2 Patyşalar 25 - Мукаддес Китап

25‑нҗи бап Иерусалимиң сынмагы

¹ Сидкияның патышалыгының докузынҗы йылының онунҗы айының онуна Бабыл патышасы Небукаднесар бүтин гошуны билен Иерусалиме хүҗүм эдип, онуң гаршысында дүшелге гурды. Олар Иерусалиме гирмек үчин, онуң даш-төверегинде япгыт гурдулар.

² Шейдип, Сидкияның патышалыгының он биринҗи йылына ченли Иерусалим габавда дурды.

³ Дөрдүнҗи айың докузынҗы гүнүнде шәхерде ачлык артып, юрдуң илаты иймәге чөрегем тапмады.

⁴ Галаның диварының бир бөлеги душман тарапындан йыкылыпды. Бабыллылар галаның даш-төверегини гуршап алан болсалар-да, Сидкия әхли эсгерлери билен гиҗе патышаның багының гапдалындакы ики диварың арасындакы дервезеден чыкып, Иордан дересине тарап гачып гитдилер.

⁵ Эмма бабыллыларың гошуны патышаның ызындан ковуп, Ерихо дүзлүгинде ызындан етди. Патышаның бар гошуны онуң янындан гачып, дагашып гитдилер.

⁶ Онсоң бабыллылар патышаны тутуп, Рибла гетирдилер. Шол ерде Бабыл патышасы оңа хөкүм чыкарды.

⁷ Олар Сидкияның огулларыны онуң гөзүниң алнында өлдүрдилер. Онсоң олар шол ерде Сидкияның гөзлерини ойдулар-да, зынҗыр билен баглап, Бабыла алып гитдилер.

Ыбадатхана вейран эдилйәр

⁸ Бабыл патышасы Небукаднесарың патышалыгының он докузынҗы йылының бәшинҗи айының онунҗы гүни шаның җанпеналарының баштутаны хем эмелдары Небузарадон Иерусалиме гелди.

⁹ Небузарадон Реббиң өйүне, патышаның өйүне ве Иерусалимиң әхли җайларына от берди; ол улы җайларың әхлисини якды.

¹⁰ Бабыллыларың җанпеналарың баштутаны билен гелен бүтин гошуны Иерусалимиң даш-төверегиндәки диварларыны йыкды.

¹¹ Җанпеналарың баштутаны Небузарадон халкың шәхерде аман галанлары, Бабыл патышасының тарапына гечен гачгаклары ве бейлеки галан илаты есир эдип әкитди.

¹² Эмма җанпеналарың баштутаны юрдуң гарып-гасарларының кәбирлерини үзүмчилик ве дайханчылык билен мешгуллансынлар дийип гоюп гайтды.

¹³ Бабыллылар Реббиң өйүндәки бүрүнч сүтүнлери, шейле хем ол ердәки арабалары ве бүрүнч ховзы парчалап, әхли бүрүнҗи Бабыла алып гитдилер.

¹⁴ Олар ыбадатхана хызматы үчин уланылян газанлары, күл атарлары, әтишгирлери, якымлы ыслы түтетги якмак үчин уланылян гаплары ве бейлеки әхли бүрүнч гап-гачлары Бабыла алып гитдилер.

¹⁵ Җанпеналарың баштутаны булардан башга-да маңңаллары ве легенлери алып гитди. Ол алтындан ясалан затлары алтыны үчин, күмүшден ясалан затлары хем күмши үчин алып гитди.

¹⁶ Сүлейманың Реббиң өйи үчин эден ики сүтүниниң, бир ховзуның, арабаларының ве әхли гап-гачларың бүрүнҗиниң аграмы чәксизди.

¹⁷ Бир сүтүниң бейиклигиниң өзи он секиз тирсекди. Сүтүниң депесинде-де бир саны бүрүнч тәч барды. Бир тәҗиң бейиклиги үч тирсекди ве тәҗиң даш-төверегине айланан нарлардыр өрме зынҗырлар хем тутуш бүрүнчден ясаланды.

Яхуда халкы Бабыла есир эдип әкидилйәр

¹⁸ Җанпеналарың баштутаны баш руханы Серая билен икинҗи руханы Сепаняны хем-де үч саны гапы сакчысыны Бабыла есир эдип әкитди.

¹⁹ Ол шәхерде галан эсгерлериң баштутаны эдип белленен бир харбы серкердәни, патышаның шәхерден тапылан бәш саны маслахатчысыны, юрдуң илатыны гошуна язян серкерде мүрзәни ве юрдуң илатының шәхерден тапылан алтмыш баштутаныны хеммелер билен алып гитди.

²⁰ Җанпеналарың баштутаны Небузарадон олары тутуп, Хамат юрдуның Рибла галасына, Бабыл патышасының янына гетирди.

²¹ Бабыл патышасы Хамат юрдуның Рибла галасында оларың барыны өлдүрди. Шейдип, яхуда халкы өз юрдундан есир эдилип әкидилди.

Яхуда хәкими Гедаля

²² Бабыл патышасы Небукаднесар Яхудада галдыран халкының үстүнден Шапаның агтыгы, Ахыкамың оглы Гедаляны хәкимлиге белледи.

²³ Инди бүтин гошунбашылар ве оларың адамлары Бабыл патышасының Гедаляны хәким эдип белләндиги барада эшиденлеринде, Нетаняның оглы Ысмайыл, Кареяның оглы Ёханан, нетопалы Танхуметиң оглы Серая ве бир магакатлының оглы Язаня дагы өз гошунлары билен Миспа, Гедаляның янына гелдилер.

²⁴ Гедаля олара ве оларың гошунына йүзленип, ант ичип: «Бабыллыларың хөкүмдарларындан горкмаң. Юртда месген тутуп, Бабыл патышасына гуллук эдиң. Шонда сизе оңат болар» дийди.

²⁵ Эмма единҗи айда патыша неслинден болан Элишаманың агтыгы, Нетаняның оглы Ысмайыл өзүниң он адамы билен Гедаляның янына гелди ве олар оны өлдүрдилер. Шейле хем олар Миспада, Гедаляның янында болан яхудалары ве бабыллылары-да өлдүрдилер.

²⁶ Онсоң адамларың улудан-кичә бары ве гошунбашылар Мүсүре тарап ёла дүшдүлер, чүнки олар бабыллылардан горкярдылар.

Ехоякын есирликден бошадыляр

²⁷ Яхуда патышасы Ехоякының есирлигиниң отуз единҗи йылының он икинҗи айының йигрими едисине Эвилмеродак Бабыла патыша болуп, Яхуда патышасы Ехоякыны есирликден бошатды.

²⁸ Ол Ехоякын билен мәхирли болуп, тагтыны өзи билен Бабыла сүргүн эдилен башга патышаларың тагтларындан ёкарда гойды.

²⁹ Шейдип, Ехоякын өзүниң есирликдәки эшиклерини чалшырды. Ол бүтин өмрүне патышаның сачагындан нахарланды.

³⁰ Онуң гүнделик экленҗи өмрүниң ахырына ченли хемише патыша тарапындан берилди.