2 Patyşalar 22 - Мукаддес Китап

22‑нҗи бап Яхуда патышасы Ёшыя

¹ Ёшыя патыша болан вагты секиз яшындады. Ол Иерусалимде отуз бир йыл патышалык этди. Онуң эҗеси Едида боскатлы Адаяның гызыды.

² Ёшыя Реббиң назарында догры ишлери этди. Ол сага-сола совулман, атасы Давудың ёлларындан йөреди.

Төврат тапыляр

³ Ёшыяның патышалыгының он секизинҗи йылында патыша Асаляның оглы, Мешулламың агтыгы Шапан мүрзәни шейле табшырык билен Реббиң өйүне иберди:

⁴ «Баш руханы Хилкияның янына бар-да, оңа гапы сакчыларының халкдан йыгнап, Реббиң өйүне гетирен күмшүниң барыны сана дий.

^5-6 Гой, ол күмүш Реббиң өйүниң ишине белленен баштутанларың элине берилсин. Баштутанлар хем бу күмши Реббиң өйүни беҗерйән ишчилере, агач уссаларына ве даш өрүҗилере хем-де бейлеки гурлушыкчылара берсин. Гой, олар бу күмши Реббиң өйүни беҗерер ялы агач ве ёнулан даш сатын алмак үчин улансынлар.

⁷ Эмма оларың элине берлен күмшүң хетди-хасабы соралмасын, чүнки олар садыклык билен ишлейәрлер».

⁸ Баш руханы Хилкия Шапан мүрзә: «Мен Реббиң өйүнден Төврады тапдым» дийди. Хилкия китабы оңа берди, ол хем бу китабы окады.

⁹ Онсоң Шапан мүрзе патышаның янына гелип: «Сениң гулларың Реббиң өйүндәки бар күмши бошадып, Реббиң өйүниң ишине белленен баштутанларың элине берипдирлер» дийип, бар зады оңа хабар берди.

¹⁰ Шапан мүрзе патыша ене: «Хилкия руханы маңа бир китап берди» дийди. Онсоң ол китабы алып, патыша сесли окап берди.

¹¹ Патыша Төврадың сөзлерини эшидип, якасыны йыртды.

¹² Онсоң патыша Хилкия рухана, Шапаның оглы Ахыкама, Микаяның оглы Акбора, Шапан мүрзә ве өз хызматкәри Асая шейле табшырык берди:

¹³ «Барың-да, тапылан бу китапдакы айдылян сөзлере гөрә мениң үчин, мениң халкым болан бүтин яхуда халкы үчин Ребден сораң, чүнки Реббиң бизе гаршы ловлаян газабы гаты гүйчлүдир. Бизиң аталарымыз бу китабың бизиң үчин язылан сөзлерини берҗай этмедилер».

¹⁴ Шейдип, Хилкия руханы, Ахыкам, Акбор, Шапан ве Асая дагы Хулда атлы пыгамбер аялың янына гитдилер. Хулда эгин-эшик сакчысы Хархасың агтыгы, Тикваның оглы Шаллумың аялыды. Ол аял Иерусалимиң икинҗи бөлүминде яшаярды.

¹⁵ Хулда олара: «Ысрайыл Худайы Реб сизи мениң яныма иберен адама шейле диййәр:

¹⁶ Реб шейле диййәр дийиң: „Мен Яхуда патышасының бу китапда окан затларына гөрә хөкман бу ере ве бу ерде яшаянларың башына бир бетбагтчылык индерерин.

¹⁷ Оларың Мени терк эдип, башга худайлара якымлы ыслы түтетги якып, өз пис ишлери билен Мениң гахарымы гетирендиклери үчин Мениң булара болан гахарым хас туташды, ол инди хич хачан сөнмез“.

¹⁸ Эмма Ысрайыл Худайы Реб Өзүнден сорамак үчин шу ере ёллан Яхуда патышасына онуң эшиден сөзлери барада шейле диййәр:

¹⁹ „Мениң бу юрды вейран эдип, онуң яшайҗыларыны нәлетлемек барадакы сөзлерими эшидениңде, сениң йүрегиң юмшады. Өзүңи Реббиң хузурында песелтдиң, якаңы йыртып, өңүмде дады-перят этдиң. Шонуң үчин Мен сениң дилегиңи эшитдим. Муны Мен-Реб айдяндырын.

²⁰ Инди Мен сени аталарыңың янына йыгнарын, сен асудалык билен өз габрыңа гирерсиң. Мениң бу ере гетирҗек бетбагтчылыгымы сен гөрмерсиң“». Олар бу хабары патыша етирдилер.