2 Patyşalar 10 - Мукаддес Китап

10-нҗы бап Еху Ахабың несиллерини өлдүрйәр

^1-2 Ахабың Самарияда етмиш оглы ве огул агтыклары барды. Еху Самариядакы Йизрегел баштутанлары болан яшулулара ве Ахабың несиллерине хоссарлык эдйәнлере шейле мазмунлы хат язып иберди: «Җенабыңызың огулларыдыр огул агтыклары сизиң яныңыздадыр, шейле хем атлар, сөвеш арабалары, гала ве яраглар сизиң хызматыңыздадыр.

³ Хаты алан дессиңизе патышаңызың огулларыдыр огул агтыкларындан иң мынасыбыны сайлап, оны атасының тагтында отурдып, җенабыңызың огулларыдыр агтыклары үчин уруш эдиң».

⁴ Самарияның баштутанларының ве Ахабың несиллерине хоссарлык эдйәнлериң горкудан яңа йүреклери ярылды. Олар: «Серет, Ысрайыл патышасы Ёрам билен Яхуда патышасы Ахазя Ехува гаршы дуруп билмедилер, онсоң биз нәдип оңа гаршы дуралы» дийишдилер.

⁵ Шейдип, көшги доландырыҗы, шәхер хәкими, яшулулар ве Ахабың несиллерине хоссарлык эдйәнлер Ехува хабар ёллап: «Биз сениң гулларың, биз сениң диениң билен боларыс. Биз хич кими патышалыга беллемерис. Өзүң нәмәни макул билсең, шоны-да эт» дийдилер.

⁶ Онсоң Еху Самария икинҗи хатыны ёллап шейле дийди: «Эгер сиз мениң тарапымда болуп, мениң диенлериме боюн болсаңыз, онда сиз патышаңызың огулларыдыр агтыкларының барының келлесини алып, эртир шу вагт мениң яныма Йизрегеле гелиң». Ахабың етмиш оглудыр агтыклары өзлерини тербиеләп етишдирен шәхер баштутанларының янындадылар.

⁷ Олар хаты алып, онда айдылышы ялы патышаның огулларыдыр агтыкларының етмишисини хем тутуп, оларың келлелерини кесдилер. Олар патыша огулларыныңдыр агтыкларының келлелерини себеде салып, Йизрегеле Ехувың янына ибердилер.

⁸ Чапар гелип: «Патышаның огулларыныңдыр агтыкларының келлелери гетирилди» дийип хабар берди. Еху: «Олары ики үйшмек эдиң-де, эртире ченли дервезәниң агзында гоюң» дийип табшырык берди.

⁹ Эртеси ир билен Еху халкың өңүне чыкып, шейле дийди: «Сиз языксыз адамлар. Җенабым Ёрама гаршы дилдүвшүк гуруп, оны өлдүрен мен. Эмма бу ятанлары өлдүрен ким?

¹⁰ Онда шуны билип гоюң. Реббиң Ахабың огулларыдыр огул агтыкларына гаршы айдан сөзлериниң хич бири хем ерде галмаз, чүнки Реб Өз гулы Ыляс аркалы диен сөзлерини берҗай этди».

¹¹ Шейдип, Еху Ахабың Йизрегелде яшаян гарындашларының барыны, онуң әхли баштутанларыны, якын достларыны, руханыларыны гырып, екеҗе адамы хем дири галдырмады.

^12-13 Онсоң Еху Самария тарап ёла дүшди. Ол ёлда чопанларың Бейтекет диен дүшелгесинде Яхуда патышасы Ахазяның гарындашларына саташып, олардан: «Сиз ким боларсыңыз?» дийип сорады. Олар: «Биз Ахазяның гарындашларыдырыс. Биз шазадалар билен, ша аялының огуллары билен гөрме-гөрше барярдык» дийип җогап бердилер.

¹⁴ Еху өз адамларына: «Булары дири тутуң» дийди. Олар Ахазяның гарындашларыны дири тутуп, шол ердәки Бейтекет гуйының янында оларың кырк икисини хем өлдүрдилер. Еху олардан екеҗесини хем дири галдырмады.

¹⁵ Еху ол ерден гайдып, өзүни гаршыламага гелйән Рекабың оглы Ёнадаба саташды. Еху оңа салам берип, ондан: «Мениң йүрегимиң сениңки билен бир болшы ялы, сениң йүрегиң-де мениңки билен бирми?» дийип сорады. Ёнадап хем: «Бирдир» дийип җогап берди. Еху: «Эгер шейле болса, онда элиңи узат» дийди. Ёнадап Ехува тарап элини узатды. Еху оны араба мүндүрди.

¹⁶ Еху оңа: «Мениң билен гит-де, Реббе вепалыдыгымы гөр» дийди. Шейдип, Ехувың адамлары Ехонадабы онуң сөвеш арабасына мүндүрдилер.

¹⁷ Еху Самария гелип, Реббиң Ыляс аркалы айдан сөзүне гөрә Ахабың галан тохум-тиҗиниң барыны иң соңкусына ченли гырып ёк этди.

Еху Багала сежде эдйәнлери ёк эдйәр

¹⁸ Онсоң Еху бүтин халкы йыгнап, олара йүзленип шейле дийди: «Сиз Ахап Багала вепалы болды дийип пикир эдйәнсиңиз, эмма мениң – Ехувың Багала Ахапдан хас вепалыдыгымы гөрерсиңиз.

¹⁹ Шонуң үчин хем шу вагт Багалың пыгамберлериниң, Багала сежде эдйәнлериң, онуң руханыларының барыны мениң яныма чагырың. Оларың екеҗесини хем галдырмаң, чүнки мен Багала улы гурбанлык хөдүр этҗек. Оларың ичинден екеҗеси гелмән галайса, ол дири галмаз». Эмма бу Ехувың Багала сежде эдйәнлери ёк этмек үчин гуран хилесиди.

²⁰ Еху өз адамларына: «Багалың хатырасына оңа сежде этмек үчин йыгнанышык гүнүни ыглан эдиң» дийип буйрук берди. Ехувың адамлары Багала сежде эдилмели гүни ыглан этдилер.

²¹ Еху тутуш Ысрайыла хабар ёллады. Багала сежде эдйән әхли кишилер гелди, гелмән галан екеҗе адам хем ёкды. Гелен адамларың бары Багалың бутханасына гирди. Бутхана тә босагасына ченли адамдан долды.

²² Еху Багала сежде эдиленде гейилйән мукаддес донлары саклаян рухана: «Багала сежде эдйәнлериң барына дон гетирип бер» дийди. Ол сакчы хем оларың барына дон гетирип берди.

²³ Онсоң Еху Рекабың оглы Ёнадап билен Багалың бутханасына гирди. Еху Багала сежде эдйәнлере йүзленип: «Төверегиңизе середип гөрүң, араңызда Реббе сежде эдйәнлерден хич ким болмасын, диңе Багала сежде эдйәнлер болсун» дийди.

²⁴ Ондан соң Еху билен Ёнадап гурбанлыклары ве якма гурбанлыклары хөдүрлемек үчин ичери гирдилер. Еху бутхананың дашында сегсен адамы гоюп, олара: «Сизиң элиңизе берйән бу адамларымдан екеҗеси гачып гутулайса, олар үчин өз келләңиз билен җогап берерсиңиз» дийди.

²⁵ Еху якма гурбанлыгыны берип гутаран бадына, эсгерлере ве оларың серкерделерине йүзленип: «Бутхана гириң-де, оларың барыны гырың, екеҗесини хем гачыраймаң» дийди. Шейдип, олар Багалың гулларының барыны гылычдан гечирдилер. Эсгерлер ве серкерделер оларың җесетлерини дашары чыкарып ташладылар. Соңра олар Багалың бутханасына ыбадат эдилйән ички отага гирдилер.

²⁶ Шол ерде олар Багалың бутханасындакы дикме дашы дашары чыкарып, оны күл-оврам этдилер.

²⁷ Олар Багалың дикме дашыны йыкдылар. Багалың бутханасыны йыкып, оны хаҗатхана өвүрдилер. Ол шу гүне ченли хем шейледир.

²⁸ Шейдип, Еху Ысрайылда Багала сежде эдилмегиниң соңуна чыкды.

²⁹ Эмма Еху Небадың оглы Яробгамың гүнәли ишлеринден эл чекмеди. Яробгам Бейтелдәки ве Дандакы алтын гөлелере сежде эдип, ысрайыл халкына гүнә этдирди.

³⁰ Реб Ехува: «Сен Мениң назарымда догры иш эдип, Ахабың тохум-тиҗи бабатда Мениң йүрегимиң ислегини ерине етирдиң. Шонуң үчин хем сениң неслиң дөрдүнҗи арка ченли Ысрайыла патыша болар» дийди.

³¹ Эмма Еху Ысрайыл Худайы Реббиң канунларыны бүтин калбы билен берҗай этмеди. Ол ысрайыл халкына гүнә этдирен Яробгамың гүнәлеринден эл чекмеди.

Ехувың өлүми

^32-33 Шол дөвүрде Реб Ысрайылың чәклерини кичелтмәге башлады. Сирия патышасы Хазайыл Иордан дерясының гүндогарындан гатлылара, рубенлилере ве манашалылара ченли болан бүтин Гилгат топрагыны, Арнон җүлгесиниң якасындакы Арогерден Гилгада ве Башана ченли болан тутуш юрды басып алды.

³⁴ Ехувың галан ишлери, әхли эден ишлери ве эдерменликлери барада ысрайыл патышаларының йыл язгыларында языландыр.

³⁵ Шейдип, Еху ата-бабаларына говушды. Ол Самарияда аталарының янында җайланды. Онсоң онуң орнуна Ехувың оглы Ехогахаз патыша болды.

³⁶ Еху Самарияда Ысрайыла йигрими секиз йыл патышалык этди.