2 Korintoslylar 8 - Мукаддес Китап

8‑нҗи бап Сахылык нусгасы

¹ Инди болса, эй, доганлар, Худайың Македонияның йыгнакларына берен мерхемети барада билмегиңизи ислейәрис.

² Олар агыр мушакгатларда сыналса-да, җошгунлы шатлыкдан долуп-дашярлар. Гарыплыгы ченден агыр болса-да, сахылыга байдырлар.

³ Догрудан-да, олар элинден гелен, хатда ондан хем артык хемаят көмегини сахылык билен мейлетин бердилер.

⁴ Олар Худайың Иерусалимдәки халкына эдилйән хызмата өзлериниң хем шәрик эдилмегини сорап, бизе ялбардылар.

⁵ Бу эден тамамыздан-да артык болды. Олар өзлерини илки Реббе, соңра-да Худайың ислегине гөрә бизе багыш этдилер.

⁶ Шонуң үчин биз Титусдан сизиң араңызда башлан бу хайырлы ишини шол тәрде-де соңуна ченли довам этмегини хайыш этдик.

⁷ Сизиң иманыңыз гүйчли; сиз нәдип вагыз этмелидигини билйәрсиңиз. Сизиң дүшүнҗәңиз, ыхласыңыз ве бизден өвренен сөйгиңиз долуп-дашяр. Хакыкы, сиз әхли зады шейле оңат башарярсыңыз. Шонуң үчин-де, сахылыкда-да шейле болмагыңызы ислейәрис.

⁸ Ёк, бу буйрук дәл. Бейлеки йыгнакларың ыхласы барада айтмак билен, сизиң сөйгиңизиң нәдереҗеде хакыкыдыгыны барласым гелйәр.

⁹ Чүнки сиз Реббимиз Иса Месихиң мерхеметини билйәңиз: Ол бай болса-да, сизиң хатыраңыз үчин гарып болды. Иса Месих муны Өзүниң гарыплыгы аркалы сизиң бай болмагыңыз үчин эдипди.

¹⁰ Сиз гечен йыл хемаят бермекде илкинҗи болмак билен чәкленмән, муны улы хөвес билен этдиңиз. Шунлукда, ине, мениң маслахатым:

¹¹ бу иши өз мүмкинчилигиңизден угур алып битириң. Оны ыхласлы башлайшыңыз ялы, ыхлас билен-де тамамлаң.

¹² Чүнки хемаят бермек хөвеси бар болса, Худай ынсаның ёк задына гөрә дәл-де, элинде бар боланына гөрә кабул эдйәндир.

¹³ Биз башгаларың йүкүни еңлетҗек болуп, сизе аграм салмак исләмзок. Биз хеммелере деңлик болсун диййәрис.

¹⁴ Сизиң болелинлигиңиз шу гүн оларың мәтәчлигиниң өвезини долдурса, эртирки гүн оларың болелинлиги сизиң мәтәчлигиңизиң өвезини долдурар. Шейлеликде, хеммелере деңлик болар.

¹⁵ Чүнки Төвратда язылышы ялы: «Көп йыгнаныңкыдан хич зат артмады, аз йыгнаның хич кем зады болмады».

Титус ве бейлеки доганлар Коринтоса иберилйәр

¹⁶ Худая мүң-де бир шүкүр! Ол Титусың-да йүрегине сизе болан ыхласы салды.

¹⁷ Титус диңе бизиң хайыш эденимиз үчин дәл, эйсем сизе болан ыхласы себәпли яныңыза гөвүнҗеңлик билен гитди.

¹⁸ Титусың яны билен иманлы доганымызы хем иберйәрис. Онуң Хош Хабары яймакдакы хызматы үчин, оны әхли йыгнаклар сылаяндыр.

¹⁹ Мундан башга-да, ол йыгнаклар тарапындан сайланып, хемаят көмегини Иерусалиме әкитмек үчин бизе ёлдаш белленди. Бизиң бу хайырлы ишимиз Ребби шөхратландырып, ярдам этмекдәки ыхласымызы гөркезйәндир.

²⁰ Биз шейле улы мукдардакы пулы пайламакда хич бир айыпланма сезевар болмаз ялы, әтияҗы элден бермейәрис.

²¹ Биз диңе Реббиң назарында дәл, эйсем ынсанларың назарында хем халал ишлемәге дырҗашяндырыс.

²² Шейле-де Титусың яны билен ене-де бир доганымызы иберйәрис. Ол өзүниң хер дүрли ишлерде ыхласлыдыгыны энчеме гезек субут этди. Сизе болан ынамы себәпли, ол мундан бейләк хас-да көп ыхлас этмәге тайындыр.

²³ Титус бабатда шуны айтмакчы: ол мениң ёлдашым ве сизиң араңыздакы хызматдашымдыр. Иберен доганларымыз болса йыгнакларың векиллери ве Иса Месихиң шөхратыдыр.

²⁴ Шоңа гөрә-де, оларың барына өз сөйгиңизи гөркезип, сиз бабатдакы магтанҗымызың ерликлидигини әхли йыгнаклара субут эдиң.