. Шиндиден эбедә ченли Оңа шан-шөхрат болсун! Омын.