2 Patyşalar 13 - Мукаддес Китап

13‑нҗи бап Ысрайыл патышасы Ехогахаз

¹ Яхуда патышасы Ахазяның оглы Ёвашың патышалыгының йигрими үчүнҗи йылында Ехувың оглы Ехогахаз Ысрайыла патыша болуп, Самарияда он еди йыл шалык сүрди.

² Ехогахаз Реббиң назарында йигренҗи ишлери этди. Ол Небадың оглы Яробгамың Ысрайыла этдирен гүнәли ёлларындан йөрәп, гүнә этмекден эл чекмеди.

³ Реб Ысрайыла гаршы гахары гелди. Ол ысрайыллары гайта-гайта Сирия патышасы Хазайылың ве Хазайылың оглы Бенхададың элине берди.

⁴ Ехогахаз Реббе ялбарды, Реб хем оны эшитди, чүнки Реб Ысрайылың чекйән сүтемини, Сирия патышасының олара берйән эзъетини гөрди.

⁵ Шонуң үчин хем Реб Ысрайыла бир халасгәр берди. Шондан соң олар Сирияның голастындан чыкдылар. Шейдип, ысрайыл халкы өңкүси ялы өз өйүнде асудалыкда яшады.

⁶ Муңа гарамаздан ысрайыл халкы Яробгамың несиллериниң Ысрайыла этдирен гүнәлеринден эл чекмән, гайтам гүнә газанмагыны довам этдирди. Ашера буты хем Самарияда галды.

⁷ Шейдип, Ехогахазың диңе элли саны сөвеш арабалы эсгеринден, он сөвеш арабасындан ве он мүң пыяда гошунындан башга гошуны галмады, чүнки Сирия патышасы олары харман тозы кимин ёк эдипди.

⁸ Ехогахазың бейлеки ишлери, әхли эден ишлери ве эдерменлиги барада ысрайыл патышаларының йыл язгыларында языландыр.

⁹ Шейдип, Ехогахаз ата-бабаларына говушды. Ол Самарияда аталарының янында җайланды. Онсоң онуң ерине оглы Еховаш патыша болды.

Ысрайыл патышасы Еховаш

¹⁰ Яхуда патышасы Ёвашың шалыгының отуз единҗи йылында Ехогахазың оглы Еховаш Ысрайыла патыша болуп, Самарияда он алты йыл шалык сүрди.

¹¹ Еховаш Реббиң назарында йигренҗи ишлери этди. Ол Небадың оглы Яробгамың Ысрайыла этдирен гүнәлеринден эл чекмән, гайтам оны довам этдирди.

¹² Еховашың бейлеки ишлери ве әхли эден ишлери, Яхуда патышасы Амазя гаршы эден урушларында гөркезен эдерменлиги барада ысрайыл патышаларының йыл язгыларында языландыр.

¹³ Шейдип, Еховаш ата-бабаларына говушды. Ол Самарияда Ысрайыл патышаларының янында җайланды. Онсоң онуң ерине оглы Яробгам тагта чыкды.

Эляша пыгамбериң өлүми

¹⁴ Эляша агыр кеселләп ятырды. Онуң өлмели пурсады голайланда, Ысрайыл патышасы Еховаш Эляшаның халыны сорамага гелди. Ол: «Эй, атам, атам! Ысрайылың сөвеш арабалары билен сөвеш арабалы эсгерлери!» дийип, сесли аглады.

¹⁵ Эляша Еховаша: «Яйы хем оклары ал» дийди. Еховаш яй билен оклары алды.

¹⁶ Эляша Ысрайыл патышасына: «Яйы чек» дийди. Еховаш онуң айдышы ялы яйы чекди. Эляша эллерини патышаның эллериниң үстүнде гойды.

¹⁷ Соңра ол Еховаша: «Гүндогар тарапдакы пенҗирәни ач» дийди. Еховаш ол пенҗирәни ачды. Эляша Еховаша: «Ат» дийди. Еховаш атды. Онсоң Эляша Еховаша йүзленип, шейле дийди: «Бу Реббиң еңиш окудыр, Сирияның үстүнден еңиш окудыр! Сен Апекде сириялылара гаршы уршуп, олары иң соңкусына ченли гырып ёк этмелисиң».

¹⁸ Эляша довам эдип, Еховаша: «Оклары ал» дийди. Ол хем оклары алды. Эляша Ысрайыл патышасына: «Оклары ере ур» дийди. Еховаш хем оклары ере үч гезек урды-да сакланды.

¹⁹ Онсоң Худайың адамының оңа гахары гелип: «Сен бәш я-да алты гезек урмалыдың, шонда сириялылары соңуна ченли гырардың. Инди сен Сирияны диңе үч гезек еңерсиң» дийди.

²⁰ Шейдип, Эляша дүнйәден өтди ве оны җайладылар. Моваплыларың лешгерлери хер бахарда Ысрайыл топрагына чозуп гирердилер.

²¹ Бир сапар ысрайыллар өлүсини җайлап дуркалар, лешгерлериң гелйәнини гөрүп, яңкы өлини Эляшаның габрына ташладылар-да гачдылар. Ол өли адам Эляшаның сүңклерине галташан бадына дирелип, аяга галды.

Ысрайыл Сирияны еңйәр

²² Сирия патышасы Хазайыл Ехогахазың бүтин өмрүне Ысрайыла сүтем эдип гелипди.

²³ Эмма Реб Ыбрайым, Ысхак ве Якуп билен эден әхти үчин ысрайыллара мерхемет эдип, рехим-шепагат гөркезди ве олары голдады. Реб олары хеләк этмек ислемеди. Шу вагта ченли хем олары Өз хузурындан ковмады.

²⁴ Сирия патышасы Хазайыл дүнйәден өтди ве онуң ерине оглы Бенхадат патыша болды.

²⁵ Ехогахазың оглы Еховаш Хазайылың оглы Бенхадада гаршы уршуп, онуң какасы Ехогахаза гаршы уршуп алан галаларының барыны Бенхададың элинден алды. Еховаш Бенхадады үч гезек еңлише сезевар эдип, Ысрайылың галаларыны ызына гайтарып алды.