2 Korintoslylar 3 - Мукаддес Китап

3‑нҗи бап

¹ Эйсем биз сизи өзүмиз билен гайтадан таныш этмелими? Нәме, биз кәбирлери ялы сизе я-да сизден болан танатма хатларына мәтәчми?

² Ёк! Бизиң танатма хатымыз сизсиңиз! Бу хат бизиң йүреклеримизе языландыр. Ол хеммелере мәлимдир, оны хеммелер окап-да билйәр.

³ Месихиң хаты сизсиңиз. Бу месе-мәлим зат. Бу хатымыз хызматымызың нетиҗесидир. Биз оны сыя билен дәл-де, дири Худайың Рухуның гүйҗи аркалы яздык. Ол ясы даш бөлеклерине дәл-де, ынсан йүрегине языландыр.

⁴ Бу бабатда Месих аркалы Худайың хузурында бизиң шейле ынамымыз бардыр.

⁵ Бу иши өз-өзүмизден башарярыс дийип айтмага хич эсасымыз ёкдур. Бу башарныгы бизе Худай берйәр.

⁶ Ол бизе тәзе әхтиң хызматчылары болмак укыбыны берди. Бу әхт язылан Канун аркалы дәл-де, Мукаддес Рух аркалы беркидилендир. Чүнки язылан Канун өлүме хөкүм эдйәр, Мукаддес Рух болса яшайыш берйәр.

Тәзе әхтиң шөхраты

⁷ Хава, даш бөлеклерине оюлып язылан Канун өлүме хөкүм эдйәрди. Эмма муңа гарамаздан, Худайың шөхраты Мусаның йүзүне чайылыпды. Бу нур өчүгси болса-да, ысрайыл халкының гөзүни гамашдырыпды. Эгер өлүме хөкүм эдйән хызматың шөхраты шейле болса,

⁸ онда Худая Мукаддес Рух аркалы хызмат этмеклигиң шөхраты ондан парлак дәлмидир?!

⁹ Эгер адамлары хөкүм эдйән хызмат шөхратлы болан болса, онда адамлары Худайың назарында аклаян хызматың шөхраты ондан-да бейикдир.

¹⁰ Чүнки хемме затдан бейик болан шөхрат орта чыкандан соң, озалкы шөхрат хич болуп галды.

¹¹ Эгер вагтлайын хызмат шейле шөхратлы болса, онда мүдимилик хызмат ондан гөр-бак нәче шөхратлыдыр!

¹² Биз шейле умыдымыз боланы үчин батыргайлык билен херекет эдйәрис.

¹³ Биз Муса ялы дәлдирис. Ол ысрайыл халкы өчүгсиленйән шөхратың соңуны гөрмесин дийип йүзүни басырярды.

¹⁴ Йөне оларың акылы күтелди, себәби көне әхт олара окалып берленде, бу перде хениз-де йүзлерини басыряндыр. Бу йүз пердеси диңе Иса Месихе иман эдиленде айрыляр.

¹⁵ Мусаның китабы хатда бизиң гүнлеримизде окаланда-да, бу перде оларың йүрегини басыряр.

¹⁶ Йөне Реббе тарап өврүленлеринде, бу перде сырыляр.

¹⁷ Реб Рухдур. Реббиң Рухы ниреде болса, азатлык хем шол ердедир.

¹⁸ Биз хем йүзүмизи басырман, Реббиң шөхратының ялкымыны гөрйәрис. Реббиң Рухы әхлимизи гитдигисайы нурландырып, бизи Өз кешбине өзгердйәр.