2 Patyşalar 12 - Мукаддес Китап

12‑нҗи бап Яхуда патышасы Ёваш

¹ Ысрайыл патышасы Ехувың шалыгының единҗи йылында Ёваш патышалык эдип башлады. Ол кырк йыллап Иерусалимде патышалык этди. Онуң эҗеси Беершебадан болуп, ады Сибяды.

² Ёваш өмүрбойы Реббиң назарында догры ишлери этди, чүнки Ехояда руханы оңа шейле тәлим берипди.

³ Муңа гарамаздан, сеждегәхлер йыкылманды. Халк энтек-энтеклерем шол сеждегәхлерде гурбанлык берип, якымлы ыслы түтетги якярды.

⁴ Ёваш руханылара шейле дийди: «Сиз мукаддес садака хөкмүнде Реббиң өйүне багыш эдилен күмшүң, илат санавында топланан күмшүң, хер кимиң өз башына дүшен кесгитли мөчбердәки берен күмшүниң ве хер адамың Реббиң өйүне мейлетинлик билен берен күмшүниң барыны йыгнаң.

⁵ Гой, хер бир руханы шу хазынадарларың биринден күмүш алсын-да, оны Реббиң өйүниң беҗердилмели ери бар болса, шоны беҗертмек үчин улансын».

⁶ Эмма Ёвашың патышалыгының йигрими үчүнҗи йылында-да руханылар Реббиң өйүниң беҗерилмели ерлерини беҗермәндилер.

⁷ Шонуң үчин хем Ёваш патыша Ехояда руханы билен бирликде бейлеки руханылары хем чагырып, олара: «Сиз нәме үчин Реббиң өйүни беҗермейәрсиңиз? Мундан бейләк сиз күмүш йыгнамаң. Йыгналан күмши Реббиң өйүни беҗермәге бериң» дийди.

⁸ Шейдип, руханылар халкдан күмүш алмазлыга ве Реббиң өйүни-де өзлери беҗермезлиге разылашдылар.

⁹ Онсоң Ехояда руханы бир сандыгы алып, онуң гапагындан бир дешик ачды-да, оны гурбанлык сыпасының янында, Реббиң өйүне гирилйән ериң саг тарапында гойды. Гапыны гаравуллаян руханылар Реббиң өйүне гетирилйән бар күмүшлери шол сандыгың ичине салардылар.

¹⁰ Сандыкда көп күмшүң топланандыгыны гөренлеринде, патышаның кәтиби билен баш руханы гелип, Реббиң өйүндәки бар күмши санап, торбалара салып чекердилер.

^11-12 Онсоң олар чекилен күмши Реббиң өйүнде ишлейән ишчилере гөзегчилик эдйән баштутанлара берердилер. Олар хем шол күмүшден нечҗарлара, Реббиң өйүнде ишлейән уссалара, даш өрүҗилере, даш ёнуҗылара иш хакыны төләрдилер. Шонуң ялы хем олар күмши Реббиң өйүни беҗертмек үчин агаҗы, ёнулан дашлары сатын алмага ве беҗериш үчин зерур болан башга затлара харчлардылар.

¹³ Эмма Реббиң өйүне гетирилен күмүшден Реббиң өйи үчин хич хили күмүш легенлер, мүченеклер, шакәселер, сурнайлар я-да алтындан, күмүшден башга хич хили гап-чанаклар ясалманды.

¹⁴ Чүнки ол күмүш Реббиң өйүни беҗерйән ишчилере берилйәрди.

¹⁵ Ишчилере иш хакыны төлемек үчин эллерине күмүш берлен адамлардан күмшүң хетди-хасабы соралмаярды, чүнки ол адамлар садыклык билен ишлейәрдилер.

¹⁶ Эмма язык садакасы билен гүнә садакасына берлен күмүш Реббиң өйүне гетирилмеди, чүнки ол руханыларыңкыды.

¹⁷ Шол дөвүрде Сирия патышасы Хазайыл Гатың үстүне чозуп, оны басып алды. Соңра ол Иерусалиме хүҗүм этмеги йүрегине дүвди.

¹⁸ Яхуда патышасы Ёваш аталары болан Яхуда патышалары Ехошападың, Ехорамың, Ахазяның Реббе багыш эден бар затларыны, өзүниң Реббе багыш эден бар затларыны, Реббиң өйүниң ве патышаның өйүниң хазыналарындакы алтының барыны алып, Сирия патышасы Хазайыла иберди. Шондан соң Хазайыл Иерусалимден эл чекди.

¹⁹ Ёвашың бейлеки ишлери ве әхли эден ишлери яхуда патышаларының йыл язгыларында языландыр.

²⁰ Ёвашың эмелдарлары оңа гаршы дилдүвшүк гурдулар ве оны Силла гидйән ёлда, Миллоның өйүнде өлдүрдилер.

²¹ Бу иши эден Ёвашың эмелдарлары Шимгатың оглы Ёзабат билен Шомериң оглы Ехозабатды. Ёваш дүнйәден өтди ве Давут галасында, аталарының янында җайланды. Онсоң онуң ерине оглы Амазя патыша болды.