2 Petrus 2 - Мукаддес Китап

2‑нҗи бап Галп мугаллымларың пислиги

¹ Өңлер халк арасында галп пыгамберлериң болшы ялы, сизиң араңызда-да галп мугаллымлар пейда болар. Олар хеләклейҗи ве ялан таглыматлар гетирмек билен, өзлерини есирликден бошадан Ребби-де инкәр эдерлер. Шейдип, өз башларындан дуйдансыз бела-бетер индерерлер.

² Көп адамлар оларың азгынчылыклы йөрелгелерине эерерлер, шолар себәпли хакыкат ёлуна дил етирилер.

³ Ачгөзлүкден яңа бу галп мугаллымлар өз тослама хекаятлары билен сизиң пулуңызы үтерлер. Шонуң үчин оларың җезасы гадымдан тайяр дурандыр, хеләкчилиги болса гиҗикмез.

⁴ Худай хатда гүнә иш эден перишделери-де аямады. Хөкүм гүнүне ченли саклансынлар дийип, олары зынҗырлап, довзахың түм гараңкы гирдабына габап гойды.

⁵ Худай гадымы дүнйәни хем аямады. Ол худайсызлар дүнйәсини сил алдырды, диңе догручыллыгың вагызчысы Нухы ве ондан башга еди кишини аман галдырды.

⁶ Содом ве Гомора шәхерлерини якып-яндырып вейран этди ве булары гелҗекде худайсызлара нәме болҗакдыгыны билмәге сапак болсун дийип этди.

⁷ Азгынларың ахлаксыз яшайшындан җебир чекен догручыл Луты халас этди.

⁸ Догручыл Лут бу халкың арасында яшап, оларың нәхак ишлерини гөрүп-эшитмек билен, өз догручыл калбында гүнсайын эҗир чекерди.

⁹ Гөршүңиз ялы, Реб худайхон адамлары сынагдан нәхили халас этмелидигини, яманлык эдйәнлери болса хөкүм гүнүне ченли җеза астында нәхили сакламалыдыгыны билйәндир.

¹⁰ Айратын-да харам хөвеслерине ковалашып, Онуң хөкмүрованлыгыны әсгермейәнлери-де нәме этҗегини Ол билйәндир. Бейле адамлар батырсыраярлар, текепбирленйәрлер ве гөкдәки гүйчлере дил етирмекден горкмаярлар.

¹¹ Перишделер хатда булардан хас гүйчли ве гудратлы болсалар-да, Худайың хузурында гөкдәки гүйчлере дил етирмәге милт этмейәрлер.

¹² Эмма бу адамлар дүшүнмейән затларына дил етирйәрлер. Олар авланып, ёк эдилмек үчин доглан дүшүнҗесиз ябаны хайванлар ве өз угруна херекет эдйән махлуклар ялыдырлар. Булар хайванлар ялы-да ёк болуп гидерлер.

¹³ Олар өз эден яманлыкларына лайык җезасыны аларлар. Олар гүндизиң гүни кейп чекмекден хыҗувланярлар. Булар масгара хем йүзүгарадырлар. Сизиң билен нахар иййән вагты хем олар өзлериниң хилегәрликлеринден кейп алярлар.

¹⁴ Оларың зынадан гөзлери доймаяр, хич вагт гүнәни бес этмейәрлер. Олар дурнуксыз кишилери дузага дүшүрип аздырярлар. Оларың калбы ачгөзлүге югрулып, нәлетленен адамлардыр.

¹⁵ Олар Бегорың оглы Билгамың ызына эермек билен, догры ёлы терк эдип азашдылар. Билгам харам ёл билен пул газанмагы халады.

¹⁶ Эмма онуң гүнәси паш болды. Дилсиз-агызсыз эшек ынсан дилинде гепләп, пыгамбериң тентеклигине бөвет болды.

¹⁷ Бу адамлар болса гурап галан чешмедир, гүйчли елиң ковян үмрүдир; довзахда гараңкы түмлүк шолар үчин сакланяндыр.

¹⁸ Олар нәдогры ёлдан яңы гачып гутуланлары бош ве гопбамсы сөзлери билен харам кейпе хыҗувландырып, ынсан хөвеслери билен олары дузага дүшүрйәрлер.

¹⁹ Өзлери азгынлыгың гулы болубам, олара эркинлиги вада берйәрлер, себәби адам нәмеден еңилсе, онуң гулы боляндыр.

²⁰ Адамлар Реббимиз хем Халасгәримиз Иса Месихи танамак аркалы дүнйәниң писликлеринден гачып гутулдылар. Эгер олар мундан соңам ене шунуң ялы ишлере баш гошуп, гүнәниң гулы болсалар, онда оларың соңкы ягдайы өңки ягдайындан-да бетер болар.

²¹ Догрулык ёлуны биленден соң, өзлерине табшырылан мукаддес буйругы инкәр эденинден бу ёлы асла билмезлик олар үчин хас говы боларды.

²² Ине: «Ит өз гусугына доланып гелер», шейле хем: «Ювнан доңуз ене батга булашмага гелер» диен накылларың хакыкатдыгыны олар өз дурмушында субут этдилер.