2 Patyşalar 3 - Мукаддес Китап

3‑нҗи бап Ысрайыл Мовап билен урушяр

¹ Яхуда патышасы Ехошападың патышалыгының он секизинҗи йылында Ахабың оглы Ёрам Ысрайыла патыша болды. Ол Самарияда он ики йыл патышалык этди.

² Ёрам Реббиң назарында йигренҗи ишлери этди. Эмма ол какасы, эҗеси ялы дәлди, чүнки ол какасының Багала дикен дашыны айырды.

³ Муңа гарамаздан, Ёрам Небадың оглы Яробгам ялы Ысрайыла гүнә этдирип, пис ишлери этмекден эл чекмеди.

⁴ Мовап патышасы Мешаның гоюнлары сан-саҗаксызды. Ол Ысрайыл патышасына йүз мүң гузы билен йүз мүң гочуң йүңүни ибермелиди.

⁵ Ахап өленден соң Мовап патышасы Ысрайыл патышасына гаршы гозгалаң турузды.

⁶ Онсоң Ёрам дессине Самариядан гидип, бүтин ысрайыл халкыны йыгнады.

⁷ Ёрам Яхуда патышасы Ехошапада хабар ёллап, ондан: «Мовап патышасы маңа гаршы уруш турузды. Сен мениң билен Мовабың гаршысына урша гидерсиңми?» дийип сорады. Ехошапат Ысрайыл патышасына: «Менем, эсгерлеримем, атлы гошунымам сениң хызматыңдадырыс» дийип җогап берди.

⁸ Онсоң Яхуда патышасы Ехошапат Ёрамдан: «Хайсы тарапдан хүҗүм эдели?» дийип сорады. Ысрайыл патышасы Ёрам: «Эдом чөлүниң ёлы билен хүҗүм эдерис» дийип җогап берди.

⁹ Шейдип, Ысрайыл, Яхуда ве Эдом патышалары биле ёла дүшдүлер. Олар еди гүнлүк айлавлы ёлы геченлеринден соң, пыяда гошун ве оларың янындакы маллар үчин хич хили сувлары галмады.

¹⁰ Ысрайыл патышасы Ёрам: «Вах, Реб бизи, үч патышаны Мовабың элине бермек үчин бир ере йыгнан экен» дийди.

¹¹ Эмма Ехошапат: «Ребден сорап гөрер ялы бу ерде Реббиң пыгамбери ёкмы?» дийди. Онсоң Ысрайыл патышасының эмелдарларының бири: «Шападың оглы Эляша шу ерде. Ол Ылясың элине сув акыдарды» дийип җогап берди.

¹² Ехошапат: «Онда Реббиң сөзи бар» дийди. Шейдип, Ысрайыл, Яхуда хем-де Эдом патышалары биле тиркешип, Эляшаның янына гитдилер.

¹³ Эляша Ысрайыл патышасына: «Сен нәме үчин мениң яныма гелйәрсиң? Сен какаңың, эҗеңиң пыгамберлериниң янына гит» дийди. Эмма Ысрайыл патышасы Ёрам оңа: «Ёк, Реббиң хут өзи бизи, үч патышаны диңе Мовабың элине бермек үчин бир ере йыгнан экен» дийди.

¹⁴ Эляша Ысрайыл патышасына шейле дийди: «Хызмат эдйән Хөкмүрован Реббимиң адындан ант ичйәрин, мен Яхуда патышасына сарпа гойянлыгым үчин сениң билен геплешйәрин, ёгсам мен сениң йүзүңе-де серетмездим.

¹⁵ Инди маңа бир сазанда гетириң». Сазанда саз чалып отырка, Эляшаның калбына Реббиң гүйҗи гелди.

¹⁶ Эляша шейле дийди: «Реб шейле диййәр: „Шу гуры җар хендеклерден долар.

¹⁷ Сиз хич хили ел, ягыш гөрмесеңиз-де, бу җар сувдан долуп, әхлиңиз мал-гараларыңыз билен биле шол сувдан ичерсиңиз“.

¹⁸ Бу затлар Реб үчин гаты аңсатдыр. Ол Мовабы-да сизиң элиңизе берер.

¹⁹ Сиз моваплыларың әхли галаларыны, сайлама галаларыны басып алып, әхли мивели агачларыны чапарсыңыз, оларың әхли сув чешмелерини бентләп, әхли оңат экеранчылык ерлерини дашлардан долдурып вейран эдерсиңиз».

²⁰ Эртеси гүн гала гурбанлыгың берилмели вагты, бирденкә Эдом тарапдан сув акып башлап, ол ер тутушлыгына сувдан долды.

²¹ Үч патышаның өзлерине гаршы урушмага чыканыны эшиден моваплылар эли яраг тутан яшларындан башлап, тә иң гаррыларына ченли барыны йыгнап, олары серхетде нызама дуруздылар.

²² Моваплылар эртеси ир билен туранларында, Гүн сувуң йүзүне шөхле сачярды. Олар гаршыларындакы сувуң ган ялы гызылдыгыны гөрдүлер.

²³ Олар: «Бу гандыр. Патышалар өз араларында уршуп, бири-бирлерини өлдүрендирлер. Эй, моваплылар, гелиң, оларың олҗасыны талалың!» дийип гыгырышдылар.

²⁴ Моваплылар ысрайылларың дүшелгесине геленде, ысрайыллар аяга галып, оларың гаршысына хүҗүме гечдилер. Ысрайыллар моваплылары ызына ковуп чыкардылар. Олар Моваба чозуп гирип, уршы ол ерде хем довам этдирдилер.

²⁵ Ысрайыллар бүтин Мовабың галаларыны ер билен егсан эдип, оларың әхли оңат экеранчылык ерлерини дашдан долдурып вейран этдилер, әхли сув чешмелерини бентләп, әхли мивели агачларыны чапдылар. Диңе Мовабың пайтагты Кирхараседиң керпич диварлары йыкылман галды, йөне сапанлы эсгерлер оны хем габап, галаның үстүне хүҗүм этдилер.

²⁶ Мовап патышасы душманларының өзүнден үстүн чыкып баряныны гөренде, янына еди йүз саны гылычлы эсгер алып, Эдом патышасының гошунларының ичинден бөвсүп гечмекчи болды, эмма бу баша бармады.

²⁷ Онсоң Мовап патышасы өз орнуна патыша болҗак новбахар оглуны галаның диварында якма гурбанлыгы хөкмүнде хөдүрледи. Ысрайыла гаршы гахар-газап мөвҗеди. Шонуң үчин хем ысрайыллар Мовапдакы сөвеши бес эдип, өз юртларына доландылар.