2 Patyşalar 14 - Мукаддес Китап

14‑нҗи бап Яхуда патышасы Амазя

¹ Ехогахазың оглы Ысрайыл патышасы Еховашың шалыгының икинҗи йылында Ёвашың оглы Амазя Яхуда патыша болды.

² Ол патыша болан вагты йигрими бәш яшындады. Ол Иерусалимде йигрими докуз йыл патышалык этди. Онуң эҗеси Иерусалимден болуп, ады Ехогадынды.

³ Амазя Реббиң назарында догры ишлери этсе-де, атасы Давут ялы дәлди. Ол какасы Ёвашың эден ишлери ялы ишлер этди.

⁴ Эмма сеждегәхлер айрылмады. Адамлар энтек-энтеклерем шол ерлерде гурбанлык берип, якымлы ыслы түтетги якярдылар.

⁵ Амазя өз патышалыгыны кувватландырып, патыша вагты какасыны өлдүрен хызматкәрлери өлдүрди.

⁶ Йөне Мусаның Төвратда берлен табшырыкларыны берҗай эдип, Амазя какасыны өлдүрен хызматкәрлериң огулларыны өлдүрмеди, чүнки Реб шол китапда: «Аталар огуллары үчин өлүме хөкүм эдилмесин. Огуллар хем аталары үчин өлүме хөкүм эдилмесин. Хер ким диңе өз эден җенаятына гөрә өлүме хөкүм эдилсин» дийип табшырык берипди.

⁷ Амазя Дуз җүлгесинде он мүң саны эдомлыны гырып, Села галасыны басып алды. Ол Села галасыны Ёктеел дийип атландырды. Ол шу гүне ченли хем шейле атландырылып гелйәр.

⁸ Онсоң Амазя Ехогахазың оглы, Ехувың агтыгы Ысрайыл патышасы Еховаша чапарлар ёллап: «Гел, йүзбе-йүз гөрүшели» дийди.

⁹ Ысрайыл патышасы Еховаш Яхуда патышасы Амазяның янына адам иберип, шейле дийди: «Ливандакы яндак Ливандакы кедр агаҗына савчы ёллап: „Гызыңы оглума аяллыга бер“ дийип сорапдыр. Эмма Ливандакы бир вагшы хайван гечип барярка яндагы депеләпдир.

¹⁰ Элбетде, сен эдомлылары гырдың ве муңа сениң гөвнүң галкды. Шу еңшиңе гуван-да, өйүңде отур. Сен нәме үчин урушмага бахана агтарярсың? Сен өзүңиң ве Яхуданың халкының башына бела гетирерсиң».

¹¹ Эмма Амазя муңа гулак асмады. Шейдип, Ысрайыл патышасы Еховаш өз гошуны билен Яхуда патышасы Амазяның үстүне гитди. Еховаш Яхуданың Бейтшемеш диен еринде Амазя гаршы урушда онуң билен йүзбе-йүз болды.

¹² Яхудалар ысрайыл халкындан еңлип, өз чадырларына тарап гачып гитдилер.

¹³ Ысрайыл патышасы Еховаш Ахазяның агтыгы, Ёвашың оглы Яхуда патышасы Амазяны Бейтшемешде тутды. Онсоң Еховаш Иерусалиме гелип, Иерусалимиң диварының Эфрайым дервезесинден Күнч дервезесине ченли болан дөрт йүз тирсек аралыгыны йыкды.

¹⁴ Еховаш Реббиң өйүниң ве патышаның өйүниң хазыналарындакы алтын-күмшүң, гап-гачларың барыны, булардан дашары-да есир алнан адамлары алып, Самария доланып гелди.

¹⁵ Еховашың бейлеки ишлери, әхли эден ишлери, эдерменлиги ве Яхуда патышасы Амазя билен эден уршы барада ысрайыл патышаларының йыл язгыларында языландыр.

¹⁶ Еховаш ата-бабаларына говушды. Ол Самарияда Ысрайыл патышаларының янында җайланды. Онсоң онуң ерине оглы Яробгам патыша болды.

¹⁷ Ёвашың оглы Яхуда патышасы Амазя Ехогахазың оглы болан Ысрайыл патышасы Еховаш өленден соңра он бәш йыл яшады.

¹⁸ Амазяның бейлеки ишлери яхуда патышаларының йыл язгыларында языландыр.

¹⁹ Иерусалимде онуң гаршысына дилдүвшүк гуралды. Онсоң Амазя Лакыша гачып гитди. Эмма онуң ызындан Лакыша адам иберип, олар оны шол ерде өлдүрдилер.

²⁰ Онсоң Амазяның җеседини атлара йүкләп гетирдилер-де, оны Иерусалимде Давут галасында, аталарының янында җайладылар.

²¹ Бүтин яхуда халкы Амазяның он алты яшындакы оглы Узыяны какасы Амазяның ерине патыша этди.

²² Узыя какасы Амазя ата-бабаларына говшандан соң, Эйлат галасыны тәзеден дикелдип, оны Яхуда гайтарып берди.

Ысрайыл патышасы Яробгам

²³ Ёвашың оглы Яхуда патышасы Амазяның шалыгының он бәшинҗи йылында Еховашың оглы Ысрайыл патышасы Яробгам Самария патыша болуп, кырк бир йыл шалык сүрди.

²⁴ Яробгам Реббиң назарында йигренҗи ишлери этди. Ол Небадың оглы Яробгамың Ысрайыла этдирен гүнәлеринден эл чекмеди.

²⁵ Яробгам Ысрайыл Худайы Реббиң Өз гулы гатхеперли Эмитайың оглы Юнус пыгамбер аркалы айдышы ялы, Ысрайыл чәгини Лебохаматдан Араба деңзине ченли болан аралыкда тәзеден дикелтди.

²⁶ Чүнки Реб Ысрайылың агыр мушакгатыны гөрди. Ысрайылда олара көмек берер ялы гулам, азат адамам галманды.

²⁷ Йөне Реб Ысрайылың адыны гөклериң астындан өчүрҗек дийип айтманды. Реб ысрайыллары Еховашың оглы Яробгам аркалы халас этди.

²⁸ Яробгамың бейлеки ишлери, әхли эден ишлери, эдерменлиги, нәхили сөвешени ве онуң өң Яхуда дегишли болан Дамаскы ве Хаматы Ысрайыла гайтарып берши барада ысрайыл патышаларының йыл язгыларында языландыр.

²⁹ Яробгам ата-бабаларына говушды. Ол аталарының хем-де Ысрайыл патышаларының янында җайланды. Онсоң онуң ерине оглы Закаря патыша болды.