2 Korintoslylar 2 - Мукаддес Китап

2‑нҗи бап

¹ Шунлукда, мен ене гамланмайын дийип, яныңыза бармазлыгы йүрегиме дүвдүм.

² Эгер мен сизи гамландырян болсам, мени ким шатландырсын? Мениң гамландыранларыммы?!

³ Шоңа гөрә-де, баранымда мени шатландырмалы адамлар гөвнүми гамландырмасын дийип, шол хаты яздым. Мениң шатлыгыма сизиң-де шатланҗакдыгыңыза берк ынанярын.

⁴ Мен шол хаты параланан йүрекден мушакгат ичинде языпдым. Йөне мениң ниетим сизи гынандырмак дәл-де, сизе болан чәксиз сөйгими гөркезмекди.

Павлус коринтослылара гүнәкәрлери багышламагы үндейәр

⁵ Мени гамландыран адам диңе мени дәл-де, улалтмайын велин, белли бир дереҗеде хеммәңизи гамландырандыр.

⁶ Көпчүлигиң оны язгармагы онуң үчин етерлик җезадыр.

⁷ Ол бүтинлей гам лайына батмаз ялы, инди оны багышламалысыңыз, теселли бермелисиңиз.

⁸ Хайыш эдйәрин: оны догрудан-да сөййәндигиңизи тассыклаң.

⁹ Шоңа гөрә-де, мен шол хаты сизи сынамак ве хер бир затда табын болуп-болмаянлыгыңызы билмек үчин яздым.

¹⁰ Сизиң багышлан кишиңизи мен хем багышлаярын, себәби мен хем бирини бир затда багышлан болсам, багышланымы сизиң хатыраңыз үчин Месихиң хузурында багышладым.

¹¹ Мен муны шейтан бизден үстүн чыкмасын дийип этдим. Онуң кеззаплыгы бизе мәлим ахырын.

Павлус өз хызматыны гораяр

¹² Мен Месихиң Хош Хабарыны вагыз этмәге Троас шәхерине баранымда, маңа Реб тарапындан бир гапы ачылды.

¹³ Муңа гарамаздан, көңлүм рахат дәлди, себәби мен ол ерде доганым Титусы тапмадым. Шонуң үчин-де, олар билен хошлашып, Македония уградым.

¹⁴ Йөне Худая мүң-де бир шүкүр! Ол Месихиң дабаралы йөришине бизи элмыдама шәрик эдйәр. Худай Өзи барадакы билими биз аркалы әхли ере мүшк-анбар кимин яйяр.

¹⁵ Чүнки биз гутулыш ёлундан барянларың-да, хеләкчилик ёлундан барянларың-да арасында Худай үчин Месихиң мүшки-анбарыдырыс.

¹⁶ Биз хеләкчилик ёлундан барянлар үчин өлүм ысы болсак, гутулыш ёлундан барянлар үчин яшайыш мүшки-анбарыдырыс. Бейле ишиң хөтдесинден гелҗек асла ёкдур!

¹⁷ Биз гара небислерине чапян адамлар кимин Худайың Хош Хабарыны ёймаярыс. Терсине, Худай тарапындан иберилен ве Месихе хызмат эдйән кишилер ялы Худайың хузурында пәк йүрекден вагыз эдйәрис.