2 Patyşalar 21 - Мукаддес Китап

21‑нҗи бап Яхуда патышасы Манаша

¹ Манаша патыша боланда он ики яшындады. Ол Иерусалимде элли бәш йыл патышалык этди. Онуң эҗесиниң ады Хепсибады.

² Реббиң ысрайылларың арасындан ковуп чыкаран миллетлериниң эден неҗис ишлери ялы Манаша хем Реббиң назарында неҗис ишлери этди

³ Манаша какасы Хизкияның ёк эден сеждегәхлерини дикелтди. Ол Ысрайыл патышасы Ахабың эдиши ялы, Багал үчин гурбанлык сыпаларыны гуруп, Ашера бутларыны дикди. Ол әхли асман җисимлерине сежде эдип, шолара гуллук этди.

⁴ Ол Реббиң: «Иерусалимде маңа ыбадат эдилер» диен Реббиң өйүнде бутлар үчин гурбанлык сыпаларыны бина этди.

⁵ Манаша Реббиң өйүниң ики ховлусында әхли асман җисимлери үчин гурбанлык сыпаларыны бина этди.

⁶ Манаша оглуны отдан гечирди, гөзбагчылык ве тәлее гарамаклык билен мешгулланды. Ол палчылык, җадыгөйлик билен иш салышды. Ол Реббиң гахарыны гетирип, Онуң назарында көп йигренҗи ишлери этди.

⁷ Манаша ясан ойма Ашера бутуны Реббиң өйүнде гойды. Бу өй Реббиң Давуда ве онуң оглы Сүлеймана: «Маңа шу өйде ве бүтин Ысрайыл тирелеринден сечип алан шәхерим Иерусалимде ыбадат эдилер.

⁸ Эгер олар мениң әхли табшырыкларымы ве гулум Мусаның олара табшыран кануныны берҗай этселер, Мен мундан бейләк ысрайыл халкыны аталарына берен юрдумдан дашары чыкартмарын» диен өйүди.

⁹ Эмма олар муңа гулак асмадылар. Манаша халкы шейле бир аздырды велин, олар Реббиң ысрайыл халкының өңүнден ковуп чыкаран миллетлеринден хем көп пис ишлери этдилер.

^10-11 Реб Өз гуллары пыгамберлер аркалы шейле дийди: «Яхуда патышасы Манаша неҗис ишлери билен өзүнден озалкы аморларың эден ишлеринден-де хас бетер пис ишлери этди ве өз бутлары билен Яхуда гүнә этдирди.

¹² Шонуң үчин-де Ысрайыл Худайы Реб шейле диййәр: „Ине, Мен Иерусалимиң ве Яхуданың башына шейле бир бетбагтчылык гетирерин велин, ол барада эшиден хер кишиниң йүреги ярылар.

¹³ Мен Самарияның ве Ахабың несиллериниң башына нәхили гүнлери салан болсам, Иерусалимиң башына-да шол гүнлери саларын. Бир кишиниң гап-чанагы сүпүрип, арассалап, дүңдерип гойшы ялы, Мен-де Иерусалими сырып-сүпүрип ёк эдерин.

¹⁴ Мирасымдан – ысрайыллардан аман галанлары ташларын-да, олары душманларының элине берерин. Олар әхли душманларына талаң ве олҗа боларлар.

¹⁵ Чүнки олар Мениң йигренйән ишлерими эдип, аталарының Мүсүрден чыкан гүнүнден, тә шу гүне ченли Мени газапландырып гелдилер“».

¹⁶ Манаша яхудалара гүнә этдирип, олар Реббиң назарында йигренҗи ишлери этдилер. Мунуң үстесине-де, Манаша Иерусалими бойдан-баша бигүнә гандан долдурды.

¹⁷ Манашаның галан ишлери ве әхли эден ишлери, гүнәлери барада яхуда патышаларының йыл язгыларында языландыр.

¹⁸ Манаша ата-бабаларына говушды. Ол өз көшгүниң багы болан Уза багында җайланды. Оглы Амон онуң ерине патыша болды.

Яхуда патышасы Амон

¹⁹ Амон патыша болан вагты йигрими ики яшындады. Ол Иерусалимде ики йыл патышалык этди. Онуң эҗеси Мешуллемет ётбалы Харусың гызыды.

²⁰ Амон какасы Манаша ялы Реббиң назарында йигренҗи ишлери этди.

²¹ Ол какасының йөрән ёлларындан йөрәп, онуң сежде эден бутларына сежде эдип, шолара гуллук этди.

²² Амон аталарының Худайы Ребби терк эдип, Онуң ызына эермеди.

²³ Амоның нөкерлери оңа гаршы дилдүвшүк гурап, оны өз көшгүнде өлдүрдилер.

²⁴ Эмма юрдуң илаты Амон патыша гаршы дилдүвшүк гуранларың барыны өлдүрип, онуң ерине оглы Ёшыяны патыша этди.

²⁵ Амоның бейлеки ишлери яхуда патышаларының йыл язгыларында языландыр.

²⁶ Ол Уза багында, өз губурунда җайланды. Онсоң оглы Ёшыя онуң ерине патыша болды.