2 Korintoslylar 6 - Мукаддес Китап

6-нҗы бап

¹ Биз Худайың ишдешлери хөкмүнде сизе ялбарярыс: Ондан алан мерхеметиңизи харламаң.

² Чүнки Худай шейле диййәр: «Мерхемет гөркезҗек дөврүмде сени эшитдим, гутулыш гүнүнде Мен көмек этдим». Ине, инди мерхемет гүнүдир, инди гутулыш гүнүдир!

³ Биз хызматымыз абрайдан дүшмесин дийип, хич кимиң бүдремегине себәп боламзок.

⁴ Терсине, әхли затда өзүмизи Худайың хакыкы хызматчылары хөкмүнде әшгәр эдйәрис. Биз мушакгатлара, мәтәчликлере, чыкгынсыз ягдайлара,

⁵ урлуп-енҗилмелере, туссаг эдилмелере, питнелере, агыр зәхмете, укусыз гиҗелере, ач-сувсузлыга сабыр-такатлык билен чыдаярыс.

⁶ Биз муны пәклик, билим, тутанъерлилик, рехим-шепагат, Мукаддес Рухуң барлыгы, чын сөйги,

⁷ хакыкат хабары, Худайың гүйҗи аркалы субут эдйәрис. Догрулык – бизиң ярагымыз. Биз оны хем саг, хем-де сол элимизде гөтерйәрис.

⁸ Адамлар бизи сыласалар-да, кемситселер-де, мыҗабат япсалар-да, өвселер-де – биз барыбир Худая хызмат эдйәрис. Олар бизи яланчы сайярлар, йөне биз хакыкаты сөзлейәндирис.

⁹ Биз таналсак-да, рет эдилйәрис; аҗал якамыздан тутса-да, диридирис; җезаландырылсак-да, өлдүрилен дәлдирис;

¹⁰ ынҗатсалар-да, элмыдама шатдырыс; гарып болсак-да, көплери баядяндырыс; хич задымыз болмаса-да, әхли зада эедирис.

¹¹ Эй, коринтослылар! Биз сизиң билен ач-ачан гүрлешдик, сизе йүрегимизи ачдык.

¹² Сизден сөйгимизи аямасак-да, сиз бизден өз сөйгиңизи аяярсыңыз.

¹³ Мен сизе хут өз чагаларыма йүзленйән ялы йүзленйәрин: биз йүреклеримизи сизе ачышымыз ялы, сиз-де йүреклериңизи бизе ачың.

Бутпаразлыкдан гача дуруң

¹⁴ Иман этмедиклер билен бир боюнтырыга гирмәң! Догрулыгың пислик билен нәме шәриклиги бар? Я-да нур билен түмлүгиң нәме умумылыгы бар?

¹⁵ Иса Месих билен шейтаның арасында ылалашык, хей-де, болуп билҗек затмы? Иманлы билен имансызың нәме шәриклиги бар?

¹⁶ Худайың ыбадатханасы билен бутларың, хей-де, өзара ылалашыгы болармы? Чүнки биз дири Худайың ыбадатханасыдырыс. Худай: «Мен оларың арасында месген тутарын ве оларың арасында боларын. Мен оларың Худайы, олар хем Мениң халкым боларлар» дийипди ахырын.

¹⁷ «Шоңа гөрә-де, оларың арасындан чыкың-да, олардан айрылың». Муны Реб диййәр. «Харам затлара эл дегирмәң, шонда Мен сизи кабул эдерин».

¹⁸ «Мен сизе Ата боларын сиз хем Мениң огул-гызларым боларсыңыз». Муны Хөкмүрован Реб диййәр.